Ore testígo de Jehová ndorohói gerrahápe koʼã mbaʼére:

1.   Oreñeʼẽrendu rupi Ñandejárape. La Biblia heʼi umi ohayhúva Ñandejárape ‘ojapotaha ikyse pukúgui arádo’ ha noñorairõmoʼãiha (Isaías 2:4).

2.   Oreñeʼẽrendu rupi Jesúspe. Peteĩ jey Jesús heʼi apóstol Pédrope: “Eñongatu jey nde espáda ilugárpe, cháke umi oiporúva guive pe espáda, ojejukáta espádape” (Mateo 26:52). Péicha ohechauka isegidorkuéra ndoiporúi vaʼerãha árma.

    Jesús heʼi avei idisipulokuéra ‘ndojeheʼaiha ko múndore’. Upévare kristianokuéra ni mbaʼevéicharõ noñentremetéi vaʼerã polítikape (Juan 17:16). Avei ndoikói oñemoĩ umi militár ojapóvare oiko jave provléma peteĩ tetãme, ha ndeʼíri avavépe ani hag̃ua oike ehérsitope.

3.   Rohayhu rupi opavavépe. Jesús heʼi idisipulokuérape: “Ameʼẽ peẽme peteĩ mandamiénto pyahu: pejoayhúkena” (Juan 13:34, 35). Umi kristiáno añetegua ningo oĩ opárupi ko yvy ape ári ha entéronte ojoayhu, upévare arakaʼeve nopuʼãmoʼãi ojuehe gerrahápe (1 Juan 3:10-12).

4.   Rosegi rupi umi kristiáno ypykue ehémplo. Peteĩ ensiklopédia heʼi “umi disípulo Jesús tiémpope guare ndohói hague gerrahápe ni ndoikéi ehérsitope”. Haʼekuéra ndojapói koʼã mbaʼe “oikuaágui Jesús omanda hague jahayhu vaʼerãha opavavépe, tahaʼe jepe raʼe ñane enemígo” (Encyclopedia of Religion and War). Peteĩ teólogo alemán hérava Peter Meinhold heʼi avei umi disípulo ypykuére: “Umi kristiáno ni mbaʼevéicharõ ndoservíri vaʼekue ehérsitope”.

 Ore ningo roñehaʼã rojapo mbaʼe porã entéro rehehápe, ha ni mbaʼevéicharõ ndorojapói mbaʼeve operhudikátava ore retãme. Avei rorrespeta umi governántepe, péicha rojapo la Biblia heʼíva koʼã téxtope:

•   “Opavave oñemoĩ vaʼerã mburuvichakuéra poguýpe.” (Romanos 13:1.)

•   “Pemeʼẽ Césarpe imbaʼéva, péro pemeʼẽ Ñandejárape imbaʼéva.” (Mateo 22:21.)

 Upévare rokumpli umi léi, ropaga impuésto ha roipytyvõ ojeiko hag̃ua pyʼaguapýpe.