JOHN oiko vaʼekue peteĩ puevloʼípe opytáva Gujarátpe (India). Áño 1960 mboyvemi John túagui oiko vaʼekue testígo de Jehová. Péro John, isy, iñermáno ha iñermanakuéra ikatóliko hatã vaʼekue, ha upévare oñeopone kuri itúa rrelihiónre.

Peteĩ jey, John túa omondose vaʼekue peteĩ sóvre iñamígope oĩva ikongregasiónpe, ha ojerure Jóhnpe ogueraha hag̃ua chupe. Upe pyharevépe, John oikytĩ vai ikuã oavrisérõ guare peteĩ vidón de láta. Upéicharõ jepe, haʼe ojapose la itúa heʼíva. Upémarõ olia ikuãre peteĩ trapoʼi, ha osẽ oho oraha la itúa sóvre.

Og̃uahẽvo itúa amígo rógape otopa hembirekórente, haʼéva avei Testígo. Ko kuñakarai ohechávo John oikytĩ hague ikuã, haʼe ojofrese oipytyvõ hag̃ua chupe. Ogueru peteĩ votikín de primeros auxilios, omopotĩ ha ovenda hag̃ua chupe la ijerída. Avei oprepara te, ha upe aja oñemongeta hikuái trankílo porã la Bíbliare.

John ningo ohecha mbaʼéichapa pe kuñakarai imbaʼeporãiterei hendive, ha okambiáma ohóvo la opensáva umi Testígore. Upéi oporandu pe kuñakaraípe mokõi mbaʼe. Haʼe oikuaase mbaʼérepa Testigokuéra ogueroviáva idiferénte la omboʼévagui pe iglésia katólika. Oporandu chupe Jesúspa haʼe Ñandejára ha avei oĩ porãpa oñeñemboʼe Maríape. Pe ermána ningo oaprende vaʼekue idióma gujarati, upévare ombohovái koʼã porandu John ñeʼẽtépe. Péicha ohechauka Jóhnpe mbaʼépa heʼi la Biblia, ha omeʼẽ chupe pe folléto “Estas buenas nuevas del reino”.

Upe rire John olee pe folléto ha ohechakuaa pe oleéva haʼeha pe añetegua. Upémarõ haʼe oho pe paʼi rendápe oporandu hag̃ua la mísma kósa. Pe paʼi katu ipochyeterei ha ohaʼã chupe peteĩ Bíbliape ha osapukái: “¿Oikóma piko ndehegui Satanás mbaʼe? Eréna chéve moõpa heʼi la Bíbliape Jesús ndahaʼeiha Ñandejára. Eréna mbaʼe pártepepa heʼi ndovaleiha jaadora Maríape, ¡erépy chéve!”. John ni ndogueroviaséi la oikóva. Upémarõ heʼi pe paʼípe: “Núnka mas ndaikemoʼãvéima peteĩ tupaópe”. Ha añetehápe haʼe núnka mas ndoikevéi.

John ostudia la Biblia Testigokuérandi, ojerovia pe añeteguáre ha oñepyrũ oservi Jehovápe. Ndahaʼéi voi haʼénte la ojapóva upéva, síno unos kuánto ihentekuéra oñepyrũ avei ostudia la Biblia. Koʼág̃a ningo John kuãre ojekuaáiti pe erída rendague, hiʼarive ohasáma 60 áño upéva oiko hague. Upéicharõ jepe, pe sikatrís omomanduʼa gueteri Jóhnpe mborayhúpe oñepytyvõrõ guare chupe, ha mbaʼéichapa upéva opoko vaʼekue hese oñepyrũ hag̃ua oservi Jehovápe (2 Cor. 6:4, 6).