EKIRAJAAYA 5
¿Jamüsü nukumajaka Maleiwa tü Mmakat?
1. ¿Kasapülajatü nukumajaka Maleiwa tü Mmakat?
Nukumajüin Maleiwa tü Mmakat süpüla kepiainjatüin wayuu suluʼu. Nukumajaiwaʼaya Adán sümaa Eva, nnojoishii nukumajüin süpüla chainjanain naya sirumatuʼu. Naya nukumajaka na aapieekana süpüla tia (Job 38:4, 7). Niʼitaain Jeʼwaa chi palajachikai wayuu suluʼu wanee apain kanüliasü Edén (Génesis 2:15-17). Naashin Jeʼwaa, katüinjatü noʼu Adán waneepia saaʼu tü Mmakat namaa na nuuʼuliwoʼukana. Püleeja Salmo 37:29 otta 115:16.
Joʼuuchon tü apainkat Edén. Kachoinjachi Adán sümüin Eva süpüla wainmainjatüin nooʼuliwoʼu saaʼu tü Mmakat otta süpüla miyoʼuinjatüin tü apainkat (Génesis 1:28). Nnojotsü ojuttajatüin tü Mmakat, ayatüinjatü shia waneepia. Püleeja Salmo 104:5.
Pünaja tü videokot ¿Kasache nukumajaka apüla Maleiwa tü Mmakat?
2. ¿Jamüsü nnojotka paʼaraiisüin tü Mmakat maaʼulu?
Shia süka nnojolin jaa nümüin Adán sümaa Eva otta najünajaanüin suluʼujee Edén. Sutuma tia, amülouisü tü paʼaraiisükat otta nnojotsü jaralüin ountüin eitaain shia süchikuaʼa. Saashin tü Wiwüliakat, nayainnapa kamüinka tü Mmakat na wayuu mojulaakana (Job 9:24). Püleeja Génesis 3:23, 24.
¿Aawalaashiche Jeʼwaa suulia tü nüchekakat napüleerua na wayuukana? Nnojo. Naainjeerü tü nümakat süka pülashin nia (Isaías 45:18). Kepieena waya nutuma Maleiwa suluʼu wanee paʼaraiisü maʼaka nücheküin shia paala. Püleeja Salmo 37:11, 34.
3. ¿Paʼaraiiseerü tü Mmakat süchikuaʼa?
Paʼaraiiseerü shia nutuma Jesuu Nuluwataapa saaʼu tü Mmakat. Najaʼttireena Jesuu otta na aapieekana na nüʼünüükana Maleiwa soʼu tü atkawaa kanüliakat Armagedón. Süchikijee, asürünneechi Satanaa soʼu miit juya, chi aapiee mojulaashi kaainjalaka atuma Adán sümaa Eva. Naaʼinmajeena Jesuu na aʼyataashiikana nümüin Maleiwa, nuʼunireerü nakuwaʼipa jee oʼttaweena nutuma. Süchikijee, kateerü noʼu waneepia suluʼu tü Paʼaraiisükat. Püleeja Alateetkat Mapeena 20:1-3 otta 21:3, 4.
4. ¿Joujeerü sajaʼttaka tü müliaakat?
¿Joujeerü najaʼttiraka Maleiwa tü kasa mojusükat? Alüʼütsü maʼin tü sükaliakat, nüküjüin Jesuu tü ‹shiyaawaseinjatkat›. Tü kasa mojusü alatakat sümüin wayuu maaʼulu, shiiʼiyatüin sülüʼülüin «tü sükaliajatkat sajaʼlajaain kasakat süpüshua». Püleeja Mateo 24:3, 7-14, 21, 22.
Nüsünneʼerüinjatü Jesuu tü müliaakat nuluwataapa soʼu tü miitkat juya (Isaías 9:6, 7; 11:9). Niainjachi chi sacerdoote miyoʼushikai, nülaʼajaainjatü naainjala na aʼyataashiikana nümüin Maleiwa. Nüsünneʼerüinjatü tü ayuuliikat, tü ouktaakat otta tü laülawaakat. Püleeja Isaías 25:8 otta 33:24.
5. ¿Jaralii na kepiainjanakana suluʼu tü Paʼaraiisükat?
Suluʼu tü outkajaaleekat, piʼraajeena na wayuu aikana apüla Maleiwa otta na aainjeekana tü nüchekakat
Nayainjana na wayuu jaa makana nümüin Maleiwa (1 Juan 2:17). Nuluwataain Jesuu na nikirajüinkana sünain achajawaa na wayuu ekirajaweekana nüchiki Maleiwa. Maaʼulu, wainma maʼin wayuu nikirajaka Jeʼwaa süpüla suluʼuinjanain naya tü Paʼaraiisükat (Sofonías 2:3). Na outkajaakana namaa na aküjüliikana pütchi nüchiki Jeʼwaa, ekirajaashii süpüla anainjatüin sukuwaʼipa naʼwayuuse natuma, anainjatüin shipijia nachonnii otta süpüla anainjatüin nakuwaʼipa sutuma tü pütchi anasükat. Püleeja Miqueas 4:1-4.
