Japu: Umi testígo de Jehová ndahaʼéi kristiáno, upévare ndofestehái Páskua.

 Añete: Ore roguerovia Jesucristo haʼeha ñande Salvadór ha roñehaʼãmbaite ‘roguata hekoitépe ipyporére’ (1 Pedro 2:21; Lucas 2:11).

Japu: Peẽ ndapegueroviái Jesús oñemoingove jey hague.

 Añete: Ore roguerovia Jesús oñemoingove jey hague ha iñimportanteterei oréve g̃uarã, upévare roñeʼẽ meme hese predikasiónpe (1 Corintios 15:3, 4, 12-15).

Japu: Peẽ ndapeipotái voi umi mitã ovyʼami Páskua díape.

 Añete: Ore rohayhueterei ore famíliape ha rojapo ikatúva guive ovyʼa ha osẽ porã hag̃ua hikuái (Tito 2:4).

•   La Biblia ningo ndeʼíri jafesteha vaʼerãha pe Páskua.

•   Jesús heʼi vaʼekue ojegueromanduʼa hag̃ua haʼe omano hague ára, ndahaʼéi pe día oñemoingove jey hague chupe. Káda áño, oĩháicha pe kalendário hudíope, Conmemoración jave ore rogueromanduʼa haʼe omano hague ára (Lucas 22:19, 20).

•   Yma ningo umi ifamiliaséva omombaʼeguasu vaʼekue peteĩ diósape, ha upéva rendaguépe koʼág̃a ojefesteha pe Páskua. Upéicha rupi Ñandejára ndoguerohorýi ojejapo upéva. Haʼe oipota “chupe añoiténte oñemombaʼeguasu” ha ndogustái chupe umi kostúmbre ojejapóva oñemombaʼeguasu hag̃ua ótrope (Éxodo 20:5; 1 Reyes 18:21).

 Ore ningo ndorofestehái pe Páskua roikuaágui la Biblia ndeʼiriha jajapo hag̃ua upéva. Ñandejára Ñeʼẽ ñanemokyreʼỹ ‘jajepyʼamongeta porã ha ñanearandu hag̃ua’, upéicha ndajajapomoʼãi ñande rapichakuéra ojapóvante (Proverbios 3:21, Ñande Ruete Ñeʼẽ Biblia; Mateo 15:3). Ore romombeʼu ore rapichakuérape mbaʼérepa ndorofestehái pe Páskua, péro roikuaa avei káda uno odesidi vaʼerãha ojapótapa upéva térãpa nahániri (1 Pedro 3:15).