Anuu nukuwaʼipa chi eekai nütüjain achecheraa naaʼin:

• nnojoishi ashapajaain shiiʼiree eemaatüin nümaʼana wanee kasa keeʼireeka naaʼin

• niyaawatüin saaʼu nukuwaʼipa jee nünüiki

• nikeraajüin wanee kasa naaʼinraka jaʼitairü mamalain shia nümüin

• kapülasü naaʼin nakuwaʼipa na waneinnua suulialeʼeya nukuwaʼipa

Chi jintüi atüjakai achecheraa naaʼin, atüjashi ayoutaa wanee kasa mojusü jaʼitairü müin anayaakai maʼin saaʼin. Eekajasaʼa na machecherüinkana naaʼin, naata sümüin nakuwaʼipa, eeshii eekai...

• ... katkaaraliin

• ... mojuwaliin naaʼin

• ... akamüjaliin sikariia, yüi otta asüliishii naya

• ... nekaʼayatüin kasa eekai eein

Sutuma shikirajaanüin achiirua nakuwaʼipa na tepichi atüjakana achecheraa naaʼin, atüjaana aaʼu nnojoleenain ayuuleʼein miyoʼuyuupa naya, atüjeena eisattaa nanneetse otta kojuteerü namüin tü naluwataakalü anain na sülaülashiikana mma. Sünainjee tia, müsü sünüiki Angela Duckworth, wanee ekirajüt suluʼu Universidad de Pensilvania: «Nnojotsü mojuin pütüjale maʼin achecheraa paaʼin».

«Nnojo» pümüle namüin, nnojo piiʼiratüin pünüiki

TÜ SÜMAKAT TÜ WIWÜLIAKAT: «‹Aa› meeshi neʼe pia. Je müleka nnojolüinjatüle paaʼinrüin shia, ‹Nnojo› meeshi neʼe pia» (Mateo 5:37).

Eeshii tepichi eekai nayüülajaain süpüla saapünüin namüin tü keeʼireekat naaʼin jaʼitaichi «nnojo» nümatüjülin chi nashikai jee tü neikat namüin. Eeshii nayüülajaale suʼupala wayuu. Müleka saapünüle namüin tü keeʼireekat naaʼin sümaa «nnojo» namünatüjülin paala, ayüülajaweena waneepia süpüla saapünüin namüin tü keeʼireekat naaʼin.

«Nnojo» nümüle wanee wayuu nümüin nüchon sümaa nnojoluin niiʼiratüin nünüiki, atüjeechi chi nüchonkai sükajee tia. Niyaawateerü aaʼu nnojoluin süpüla eein nümaʼana süpüshuaʼa tü keeʼireekat naaʼin. Anuu nünüiki wanee psicólogo süchiki tia, David Walsh nünülia: «Naya talataleeka na wayuu ayaawatakana saaʼu tia. Müsüjeseʼe nnojoluin anain müleka  wekirajüle na wachonniikana eein süpüla namaʼanain süpüshuaʼa tü keeʼireekat naaʼin». *

Nnojorüle paapamaatüin süpüshuaʼa tü keeʼireekat naaʼin chi püchonkai otta «nnojo» pümüle nümüin, atüjeechi nia süpüleerua «nnojo» nümüinjachin suuʼulakünüle naaʼin süpüla nuuʼulaküin tü yüikat, süpüla nükamüjüin, süpüla nümaʼüjiraain nukuwaʼipa otta süpüla naaʼinrüin waneirua kasa mojeetka atuma nukuwaʼipa.

Pikiraja püchonnii süpüla natüjaain saaʼu eein süpüla anain jee mojuin nakuwaʼipa sünainjee tü naaʼinrakat

TÜ SÜMAKAT TÜ WIWÜLIAKAT: «Shieerü nütpajaka wanee wayuu süchon tü nüpünajakat» (Galacia 6:7, TNM).

Nütüjaainjatü aaʼu püchon mojeerüin nukuwaʼipa isale nüchiki nüchecherüin naaʼin. Jamüshijaʼa naashichijaamaatüle sutuma nnojoluin anashiin nümüin wanee kasa, nnojoleerü jaralüin aleeweein nümaa. Naapajüle sünüiki wayuu sümaa nnojoluin nüsounajaain, aleeweena na wayuukana nümaa. Pükaalinja püchon süpüla niyaawatüinjatüin saaʼu choʼujaain nüchecherüinjatüin naaʼin süpüla anainjatüin nukuwaʼipa.

Pükaalinja naya süpüla natüjaain saaʼu kasain alanaʼaleeinjatüin ojutü namüin

TÜ SÜMAKAT TÜ WIWÜLIAKAT: «Shia jaaʼinmaainjatka maʼin tü kasa alanaʼaleekat suluʼu anain» (Filipos 1:10, TNM).

Nüchecherüle naaʼin wanee wayuu, nnojotsü eejüin neʼe naaʼin suulia aaʼinraa kasa mojusü, naaʼinrüinjatü waneirua kasa jaʼitairü mamalain shia nümüin. Nütüjaainjatü aaʼu chi püchonkai jaralüinjatüin tü kasa alanaʼaleeinjatkat ojutü nümüin otta tü kasa naaʼinrajatkat palajana. Jamüshijaʼa nia, naaʼinrüinjatü palajana tü tareea eʼitaanakat nüpüla koleejialuʼu süpülapünaa nuʼunüin sünain ashaitaa.

Piʼitaa napüleerua tü nakuwaʼipainjatkat

TÜ SÜMAKAT TÜ WIWÜLIAKAT: «Teʼitaain tü sukuwaʼipainjatkat süpüla jüshatajatüin shia, anakajaʼa jüshatüle tü takuwaʼipakat jümüin» (Juan 13:15, TNM).

Jülüjasü naaʼin chi püchonkai tü paaʼinrakat mojushiire wanee kasa pümüin. Müsüjeseʼe anain püchecherüle paaʼin süpüla niʼrüinjatüin chi püchonkai shiain anain tia. Jülüjaa paaʼin tüü: mojule wanee kasa nutuma püchon, ¿aashichijaamaatüshiche pia nümüin? ¿Püchecherataapa paaʼin suulia jashiee?