• Ñandejára voi oiporavóta chupe. “Che amoĩma che rréipe [...]. Ejerurénte chéve ha ameʼẽta ndéve ko yvy kompletoite, umi tetã ameʼẽta ndéve ne erensiarã” (Salmo 2:6, 8).

• Ou vaʼerã David familiarégui. “Peteĩ mitãraʼy onase ñandéve, peteĩ taʼýra oñemeʼẽ ñandéve [...]. Igoviérno siémpre okakuaáta, ha pe pyʼaguapy núnka ndopamoʼãi David trónope ha irréinope” (Isaías 9:6, 7).

• Onase vaʼerã Belénpe. “Belén [...] ndehegui oúta pe ogovernátava [...], pe goviérno og̃uahẽta ko yvy mombyryveha peve” (Miqueas 5:2, 4).

• Umi hénte omboyke ha ojuka vaʼerã chupe. “Ojedespresia chupe ha ñapensa haʼe ndovaleiha mbaʼeverã. [...] Chupe ojekutu ñande pekádore, oñembohasa asy chupe ñane rembiapo vaikuére” (Isaías 53:3, 5).

• Oñemoingove jey ha oñembotuicha vaʼerã chupe. “Nde ndacherejamoʼãi pe Sepultúrape. Nde nderehejamoʼãi pe iñeʼẽrendúva ipyʼaite guive ohecha pe yvykua. [...] Ne renondépe che aikóta vyʼápe opa árare, nde cheguereko rupi nde ykére” (Salmo 16:10, 11).

Peteĩ persóna rehe añoite oñekumplipaite entéro koʼã mbaʼe, ha upe persóna haʼe hína Jesús. Peteĩ ánhel heʼi vaʼekue voi isy Maríape: Ñandejára “omoĩta chupe Rréiramo itúa David haʼe haguéicha avei. [...] Ha Irréino núnka ndopamoʼãi” (Lucas 1:31-33).

Jesúsgui ndoikói vaʼekue peteĩ governánte oĩrõ guare ko yvy ape ári. Upéva rangue, Jesús haʼe Rréi Ñandejára Rréinope yvágape, ha ogovernáta yvyporakuérape upe guive. ¿Mbaʼérepa ikatu jaʼe Jesús haʼeha pe ñanegoverna porãvétava? Jahechamína mbaʼe mbaʼépa ojapo vaʼekue oĩrõ guare ko yvy ape ári.

•   Jesús ojepyʼapy vaʼekue umi héntere. Haʼe oipytyvõ vaʼekue opaichagua héntepe, tahaʼe kuña, kuimbaʼe, imitãva, ijedáva, iplátava, imboriahúva, térã ótro tetãygua (Mateo 9:36; Marcos 10:16). Peteĩ lepróso heʼírõ guare chupe: “Nde chemongueraséramo ikatu chemonguera”, Jesús oiporiahuverekoiterei pe kuimbaʼépe ha omonguera chupe (Marcos 1:40-42).

• Jesús omboʼe vaʼekue mbaʼépa jajapo vaʼerã Ñandejára ñandeguerohory hag̃ua. Haʼe heʼi vaʼekue: “Peẽ ndaikatúi peservi Ñandejárape ha avei peiko pláta rapykuéri”. Heʼi vaʼekue jatrata vaʼerãha ótrope ñande voi jaipotaháicha umi ótro ñandetrata. Avei ohechauka vaʼekue Ñandejárape g̃uarã iñimportanteha umi mbaʼe jajapóva, péro avei umi mbaʼe ñapensa ha ñañandúva. Upévare, haʼe ñandeguerohory hag̃ua, tekotevẽ ñaaprende ñakontrola koʼã mbaʼe (Mateo 5:28; 6:24; 7:12). Avei heʼi porã vaʼekue javyʼa hag̃ua jaikuaámante vaʼerãha mbaʼépa Ñandejára ohaʼarõ ñandehegui, ha jajapo upéva (Lucas 11:28).

• Jesús omboʼe vaʼekue mbaʼépa heʼise japorohayhuha. Umi mbaʼe haʼe heʼi ha ojapo vaʼekue opoko la hénte korasõre. La Biblia heʼi voi: “Umi hénte ijurujaipa opytávo ohendúvo mbaʼeichaitépa oporomboʼe. Pórke Jesús omboʼéva ou Ñandejáragui” (Mateo 7:28, 29). Haʼe heʼi vaʼekue: “Pehayhu pene enemigokuérape”. Ha ojejukárõ guare chupe, oĩ vaʼekue umi opartisipáva upévape ndoikuaáigui la ojapóva, upévare haʼe voi ojerure vaʼekue Itúape hesehapekuéra heʼívo: “Che Ru, eperdonána chupekuéra, haʼekuéra ningo ndoikuaái la ojapóva” (Mateo 5:44; Lucas 23:34).

Jesús haʼe pe ñanegoverna porãvétava, pórke ñanderayhu ha ñanepytyvõseterei. Péro, ¿arakaʼépa oñepyrũta ogoverna?