«Soʼu jintuluin taya niʼyaajüin jee mojusü nünüiki tamüin chi tawalakai. Shiasaʼa kaʼwayuusepa taya aainjünüsü kasa mojusü tamüin nutuma chi taʼüikai sümaa tü taʼütkat, müliasü taya natuma. Jülüjasü taaʼin toʼuniraweein taaʼin sutuma tü kasa alataka tamüin» (Madhu, a India).

 «Sainküin mmakat aainjünüsü kasa mojusü namüin na jieyuukana», saashin Organización Mundial de la Salud. Naʼakajee apünüinshii jieyuu eeka sainküin mmakat eesü wanee ataüjaanüitpakat jee aainjünüitpaka amüin kasa mojusü.

 Sutaüjaanüle wanee wayuu jee saainjünüle kasa mojusü sümüin mmoleerü shia seema sülatüin tia süchikuaʼaya sümüin. Sutuma sülatüin sümüin tia eesüjaʼa jülüjale saaʼin nnojoluin kojutuin amüinwaa na jieyuukana natuma na wayuukana. ¿Kapülasüche naaʼin Maleiwa nakuwaʼipa na jieyuukana?

 Wetsiikulo: «Eeshi wayuu toolo ooʼulaka wayuu jierü nuwalaʼata nutuma [Maleiwa]» (Génesis 1:27).

 Jamaluʼuluin shia: Nukumajüin Maleiwa wayuu toolo jee wayuu jierü otta kojutushii naya nümüin. Anasü nümüin Maleiwa kojutuinjatüin nümüin chi wayuu kaʼwayuusekai tü nuʼwayuusekat maʼaka alin nia nüpülajiraa (Éfeso 5:33; Colosas 3:19). Jülüjasü naaʼin Maleiwa nakuwaʼipa jieyuukana.

 «Soʼu jintuluin taya ataüjaanüsü taya natuma waneinnua wayuu kasayuu tanain. Shiasaʼa 17 touyase nüpüleerua aaʼinrü taya chi talaamainkai süpüla tainkaain nümaa. Nnojorüle taainjain tia nujutuinjatü taya suulia tü aʼyatawaakat naashin. Miyoʼupa taya mojutusat taya nümüin chi tashikai, nümüin chi taʼwayuusekai jee namüin na wayuu kepiakana taʼütpaʼa. Shiasaʼa tekirajaapa sünain tü Bibliakat tayaawata aaʼu kojutuin nümüin Jehová b na jieyuukana müsüjeseʼe tatüjaain saaʼu alin taya nüpüla jee kojutuin taya nümüin». (Maria, Argentina).

 Wetsiikulo: «Eein chi wayuu aikai maʼin apüla naʼaleewain nuulialeʼeya wanee nuwala» (Proverbios 18:24).

 Jamaluʼuluin shia: Nükaalinjeerü pia wanee paʼaleewain. Anale saaʼin pümüin tia, püküja nümüin wanee wayuu anaka amaa paaʼin tü kasa alataka pümüin.

 «Soʼunnaa 20 juya nnojotsü jaralüin taküjain amüin tataujaanüin sutuma tia nnojotsü talatüin taaʼin, shapaasü taaʼin waneepia otta mojusü taaʼin. Shiasaʼa taküjapa shia sümüin wanee wayuu kapülaka aaʼin takuwaʼipa jamaamasü taaʼin» (Elif, Turquía).

 Wetsiikulo: «Jüpüta najapuluʼu Maleiwa süpüshuaʼa tü kasa shapaakalü atuma jaaʼin, jama jülüjain maʼin jia naaʼin» (1 Pedro 5:7).

 Jamaluʼuluin shia: Naapajüin Maleiwa pünüiki puʼuraajapa (Salmos 55:22; 65:2) Süka jülüjain pia naaʼin, nükaalinjeerü pia süpüla piyaawatüin saaʼu kojutuin maʼin pia nümüin.

 «Süka tekirajaain nüchiki Jehová sükajee tü Bibliakat anasü taaʼin, nnojoluitpa mojuin taaʼin sutuma tü alatakat tamüin. Oʼuraajüsü taya nümüin Jehová süka niain ayaawatüin saaʼu jamüin maʼin taaʼin» (Ana, Belice).

 Wetsiikulo: «Jehovákalee, [...]. Punouteʼereerü sukuwaʼipa tü kasa mojusü aainjünakat namüin na mooʼutshiikana jee namüin na müliakana aaʼin süpüla nnojoluin mmoluin naya seema tü naainjakat wanee wayuu» (Salmos 10:17, 18).

 Jamaluʼuluin shia: Nunouteʼereerü tü kasa keemakat maʼin aainjünaka namüin na jieyuukana maʼaka saaʼin nataüjaanüin jee müliain naya atumawaa.

 «Anasü taaʼin sutuma tatüjaain saaʼu nunouteʼerüin Jehová tü kasa mojusü aainjünakat namüin na jieyuukana otta namüin na majayünnüükana» (Roberta, México).

 ¿Kasa anasü eejeetka mapeena saashin tü Bibliakat? ¿Jamüsü wanoujainjatka sünain shikeraajeerüin tia pütchikat? ¿Kasa naainjaka na aküjaliikana pütchi nüchiki Jehová süpüla nakaalinjain na wayuukana sükajee tü Bibliakat? Pütüjaweere sooʼomüin süchiki tia, püküja shia nümüin chi wayuu yootokai pümaa jee puchunta nümüin nuwaraijaain paaʼu.

 Püdescargaaja jee shiale piʼinpürimiijüin pütchikat tüü.