PÜTCHI SÜMAIWAJATÜ ANAKA WAPÜLA MAAʼULU YAA
Moto paaʼin saainjala wayuu
PÜTCHI SULUʼUJEEJATÜ TÜ WIWÜLIAKAT: «Jaaʼinra tü anasükat shiʼipajee eekai shiʼrülüin wayumüin jümüin, sümaa motüin jaaʼin saainjala maa aka naaʼin chi Senyotkai motüin naaʼin jaainjala» (Colosas 3:13).
¿Jamaluʼulu tia? Saashin tü Wiwüliakat, tü kaainjalaakat müsü aka saaʼin nujuyaala wanee wayuu, shiasaʼa nülatirüle sooʼopünaa naaʼin wanee wayuu tü aainjünakat nümüin müsü suwalaajünakai saaʼin nümüin tü ojuyaajünakat nuulia (Lucas 11:4, TNM). Saashin wanee karaloukta, tü pütchikat «motüin jaaʼin saainjala» makat, sünainjeejatü wanee pütchi griego, «nuuʼulaain wanee wayuu tü ojuyaajünakat nuulia», maluʼulu. Wanaa sümaa motuin waaʼin tü kasa mojusü naainjakat wanee wayuu wamüin, mojuyaalaaichipa nia woulia. Mayaapejeʼe alin wamüin tü aainjünakat wamüin, nnojotsü üttakuʼu müin waaʼin otta nnojoishii waya jashichikuʼu müin.
¿Jalouijeetche wamüin pütchikat tüü? Nnojotsü lotuin sukuwaʼipa süpüshuaʼa tü kasa waaʼinrakat, süka jamüin, waleʼeruʼuin tü kaainjalaakat (Roma 3:23). Müsüjeseʼe anain motule waaʼin saainjala wayuu wamüin. Eejeeria tü kaʼi choʼujaajeetkalü oʼu wamüin motuin saaʼin wayuu tü waainjalakat. Aneerü wakuwaʼipa motowaire waaʼin saainjala wayuu wamüin. ¿Suluʼu jamüin?
Nnojorüle motuin waaʼin tü naainjalakat wanee wayuu, jashichikuʼu meena waya, üttakuʼu meerü waaʼin nünain. Shiasaʼa sünainjee tia, nnojoleena waya talatüin. Akaʼaya waya, eeshii süpüla ayuulin waya sutuma tia. Anuu nünüiki wanee tottoot, Yoichi Chida nünülia jee müshia Andrew Steptoe wanee ekirajüi sünain Psicología: «Ekirajaana anainrü jekenainka eein süpüla saapüin cardiopatía coronaria nümüin wanee wayuu üttakuʼu sümüle naaʼin» (Journal of the American College of Cardiology).
Jülüja paaʼin jooluʼu tü kasa anasü eekat sutuma motuin waaʼin saainjala wayuu, nnojotsü eein mojujirawaa otta paaʼinwashii waya. Waaʼinrüle tia, nieechi washataka akuwaʼipa Maleiwa. Jamüshijaʼa nia, motusü naaʼin naainjala chi wayuu eekai niyaawajaain suulia tü kasa mojusü naaʼinrakat. Keeʼireesü naaʼin Maleiwa washatüin nukuwaʼipa (Marcos 11:25; Éfeso 4:32; 5:1).
