Süpüla aleewainjanain waya nümaa wanee wayuu, weʼraajüinjatü nukuwaʼipa. Akaʼaya aleeweere waya nümaa Maleiwa weʼraajüinjatü nukuwaʼipa. Pienchisüpejeʼe maʼin tü nukuwaʼipa alanaʼaleekat maʼin: pülashi maʼin nia, kekiishi maʼin nia, lotusü maʼin nukuwaʼipa otta aipürai maʼin nia.

«¡Senyotkalee Jeʼwaa, pia Miyoʼushikai saaʼu kasa süpüshuaʼa! Pia kakumajalakai tü sirumatuʼukat otta tü mmakat süka pülashin maʼin pia» (JEREMÍAS 32:17).

Wayaawata aaʼu pülashin maʼin Maleiwa sünainjee tü kasa nukumajalakat. Jamüshiijaʼa wojuʼitüle sümaa jaaʼin maʼin chi Kaʼikai, ishasü wata sutuma tü naaʼayulakat. Sünainjee jaʼin chi Kaʼikai, watüjaa aaʼu pülashaatain maʼin chi Maleiwakai. ¿Jaʼishiche maʼin chi Kaʼikai? Jülüjataa paaʼin jaʼishaatain maʼin wanee wüin poolotule maʼin shia. Shialekajaʼa pasanain nünain chi Kaʼikai, jaʼireesia maʼin suulialeʼeya tia wüinkat. Tü naaʼayula ojuʼitawaikat nünainjee, müsü aka saaʼin sütsüin watta saalii wonpa.

Nnojoipejeʼe miyoʼuin maʼin chi Kaʼikai. Watta saalii jolotsü miyoʼuyuuka maʼin nuulia. Naashin na cientiificokana, eesü wanee jolotsü miyoʼuka maʼin nuulia, UY Scuti sünülia. Jamüsüjaʼa shiale eʼitaanüin UY Scuti niiʼiraka chi Kaʼikai, suukeerü achiki tü Mmakat otta alanaʼaleejeeria shia süchikijee Júpiter. Sünainjee tüü, wayaawata aaʼu jamüin nüküjaka Jeremías süchiki niain Jeʼwaa kakumajalain tü sirumatuʼukat otta tü Mmakat. Nukumajala Jeʼwaa kasaka süpüshuaʼa süka pülashin maʼin nia.

¿Kasa anasü weʼraka sünainjee pülashin maʼin Maleiwa? Epijaashii waya sünainjee süpüshuaʼa tü kasa nukumajalakat chi Maleiwakai, maʼaka saaʼin nünainjee chi Kaʼikai, tü pünajütkat, tü joutaikat, tü wüinkat jee waneirua kasa. Nükaalinjapejeʼe waya chi Maleiwakai waneʼewai wakua sükajee  tü nüpülainkat. ¿Jamüsü sukuwaʼipa tia nutuma? Wanaa sümaa yaajachin Jesuu yaa mmapaʼa, aaʼinrüshi nia kasa pülasü nutuma Maleiwa. Anuu tü sümakat tü Wiwüliakat süchiki tia: «Tü wayuu eekai moʼuin, koʼusü. Tü eekai masaʼain, kasaʼasü. Tü eekai sajaʼttüin süta, ashatüsü tü sütakat. Tü eekai macheʼein, kacheʼesü. Tü eekai ouktüin, osoʼiraasü saaʼin» (Mateo 11:5). ¿Kasa nükaalinjaka anain waya Jeʼwaa maaʼulu yaa? Müsü tü Wiwüliakat: «Naapüin sütsüin naaʼin chi wayuu mapüsakai» jee müsü shiaʼayaa: «Na aʼatapajakana tü naaʼinrajatkat Jeʼwaa, katsüinjeerü naaʼin nutuma» (Isaías 40:29, 31). Yalayaleerü waaʼin nutuma Maleiwa süpüla wachecherüin waaʼin soʼunnaa tü kasa mojusü oʼotokat wamüin (2 Corinto 4:7). Sünainjee pütüjaaitpain saaʼu nükaalinjain pia Maleiwa süka tü nüpülainkat, ¿arütkaajeeiche pia nünainmüin?

«¡Jeʼwaakalee, watta maʼin saalii tü kasa pukumajakat! Pukumajüin shia süka kekiin maʼin pia» (SALMO 104:24).

Weʼraajüle maʼin tü kasa nukumajakat Jeʼwaa, wayaawateerü aaʼu kekiin maʼin nia. Eeshii waneinnua wayuu, ekirajaakana sünain sukuwaʼipa tü kasa nukumajakat Jeʼwaa, nashatüin shia sünain tü kasa nakumajakat, biomimética münüsü tia. Wanee kasa nashataka sünainjee tü nukumajakat Jeʼwaa, shia tü soʼukot cámara otta tü katünasükat.

