Akakuaa siuda de Los Ángelespe (California, Estados Unidos). Pe siudápe oĩ vaʼekue heta várrio mboriahu oikohápe umi patotéro ha umi ovendéva dróga. Ha umichahápe ore roiko vaʼekue. Roime vaʼekue seis ermáno, cuatro kuimbaʼe ha mokõi kuña; che hína pe segundore.

Che sy oreguerahámi vaʼerã peteĩ iglésia evanhélikape. Péro chekariaʼýpe nacheinteresavéi mbaʼeve, ndoúi ni ndohói chéve la ojeʼéva upépe. Domingokue apurahéi guaʼu pe iglésiape, péro umi ótro día afarrea, ajedroga ha aiko kuñándi.

Che cheviolentoiterei vaʼekue ha atopasénte voi aiko vai hag̃ua, umícha jave ajagarrántema oimeraẽ mbaʼe oĩva upérupi aporoinupã hag̃ua. Umi mbaʼe ahendúva pe iglésiape mbaʼevetépe nachepytyvõi. Che apensámi vaʼekue voi: “El Señór ningo la oñevenga vaʼerã, péro haʼe ojevale cherehe ojapo hag̃ua upéva”. Áño 1966-pe oñepyrũ vaʼekue peteĩ grúpo polítiko hérava “Panteras Negras”, hatã ombaʼapóva odefende hag̃ua umi hénte derécho. Chéve chegusta vaʼekue la ojapóva hikuái, upévare aike peteĩ grúpo de estudiántepe ombaʼapóva avei haʼekuéraicha. Sapyʼánte rojapómi vaʼerã manifestasión, ha umícha jave oñemboty pe koléhio.

Upéi katu añepyrũma ajapo heta mbaʼe ivaietevéva. Por ehémplo, peteĩ vuéltape aha che amigokuérandi sinehápe ha rohecha peteĩ pelíkula oñeʼẽva umi esklávo ou vaʼekuére Áfricagui. Pe pelíkula ohechauka mbaʼéichapa oñemaltrata vaipa chupekuéra Estados Unídospe. Rorrenegaiterei umi hénte ipire morotĩvare, upévare roñepyrũ roinupã vaipa umi mitãrusu vlánkope, ohóva kuri upépe ohecha hag̃ua pe pelíkula. Upéi roho umi várrio oikohápe umi vlánko ha rojuhúvape roinupã.

Che ermanokuéra ha che malevoite vaʼekue, ha heta roñaprovlema vaʼekue umi polisíandi, hiʼarive che upérõ neʼĩra ni 20 áño akumpli. Peteĩ che ermáno imitãvéva chehegui oike peteĩ grúpo de patotérope. Ko grúpo ifamóso vaʼekue ojapo rupi heta mbaʼe vai, ha che ajeheʼa avei hesekuéra. Amasdía aha vaive kuri hese.

Upérõ che areko vaʼekue peteĩ che sósio ituvakuéra haʼéva testígo de Jehová. Haʼekuéra cheinvita aha hag̃ua hendivekuéra irreuniónpe. Ag̃uahẽre upépe ahechakuaa mbaʼeichaitépa idiferénte hikuái umi ótro héntegui. Enterove oreko la Biblia ha oipuru pe rreunión aja. ¡Upépe umi mitãrusuʼi  jepe omeʼẽ vaʼekue diskúrso! Chesorprendeterei aaprendévo Ñandejára heraha Jehová, ha ahecharamo mbaʼéichapa haʼekuéra oipuru héra pe rreuniónpe (Salmo 83:18). Pe kongregasiónpe oĩ vaʼekue hénte diferénte paisgua, péro ahechakuaa haʼekuéra nomboykeiha avavépe ipire kolór diferénte haguére.

Ñepyrũrã che ndastudiaséi vaʼekue la Bíblia umi Testígondi, péro chegusta vaʼekue irreunionkuéra. Peteĩ pyharépe, aime jave upépe, unos kuánto che sósio oho peteĩ konsiértope ha oinupã hikuái peteĩ mitãrusúpe omano meve oipeʼa hag̃ua chugui ikampéra de kuéro. Al día sigiénte, mbaʼeverõguáicha omombeʼu hikuái la ojapóva, ha oñemombaʼe guasu voi upévare. Ni ojerahárõ guare chupekuéra trivunálpe ndoguapýi hesekuéra la ojapo vaʼekue. Opavave léntope oñekondena oho hag̃ua kárselpe omano meve. ¡Haʼetépe ndahái hendivekuéra! Upépe adesidi astudiataha la Biblia ha akambiataha aiko lája.

