Nnojotsü mojuin asaa yootchon yootshi. Saashin tü Bibliakat nüsülajala wamüin Maleiwa tü wiinokot süpüla talatüinjatüin waaʼin sutuma (Salmo 104:14, 15; Eclesiastés 3:​13; 9:7). Jee süküjaleeinya wamüin tü Bibliakat eein süpüla nipinasein shia wanee wayuu eekai ayuulin (1 Timoteo 5:​23).

 Asüshi wiino Jesús wanaa sümaa yaajachin nia saaʼu tü Mmakat (Mateo 26:29; Lucas 7:​34, TNM). Jamüshijaʼa nia wanaa sümaa nuunejaanüin sünain wanee miʼiraa shikiira kaʼwayuusee, wiinojaasü nutuma tü wüinkat süpüla süsünüinjatüin shikiira tia kaʼwayuuseekat (Juan 2:​1-​10).

Tü mojukat anainjee tü asawaakat

 Mayaainjeʼe süküjain tü Bibliakat tü kasa anasü eekat sünainjee tü wiinokot, süküjaleeinya wamüin mojuin sülataleere tü asüüshikat otta tü epeʼruwaakat. Nüsüinjachire wanee anoujashi, nnojoluinjatü alanaʼaleein nutuma (1 Timoteo 3:8; Tito 2:​2, 3). Süküjain wamüin tü Bibliakat jamüin mojuka sülanaʼaleere tü asüüshikat:

•   Nnojotsü niyaawatüin aaʼu wanee wayuu tü naaʼinrakat sutuma otta maaʼin aaʼinchi nia sutuma (Proverbios 23:29-​35). Nipeʼrüle wanee wayuu nnojoishi oonooin sümaa tü pütchi makat mayaa: «jaapajiraa jümata jukuwaʼipa nümüin Maleiwa süpüla jiʼyataain nümüin sümaa jütüjaain saaʼu anale jee mojule wanee kasa» (Roma 12:1, TNM).

•   Maapülin aaʼinchi wanee wayuu nipeʼrüle otta isasü nüchiki naaʼinrüin tü kasa anasükat (Oseas 4:​11; Éfeso 5:​18).

•   Eesü süpüla nnojoluin kasain nümaʼanain wanee wayuu sutuma otta ayuulin nia (Proverbios 23:21, 31, 32).

•   Nülerajüin Maleiwa tü epeʼruwaakat otta sülanaʼaleere tü asüüshikat (Proverbios 23:20; Galacia 5:​19-​21).

¿Jamüsü süpüla watüjaain saaʼu sülanaʼaleere tü asüüshikat?

 Shia müleka nulookojoole wanee wayuu nooʼomüin na waneinnua jee pasiruwaale nia. Tü epeʼruwaakat saashin tü Bibliakat, nnojotsü shiain neʼe wanaa sümaa palasütüin neʼe wanee wayuu. Saashin tü Bibliakat epeʼtshi wanee wayuu müleka nnojorüle nütüjaain saaʼu jalapünaainjachin nia, liʼyantüle nia, naaʼayajiraale sümaa wayuu otta matüjaajule saaʼu nünüiki (Job 12:25; Salmo 107:27; Proverbios 23:29, 30, 33). Sülanaʼaleere nüsüin wanee wayuu sümaa nnojolin epeʼrüin nia, nnojoleerü niyaawatüin saaʼu nukuwaʼipa jee eʼreechi nia kasa mojusü sünainjee (Lucas 21:34, 35).

¿Jouja nnojolinjachin nüsüin wanee wayuu?

 Saashin tü Bibliakat, nnojolinjachi asüin wanee wayuu müleka:

•   Seemiajaale nunoula wanee wayuu sünainjee tü naaʼinrakat (Roma 14:21).

•   Süpülajünüle asaa yootshi suluʼu tü mma kepiakalü aluʼu nia (Roma 13:1).

•   Isale nüchiki nüchecherüin naaʼin suulia asaa yootshi. Chi eekai nüsülin maʼin, nüchajaainjatü sukuwaʼipa süpüla nnojolinjachin nüsüin (Mateo 5:​29, 30).