Atüjashaatashi maʼin chi Maleiwakai, jamüshiijaʼa waya, anashaatasü maʼin wakumajia nutuma. Jamüshijaʼa wanee joʼuu nukumajaaiwaʼaya, nüshashi palajana. Süchikijee sukumajaayaa sümaka tü niʼirukukat, tü nüsülakat, tü niipüsekat otta waneirua kasa eeinjatkat nünain. Mekietsat kashi süchikijee tia, ojuʼitüshi wanee joʼuu sümaa anain maʼin nia. Sünainjee tia, watta naalii na wayuu wanaawakana aaʼin nümaa wanee wayuu ashajakai tü Wiwüliakat, anuu nünüiki chia wayuukai: «Taʼwaajeechi pia süka anain maʼin takumajia putuma» (Salmo 139:14).

¿Kasa anasü weʼraka sünainjee kekiin maʼin Maleiwa? Nütüjaa aaʼu chi Maleiwakai tü kasa choʼujaakat wamüin süpüla talatüinjatüin waaʼin, jama nukumajalain waya. Sutuma kekiin maʼin nia, nüküjain wamüin sükajee tü Wiwüliakat tü waaʼinrajatkat süpüla anainjatüin wakuwaʼipa. Nüküjain wamüin motuinjatüin waaʼin naainjala na waneinnua (Colosas 3:13). Anasü tia, ¿aashimüin? Jamüsüjaʼa naashin na tottootkana, motule naaʼin wanee wayuu naainjala na waneinnua, nnojotsü jiwaʼatüin naaʼin nutunkapa otta nnojotsü kakuain naaʼin. Nnojotsü mojuin maʼin naaʼin jee nnojoishi ayuulin nia. Chi Maleiwakai müshi aka naaʼin wanee waʼaleewain kekiikai maʼin, kapülakai aaʼin waya otta aküjakai wamüin tü waaʼinrajatkat süpüla anainjatüin wakuwaʼipa (2 Timoteo 3:16, 17). ¿Aleeweeshiche pia nümaa wanee wayuu eekai müin nukuwaʼipa?

«Anasü nümüin Jeʼwaa lotule sukuwaʼipa wanee kasa» (SALMO 37:28).

Lotusü sukuwaʼipa tü kasa naaʼinrakat Maleiwa, müsüjeseʼe nnojoluin mojuin nutuma sukuwaʼipa wanee kasa (Job 34:10). Nnojotsü müliain maʼin saaʼin wayuu nutuma saaʼujee saainjala,  maʼaka nüküjain shia chi ashajakai Salmos, müshi nia: «Loteerü putuma sukuwaʼipa tü paaʼinrajatkat süsalainjatpa saainjala wayuu putuma» (Salmo 67:4). Sükajee nütüjaain saaʼu tü eekat suluʼu waaʼin, nütüjaa aaʼu jamüin waaʼinraka wanee kasa, nnojoishii waya süsalain waainjala nutuma sünainjee neʼe tü kasa niʼrakat jee tü naapakat wachiki (1 Samuel 16:7). Niʼrüin Jeʼwaa süpüshuaʼa tü kasa mojusü aainjünakat sümüin wayuu jee nüküjain najaʼlajeʼennüinjanain soʼu palit kaʼi na mojulaashiikana (Proverbios 2:22).

Nnojotsü maluʼuluin tia, talatüin naaʼin chi Maleiwakai müliale wayuu nutuma saalinjee saainjala. Amülialaasü naaʼin saalin wayuu eekai müliain. Saashin tü Wiwüliakat «amüliajüi wayuu Jeʼwaa», jaʼitakajeʼe wayuu eekai mojulaain, amülialaasü naaʼin saalin müleka shiyaawajaale suulia saainjala. ¿Aashin lotuin maʼin nukuwaʼipa chi Maleiwakai? (Salmo 103:8; 2 Pedro 3:9).

¿Kasa anasü weʼraka sünainjee lotuin nukuwaʼipa Maleiwa? Anuu nünüiki chi aluwataaushikai Pedro: «Shiimain nnojolüin koʼuin nükuaippa Maleiwakai sümüin wayuu. Wayuu eekai eein suluʼu mmakat süpüshua, kojutkat atüma Maleiwakai otta aaʼinrakat tü anasükat, nnojoleerü nüjütaain amaa shia» (Aluwataaushikana 10:34, 35). Anasü wakuwaʼipa sutuma lotuin nukuwaʼipa Maleiwa otta nnojoluin koʼuin nukuwaʼipa sümüin wayuu. Anashiisü nümüin suʼwaajüin nia wayuu maʼleekalia jaʼitasü sütüjain karaloʼuta, washirüin shia, maʼletsein shia, naatain shiʼiruku jee suumain.