Che heta tiémpore ndachaʼéi vaʼekue umi hénte ipire morotĩvare. Upévare heta vése chejurujái apytávo umi mbaʼe ojapóvare umi testígo de Jehová. Por ehémplo, peteĩ vuéltape peteĩ Testígo vlánko oviaha ótro paíspe, ha onkarga ótra famíliape okuida hag̃ua umi mitãre, jepe umi oĩva upe famíliape ipire hũ. Ahecha avei peteĩ família vlánka oaseptaha peteĩ mitãrusu négrope oiko hendivekuéra. Upépe ahechakuaa umi testígo de Jehová okumpliha Jesús heʼi vaʼekue Juan 13:35-pe: “Péicha pejoayhúramo, enterove ohechakuaáta peẽ haʼeha che disípulo”. Upéva chekonvense haʼekuéra ojoayhuha oñoermáno teéicha, ha ahecharamoiterei upéva.

Amáske astudia la Biblia, ahechakuaa akambia vaʼerãha heta mbaʼépe. Ndahaʼéi ningo kuri añehaʼãnte vaʼerã ajejoko pono añorairõ, síno tekotevẽ vaʼekue akambiaite voi apensa lája (Romanos 12:2). Mbeguekatúpe ningo akambia ahávo heta mbaʼépe. Ha enero de 1974-pe ajevautisa ha oiko chehegui testígo de Jehová.

Ajevautisa rire jepe tekotevẽ kuri asegi añehaʼã pono cheviolénto. Por ehémplo, peteĩ díape roho ropredika peteĩ várriope, ha peichahágui ahecha sapyʼa peteĩ mondahápe ogueraha jave che autorrádio. Pyaʼe asẽ adipara hapykuéri. Ha ahupytýta jave chupe, oity yvýpe pe rrádio ha osegi odipara. Upéi amombeʼu umi opredikávape chendive mbaʼéichapa arrekupera jey la che rrádio, ha peteĩva heʼi chéve: “¿Ha mbaʼe rejapomoʼã rehupytýrire chupe?”. Upéva chemopensa, ahechakuaa ofaltaha gueteri añehaʼãve ajejokokuaa hag̃ua.

Octubre de 1974-pe, añepyrũ apredika 100 órarupi káda mes ha amboʼe che rapichakuérape la Biblia. Upéi añeinvita aha hag̃ua ambaʼapo de voluntário pe sentrál orekóvape umi testígo de Jehová Broóklynpe (Nueva York). Péro che sy hasyete kuri, ha upévare áño 1978-pe aha jey Los Ángelespe akuida hag̃ua hese. Dos áño rire, amenda peteĩ mitãkuña héravare Aarhonda. Haʼe tuichaiterei chepytyvõ añangareko tiémpope mamáre. Upéi che sy omano, ha tiémpo riremi che rembireko ha che roho Eskuéla Vívlika de Galaádpe. Ha opa rire pe kúrso, roho kómo misionéro Panamáme, ha koʼag̃aite peve roime upépe.

Ajevautisa guive, ahasáma heta situasión ikatuhápe kuri arreaksiona vai ha cheviolénto jey yma guaréicha. Umícha jave, ahánte ótro ládo pono aiko vai avavéndi térã ajapo ikatúva guive oñekalma hag̃ua pe situasión. Che rembireko ha heta che konosído chefelisita péicha ajejoko haguére, ha che jepe sapyʼánte añesorprende arreaksiona lájare. Péro ndahaʼéi ningo chejehegui akonsegíva upéva. Che pyʼaite guive aguerovia la Biblia orekoha podér okambia hag̃ua la héntepe (Hebreos 4:12).

Yma naisentídoi vaʼekue che rekove, péro koʼág̃a aservi Ñandejárape ha avyʼaiterei upévare. La Biblia chepytyvõ aiko porã hag̃ua che rapichakuérandi. Koʼág̃a naporoinupãvéima, upéva rangue aipytyvõ umi héntepe oikuaa hag̃ua Ñandejárape. Por ehémplo, peteĩ mitãrusu chekontrarioite vaʼekue koléhiope oñepyrũ ostudia chendive la Biblia. Upéi haʼe ojevautisa, ha peteĩ tiémpore rokomparti oñondive peteĩ óga. Koʼag̃aite peve haʼe che amigoite. Che rembireko ha che roipytyvõma mas de 80 persónape oiko hag̃ua chuguikuéra testígo de Jehová.

Che pyʼaite guive aagradese Jehovápe chemboʼe haguére mbaʼéichapa aiko vaʼerã. Upéva rupi chepyʼaguapy ha areko heta amígo tee oservíva avei Ñandejárape. ¡Añetehápe avyʼaiterei!