KINGSLEY ojapótarõ guare primera ves ipárte Eskuéla Jaipurukuaa Hag̃ua la Bíbliape, peteĩ ermáno oñatõiʼimi chupe ilómope oavisa hag̃ua chupe ikatumaha olee. Ni peteĩ palávra ningo ndosalteái ha syryrýpe olee. Péro haʼe ni nomañái la ivívliare olee hag̃ua, ¿mbaʼéicha rupi piko upéva?

Kingsley oiko vaʼekue Sri Lánkape. Haʼe ningo isiégo, nohenduporãi ha sílla de rruédapemante ikatu vaʼekue oñemovilisa. ¿Mbaʼéichapa haʼe ou oikuaa Jehovápe? ¿Mbaʼépa ojapo ikatu hag̃uáicha oĩ preparádo opartisipa hag̃ua pe Eskuéla Jaipurukuaa Hag̃ua la Bíbliape? Amombeʼumíta peẽme la ijistória.

Aikuaa ypýrõ guare Kíngsleype, ahecharamoiterei mbaʼéichapa oaprendese la Biblia omboʼéva. Haʼe ostudiáma vaʼekue voi la Biblia heta ermánondi, ha pe lívro El conocimiento que lleva a vida Eterna orekóva vráilepe katu ojegastapáma. * Peteĩ día aporandu chupe ndostudiaséi jeýpa la Biblia ha haʼe oasepta. Péro upearã tekotevẽ vaʼekue ombohovái mokõi mbaʼe ijetuʼúva.

Kingsley oiko vaʼekue peteĩ lugár oñeñatendehápe umi ijedávare ha umi ndaikatúivare ojevale porã ijehe. Haʼéma haguéicha, Kingsley  nohenduporãi ha upe lugár oikohápe siémpre oĩ vaʼekue rruído, upévare hatã añeʼẽ vaʼerã chupe, asapukái lénto vaʼerã voi cherendu hag̃ua. Upéicha rupi, enterove oĩva upe lugárpe orerendupámi vaʼerã rostudia jave.

Kingsley michĩ mimínte ikatu vaʼekue olee ha ndaikatúi oaprende heta mbaʼe una véspe. Péro oaprende pyaʼeve hag̃ua, Kingsley siémpre ojeprepara porã vaʼekue ostudia hag̃ua. Haʼe oleémi heta vése pe puvlikasión rostudiátava ha ohekapáma voi umi téxto ivívliape, oĩva vráilepe, ha opensáma mbaʼéichapa ombohováita umi porandu. Kingsley ojeprepara porã rupi ostudia hag̃ua, pyaʼeterei oprogresa. Rostudia jave, haʼe oguapy yvýpe peteĩ alfombraʼi ári, ha ogustaiterei rupi chupe umi mbaʼe oaprendéva, hatã hatã voi okomenta. Tiémpo riremínte rostudiáma dos vése por semána ha dos óra rupi voi.

Kingsley ohoseterei vaʼekue rreunionhápe, péro ijetuʼu vaʼekue chupe ojapo hag̃ua upéva, pórke oikotevẽ ajúda oguapy hag̃ua isílla de rruédape, ojupi hag̃ua áutope ha oñepytyvõ vaʼerã chupe oike hag̃ua pe Salónpe. Péro kongregasiónpe enterovéva roñoturna roipytyvõ hag̃ua chupe ha vyʼápe rojapo upéva. Rreunionhápe, Kingsley okomenta ha oguapy voi pe parlánte yketére ikatu hag̃uáicha ohendu porã.

Heta tiémpo rostudia rire, Kingsley heʼi oñeanotasemaha pe Eskuéla Jaipurukuaa Hag̃ua la Bíbliape. Dos semána oreko mboyve ipárte, aporandu chupe oñensajámapa raʼe pe lektúra otokáva chupe, ha haʼe heʼi chéve: “Si ermáno, añensajáma 30 véserupi”. Afelisita chupe upévare. Upéi aporandu chupe ndaikatuichénepa ahendumi la ilektúra. Upémarõ haʼe oavri ivívlia oĩva vráilepe, opoko poko hese ha oñepyrũ olee. Upéi ahecha sapyʼa ndahaʼeiha la opokóva ohóvo pe óhare olee hag̃ua, ojapoháicha jepi umi oleéva vráilepe. Avía sído omemorisapaite raʼe pe lektúra otokáva chupe.

Avyʼaiterei ha che resay pororopa, ni ndaroviaséi la ahendúvo chupe. Upévare aporandu Kíngsleype mbaʼéichapa la 30 vésente oleéramo omemorisapaite umi téxto. Ha haʼe heʼi chéve: “No, ndahaʼéi ningo 30 vésente aleéva, síno 30 vése al día”. Mas de un mes, haʼe oguapy káda día yvýpe iñalfombraʼi ári ha olee heta vése umi téxto omemorisapa peve.

Upéi og̃uahẽma pe día ojapo hag̃ua ipárte Salónpe. Oleepa rire, umi ermáno ojepopetejoa ha oĩ voi hasẽva vyʼágui ohechávo mbaʼéichapa ivale. Peteĩ puvlikadóra odesidi vaʼekue ndojapovéi párte eskuélape ochuchupa rupi, ojerure oñeanota jey hag̃ua chupe. Ko ermána heʼi: “¡Kingsley ikatúramo ojapo, che avei ikatu!”.

Tres áño ostudia rire la Biblia, Kingsley oñemeʼẽ Jehovápe ha ojevautisa el 6 de septiembre de 2008. Haʼe omano el 13 de mayo de 2014. Ojevautisa guive, omano meve oservi Jehovápe ipyʼaite guive. Kingsley ojeroviaiterei vaʼekue pe múndo pyahúpe oservi porãvetaha chupe, oikuaágui upépe hesãi ha imbaretetaha (Is. 35:5, 6). [Péicha omombeʼu Paul McManus.]