Nücheka achikit Maleiwa wayaawatüin saaʼu aneerüin wakuwaʼipa sünainjee lotuin nukuwaʼipa, müshiijeseʼe nukumajüin waya süpüla wayaawatüin saaʼu anale jee mojule wanee kasa. Saashin tü Wiwüliakat suluʼusü waaʼin tü wayaawatakalü anainjee anale jee mojule wanee kasa (Roma 2:14, 15). ¿Jamüsü aneetka wakuwaʼipa sünainjee  tia? Wayaawatüle saaʼu mojuin wanee kasa, nnojoleerü waaʼinrüin shia suulia mojujain wakuwaʼipa sutuma. Shiasaʼa waaʼinrüle wanee kasa eekai mojuin, ayaawajaajeena waya suulia otta nnojoleerü waaʼinrüin shia piantua. Sünainjee lotuin nukuwaʼipa Maleiwa, anasü wakuwaʼipa otta aleewashii waya nümaa.

«Maa aka alin waya nüpüla» (1 JUAN 4:8).

Pülashi maʼin Maleiwa, kekiishi maʼin nia otta lotusü maʼin nukuwaʼipa, alanaʼalepejeʼe suluʼu aipüralin maʼin nia saashin tü Wiwüliakat. ¿Jamüshi nülanaʼaleeka suluʼu aipüralin nia? Mayaainjeʼe naainjain wanee kasa sükajee pülashin nia, anasü saainjia nutuma sükajee lotuin nukuwaʼipa otta kekiin maʼin nia, naainjapejeʼe tia sükajee aipüralin maʼin nia.

Mayaapejeʼe nnojoluin choʼujaain wayuu nümüin Jeʼwaa jee nnojoluin choʼujaain nümüin wanee kasa, nukumajüin na wayuukana yaa mmapaʼa jee na aapieekana chaa iipünaa sükajee aipüralin nia. Nukumajüin naya süpüla alinjanain naya nüpüla jee süpüla naaʼinmajüinjanain naya. Nukumajüin tü Mmakat süpüla kepiainjanain na wayuukana suluʼu. Ayatayülia alin nüpüla wayuu, müsüjeseʼe «nüntirüin nuwarala chi kaʼikai je nüʼitirüin tü juyakat sünainmüin wayuu eekai kaainjaralin je eekai anamiain» (Mateo 5:45).

«Aipürai maʼin Jeʼwaa jee amülialaasü naaʼin saalinjee wayuu» (Santiago 5:11, TNM). Aishii maʼin nüpüla na wayuu arütkaakana nünainmüin süpüla neʼraajüin nia. Niʼraajüin Maleiwa naya wayuukana waneʼewai nakua. Saashin tü Wiwüliakat, nnojoishi «wattain Maleiwakai woulia waneʼewai wakua» (Aluwataaushikana 17:27).

¿Kasa anasü weʼraka sünainjee aipüralin Maleiwa? Watta saalii tü kasa anasü weʼrakat sünainjee alin waya nüpüla Maleiwa, jamüsüjaʼa weʼrüle niishojooin chi Kaʼikai, waapüin nüsira wanee joʼuu jee weʼrüin waalin napüla na wapüshikana, talatüsü waaʼin sutuma mayaapejeʼe nnojoluin choʼujaain maʼin wamüin tia.

Wane kasa anasü weʼraka sünainjee aipüralin Maleiwa shia eein süpüla woʼuraajüin nümüin. Müsü tü Wiwüliakat: «Nnojo jüshapataain aaʼin sooʼopünaa wane kasa. Shia jaaʼinra achuntaa nümüin Maleiwa sooʼopünaa kasa süpüshua. Jüküja nümüin tü shapaakat atüma jaaʼin. Otta nnojo motüin jaaʼin aapaa analuʼut nümüin saaʼu tü anasü naaʼinrakat jümüin» (Filipos 4:6, 7).

Sünain pütchikat tüü, waashajaa achikirü tü akuwaʼipaa alanaʼaleekat maʼin sünain nukuwaʼipa Maleiwa: pülashi maʼin nia, kekiishi maʼin nia, lotusü maʼin nukuwaʼipa otta aipürai maʼin nia. Paashajeʼera tü wanee pütchikat süpüla pütüjaain saaʼu tü naaʼinrakat Maleiwa püpüleerua jee tü naaʼinrajatkat mapeena.