Karaloʼuta namüinjatka na Hebreokana 2:1-18
2 Müsüjeseʼe jülüjaleeinjatüin waaʼin tü pütchi waapakat süpüla nnojoluin wooʼuleʼennüin suulia anoujaa.
2 Shiimain tü pütchi naküjakat na aapiee nümaʼanajeejanakana Maleiwa jee kasalajanasü nümüin wanee wayuu nnojoire noonooin sümaa tü Pütchi Aapünakat nümüin Moisés,
3 ¿jalapünaainjana oʼttaain waya nnojoliire waküjain süchiki suʼttaainjatüin maʼin wayuu? Nia aküjaka süchiki tia palajana chi Waseñotsekai jee napansaajüin shia wamüin na aapajakana shia.
4 Akaʼaya chi Maleiwakai nüpansaajüin tia sükajee tü kasa pülasü naaʼinrakat jee naapüin tü nüpülainkat namüin na aʼyataashiikana nümüin wanaapünaa sümaa tü kasa nüchekakat.
5 Nnojoishii niʼitaain Maleiwa na aapieekana süpüla nayainjanain aluwataain naaʼu na wayuu eeinjanakana suluʼu tü mma jeketü waküjakalü achiki.
6 Eepejeʼe wanee wayuu makai anüiki: «Eetaayaai kojutuin wanee wayuu süpüla jülüjainjachin nia paaʼin. Eetaayaai kojutuin chi süchonkai wayuu süpüla paaʼinmajüinjachin nia.
7 Alanaʼaleeshiʼiya na aapieekana nuulia chi wayuukai, kojutupejeʼe maʼin chi wayuukai putuma jee laülaashi nia putuma saaʼu tü kasa pukumajalakat.
8 Müsü nuuʼuipalakai saaʼin kasa süpüshuaʼa putuma». Saaʼu nuluwataaichipain nutuma Maleiwa, laülaaichipa nia saaʼu kasa süpüshuaʼa nutuma. Nnojoyüipejeʼe weʼrüin Jesús sünain aluwatawaa saaʼu kasa süpüshuaʼa.
9 Weʼrüichipa Jesús suluʼu kojutuin maʼin nia atumawaa saaʼujee outuin nia. Süka kamaneein maʼin chi Maleiwakai, outushi Jesús saaʼu saainjala wayuu süpüshuaʼa. Nnojoipünaashi nia kojutuin maʼaka kojutuin na aapieekana.
10 Eesü kasa süpüshuaʼa süpüla nuʼwaajünüinjachin chi Maleiwakai, nia kakumalaka shia. Süpüla kojutuinjanain na nüchonnii wattakana naalii, nia nunoutaka akuwaʼipa chi Wekiipüʼükai nutuma, nunoutuin nukuwaʼipa sükajee tü müliaa niʼrakat. Nuʼtteʼerüin Maleiwa na nüchonniikana nükajee chi Wekiipüʼükai nutuma.
11 Chi Nüshikai Jesús niaʼaya neʼe chi Nashikai na wulekana akuwaʼipa nutuma, müshijeseʼe nnojolin japülin nia sünain «tawalayuu» nümüin namüin.
12 Anuu nünüiki: «Taküjeerü namüin na tawalayuukana anain maʼin tü pünüliakat. Taʼwaajeechi pia sükajee jayeechi naʼaka na tawalayuukana».
13 Anuu nünüikiya: «Tatüjaa aaʼu nükaalinjeechin taya Maleiwa». Jee müshi nia nüchikuaʼa: «Anii taya namaa na tachonnii naapakana Jehová* tamüin».
14 Saaʼujee wayuuin naya «nüchonniikana», wayuushi nia wanaa namaa,* outushi nia süpüla najaʼttirajachin chi Yolujaakai, chi eekai atuma tü outaakat.
15 Jee saaʼujee outuin nia, taashishii nutuma napüshuaʼa na wayuu mmotpuʼukana seema outaa, müshii süchepchiapuʼukai naaʼin tia.
16 Nnojoishi antüin nia süpüla nükaalinjain na aapiee nümaʼanajeejanakana Maleiwa, antüshi nia süpüla nükaalinjainjanain na nüikeyuukana Abrahán.
17 Müsüjeseʼe müinjatüin nukuwaʼipa maʼaka nakuwaʼipa na «nuwalayuukana» sünain kasa süpüshuaʼa, laülaashitchipaka nia napüleerua na sacerdotekana sümaa nümüliajülin wayuu jee oonooshi nia sümaa nünüiki Maleiwa. Taashikalaka wayuu nutuma suulia saainjala jee anajiraasü shia süchikuaʼa nümaa Maleiwa.
18 Müliashi nia nuuʼulakünapa aaʼin, yapashi nia süpüla nükaalinjain na wayuu ooʼulakünakana aaʼin.
Noota
^ Pünaʼla tia suluʼu tü kanüliakat «Sooʼomüin pütchi A5».
^ «Eʼirukuu jee isha» maluʼulu tia suluʼu griego.
