LUZIA NINGO IKARẼ HETYMA ISKIÉRDA GOTYO. Haʼe imichĩrõ guare ojagarra chupe peteĩ mbaʼasy hérava poliomielitis, upe mbaʼasy ningo ikontahiosoiterei ha oataka pe ñande sistéma nervióso. Orekórõ guare 16 áño Luzia ombaʼapo peteĩ kuñakaraípe g̃uarã ha upe kuñakarai heʼi chupe: “Ñandejára ndekastiga pórke naneñeʼẽrendúi ha ndererrespetái nde sýpe ha upévare nekarẽ”. Tiémpo rire, Luzia imanduʼa gueteri upe mbaʼe omoñeñandu vaieterei hague chupe.

DÁMARIS OIKUAÁRÕ GUARE OREKOHA KÁNSER SEREVRÁL, itúa oporandu chupe: “¿Mbaʼéiko ejapo raʼe oiko hag̃ua nderehe péicha? Oimémante vaʼerã ejapo raʼe álgo ivaietereíva ha upévare Ñandejára ndekastiga”. Dámaris oñeñandu vaieterei upérõ.

Umi hénte ningo hetaiterei áñorema opensa umi mbaʼasy haʼeha peteĩ kastígo oúva Ñandejáragui. Peteĩ lívro heʼi Cristo oikoha tiémpoperupi oĩ hague hetaiterei persóna ogueroviáva hasyha “haʼe térã peteĩ ihénte opeka haguére ha upéva haʼeha peteĩ kastígo oúva Ñandejáragui” (Usos y costumbres de las tierras bíblicas). Peteĩ lívro heʼi heta síglo Jesús omano rire “oĩ hague persóna ogueroviáva Ñandejára ombohasyha la héntepe okastiga hag̃ua chupekuéra opeka haguére” (Medieval Medicine and the Plague). Upéicharõ, Európape omanórõ guare hetaiterei persóna peteĩ péste káusare síglo 14-pe, ¿okastigápa hína raʼe Ñandejára umi iñañávape? Térã heʼiháicha umi sientífiko, ¿peteĩ vaktéria káusarentepa ojagarrapa raʼe ko mbaʼasy la héntepe? Koʼág̃a ikatu oĩ oñeporandúva, ¿oipurúpa Ñandejára pe mbaʼasy ombosufri hag̃ua umi persóna opekávape? *

EPENSAMÍNA KO MBAʼÉRE: Oimérõ Ñandejára okastiga la héntepe ha ombohasy chupekuéra omerese rupi, ¿mbaʼére upéicharõ itaʼýra Jesús omonguera raʼe umi hasývape?, ¿ndohechaukamoʼãi piko upéva haʼe oñemoĩha Ñandejára hustísia kóntrape? (Mateo 4:23, 24). Jesús núnka ndojapomoʼãi mbaʼeve okontrea hag̃ua umi mbaʼe Ñandejára odesidíva. Haʼe heʼi vaʼekue: ‘Che akóinte ajapo umi mbaʼe haʼe oguerohorýva’, ha “ajapopaite pe Túva omanda hagueichaite chéve” (Juan 8:29; 14:31).

La Biblia heʼi voi Ñandejára Jehová ‘arakaʼeve naiñinhustoiha’ (Deuteronomio 32:4). Por ehémplo, ¿oitýta piko Ñandejára peteĩ avión ojuka hag̃ua hetaiterei héntepe okastigase haguérente peteĩ persónape? Haʼe arakaʼeve ndojapomoʼãi upéva. Peteĩ Ñandejára siérvo hérava Abrahán, oikuaa vaʼekue Ñandejára ihustoha ha upévare arakaʼeve nohundimoʼãiha umi ihústova umi iñañávandi. Haʼe heʼi Ñandejára “ni mbaʼevéicharõ” ndojapomoʼãiha upéva (Génesis 18:23, 25). La Biblia heʼi avei Ñandejára naiñañaiha térã ndojapomoʼãiha ivaíva (Job 34:10-12).

Ñande ningo ndahaʼéi jasufríva Ñandejára ñandekastiga rupi peteĩ pekádore. Jesús oexplika porãiterei vaʼekue ko téma idisipulokuérape otopárõ guare hikuái peteĩ kuimbaʼe onase vaʼekuére siégo. Idisipulokuéra oporandu chupe: “‘Mboʼehára, ¿máva piko opeka raʼe: ko kuimbaʼe térã ituvakuéra, ajeve onaséma siégo?’ Jesús ombohovái: ‘Ndahaʼéingo ko kuimbaʼe ni ituvakuéra opeka haguére haʼe onaséva siégo. Péicha ojehu chupe ojehecha hag̃ua mbaʼépa ikatu ojapo hese Ñandejára’” (Juan 9:1-3).

 Upe tiémpope la hénte opensa vaʼekue Ñandejára oporokastigaha, upévare Jesús disipulokuéra oñesorprendéne raʼe Jesús heʼírõ guare chupekuéra: “Ndahaʼéingo ko kuimbaʼe ni ituvakuéra opeka haguére haʼe onaséva siégo”. Péro Jesús ndahaʼéi omongueránteva pe kuimbaʼépe, síno ohechauka porã avei chupekuéra Ñandejára nombosufririha la héntepe oporokastiga hag̃ua (Juan 9:6, 7). Koʼã tiémpope, umi persóna orekóva mbaʼasy vai ikatu avei oñeñandu porãve oikuaávo umi mbaʼe ojehúva chupekuéra ndouiha Ñandejáragui.

Ñandejára Ñeʼẽ heʼi voi:

• “Avave ndaikatúigui ojapouka ivaíva Ñandejárape, ha haʼe nomoĩri avei ñane renondépe mbaʼeve ivaíva ñanetantea hag̃ua” (SANTIAGO 1:13). Upéva rangue umi mbaʼe vai koʼág̃a ombosufríva la héntepe, por ehémplo mbaʼasy ha ñemano koʼẽrõitéma opáta.

• Jesucristo “omonguera opavave hasývape” (MATEO 8:16). Ñandejára raʼy omonguerávo entéro persóna oúvape hendápe, ohechauka mbaʼépa ojapóta amo gotyove Ñandejára Rréino ko múndo kompletoitére.

• Ñandejára “omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma” (APOCALIPSIS 21:3-5).

¿Mbaʼérepa upéicharõ oĩ hetaite persóna oñembyasy ha osufríva? Areterei guivéma hetaiterei persóna oikuaase upéva. Oimérõ ndahaʼéi Ñandejára káusare la oiko umi mbaʼe vai, ¿máva káusare la jasufri? Umíva jahecháta pe artíkulo oúvape.