Impresionánte mbaʼeichaitépa oñehundi la pláta umi gérrape.

•   “Pe áño ohasa vaʼekuépe umi goviérno oĩva ko múndo tuichakuére ogasta 2.2 billón de dólar hetaiterei gerrahápe, primera ves ojegasta peichaite peve umi gérrare” (The Washington Post, 13 de febrero de 2024).

 La ojeperdéva umi gérra káusare ndahaʼéi plátante. Jahechamína peteĩ ehémplo: pe gérra oikóva Ucrániape.

•   Soldadokuéra. Áño 2022 guive koʼág̃a peve, umi expérto okalkula oĩha haimete 500.000 soldádo omanóva térã opytáva erído.

•   Hénte inosénte. Pe Naciones Unidas heʼi oĩha mas de 28.000 persóna inosénte omanóva térã opytáva erído. Ha peteĩ ikárgo yvatéva pe Naciones Unídaspe heʼi: “Ndaikatúi ñakontapa mboy persónapepa operhudika ha ombyaiete voi pe gérra”. a

 Jahechávo mbaʼeichaitépa la hénte osufri pe gérra ha umi violénsia káusare, jaʼekuaa ndahaʼeiha pláta añónte la ojeperdéva.

•   114 millón de persóna oheja hóga pe gérra ha umi violénsia káusare, upéva oiko septiembre de 2023 guive ko múndo tuichakuére.

•   783 millón de persóna ndorekói mbaʼevete hoʼu vaʼerã. “Umi ñorairõ káusare prinsipálmente oĩ heta ñembyahýi, pórke 70 por ciento umi persóna ndorekóiva mbaʼeve hoʼu vaʼerã oiko umi lugár oikohápe gérra ha oĩháme heta violénsia” (Programa Mundial de Alimentos).

 ¿Opánepa pe gérra? ¿Jaikónepa algún día pyʼaguapýpe? ¿Og̃uahẽnepa pe día ndaiporimoʼãveimahápe imboriahúva? ¿Ikatúnepa algún día enterovéva jahupyty la jaʼumi vaʼerã ha ndofaltái ñandéve mbaʼeve? ¿Mbaʼépa heʼi la Biblia?

 La Bíbliape oñeñeʼẽ peteĩ kavaju ariguáre, orrepresentáva umi gérra oikóvape ko múndo tuichakuére.

•   “Ahecha osẽha ótro kavaju. Peteĩ kavaju pytãitéva ha pe ohóva hiʼári orresivi peteĩ espáda puku ha autorida oipeʼa hag̃ua pe pyʼaguapy ko yvy ape árigui, péicha umi hénte ojojuka hag̃ua” (Apocalipsis 6:4).

 Ko kavaju arigua rapykuéri oĩve mokõi, peteĩva orrepresenta pe ñembyahýi oĩva ko múndo tuichakuére ha pe ótro katu orrepresenta ñemano umi mbaʼasy térã ótra kósa káusare (Apocalipsis 6:5-8). Reikuaasevéramo ko profesíagui ha mbaʼérepa ñaimekuaa segúro upéva oñekumpliha koʼág̃arupi, ikatu relee pe artíkulo hérava “¿Mbaʼépa osignifika umi kavaju arigua?”.

 Koʼẽrõite g̃uarãma umi mbaʼe oĩva ko múndope ndojepurumoʼãvéi umi gérrape, péro upéva ndoikomoʼãi umi ser umáno oñehaʼã rupi ojapo álgo iporãva. La Biblia heʼi:

•   “Ndaiporimoʼãvéima ni peteĩ gérra ko yvy ape ári, pórke Ñandejára omopẽ umi flécha ha umi lánsa” (Salmo 46:9).

•   Ñandejára osolusionáta umi mbaʼe vai oikóva pe gérra káusare. “Ñandejára omokãmbaitéta umi hénte resay, ha ndaiporimoʼãvéima omanóva, oñelamentáva, hasẽva ni hasýva. Umi mbaʼe oiko vaʼekue yma opáma” (Apocalipsis 21:4).

•   Ñandejára ojaseguráta enterovéva jaiko hag̃ua pyʼaguapýpe. “Che puévlo oikóta peteĩ lugár oĩháme pyʼaguapy, hogakuéra isegúro porãta ha umi lugárpe ikatúta oĩ trankílo ha opytuʼu hikuái” (Isaías 32:18).

 Asegún la Biblia, umi gérra ha hetave mbaʼe vai oikóva koʼág̃arupi ohechauka koʼẽrõitéma jaikotaha pyʼaguapýpe.

 ¿Mbaʼéichapa Ñandejára oguerúta pyʼaguapy koʼẽrõite? Haʼe ojapóta upéva Irréino rupive, térã igoviérno oĩva yvágape rupive (Mateo 6:10). Reikuaasevéramo mbaʼépa hína pe Rréino ha mbaʼéichapa upéva ikatu nepytyvõ, ehecha ko vidéo mbykymi hérava ¿Mbaʼépa hína Ñandejára Rréino?