Karaloʼuta namüinjatka na chajanakana Galacia 3:1-29
-
Naataka atuma tü Pütchi Aapünakat nümüin Moisés suulia anoujaa (1-14)
-
«Kateerü noʼu chi wayuu lotokoi akuwaʼipa sünainjee kanoulain nia» (11)
-
-
Tü pütchi apansaajünakat nümüin Abrahán nnojotsü sünainjeejatüin tü Pütchi Aapünakat nümüin Moisés (15-18)
-
Nia Cristo chi nülüinkai Abrahán (16)
-
-
Kasapülajatü saapünaka tü pütchikat nümüin Moisés otta jaralin kamaʼanajeejatüin shia (19-25)
-
Nüchonnii jia Maleiwa saaʼujee kanoulain jia (26-29)
-
«Juushikajaalejeʼeya süchiirua nukuwaʼipa Cristo, nüikeyuujaʼamata jia Abrahán» (29)
-
3 Jia chejeʼewaliikana Galacia, jia mayaawatüinkana saaʼu jukuwaʼipa, ¿jara emeejaka jia? ¿Aashin süpansaajünüin jümüin jamüin maʼin nukuwaʼipa Jesucristo soʼu nükachennüin sünain wanee wunuʼu süpüla outajachin nia?
2 Shia tasakireeka neʼe anain jia tüü: ¿naapüinche tü nüpülainkat Maleiwa jümüin saaʼujee jaaʼinrüin tü sümakat tü Pütchi Aapünakat nümüin Moisés? ¿Naapataapasaʼa shia jümüin saaʼujee kanoulain jia sünain tü pütchi jaapakat?
3 ¿Shiimainchejeʼeya mayaawatüin jia saaʼu jukuwaʼipa? Oʼuninnüsü paala jukuwaʼipa nutuma Maleiwa sükajee tü nüpülainkat, shiaitpapejeʼe neʼe oʼunirüin jukuwaʼipa tü jülüjakat saaʼin wayuu.
4 ¿Amülache neʼe jiʼrüin maʼin jümüliala? Tatüjaa aaʼu nnojoluin amülain neʼe tia.
5 Chi aapakai jümüin pülaa jee chi aaʼinrakai kasa pülasü jaʼaka, ¿naaʼinrüinche tia saaʼujee jaaʼinrüin tü sümakat tü Pütchi Aapünakat nümüin Moisés? ¿Shiataapasaʼa saaʼujee kanoulain jia sünain tü jaapakat?
6 Müsiaʼaya nukuwaʼipa Abrahán: «Kanoulashi Abrahán nünain Jehová,* lotuitpakalaka nukuwaʼipa noʼuluʼu suluʼujee tia».
7 Jütüjaa aaʼulujaʼa eera nüchooin Abrahán na wayuu achecheraakana süchiirua tü nanoujakalü anain.
8 Eesü wanee pütchi suluʼu tü Karaloʼuta Nüchikimaajatkat Maleiwa, eere nüküjain Maleiwa lotuinjatüin nakuwaʼipa na wayuu nnojoliikana judíoin saaʼujee kanoulain naya. Müsüjeseʼe nüküjatüjülin Maleiwa nümüin Abrahán tü pütchi anakat maʼin, müshi nia nümüin: «Aneerü sukuwaʼipa wayuu süpüshuaʼa pünainjee».
9 Suluʼujee tia, na wayuu achecheraakana süchiirua tü nanoujakalü anain, anasü nakuwaʼipa wanaa nümaa Abrahán, jama kanoulapuʼuin nia.
10 Süsaleena naainjala napüshuaʼa na wayuu anoujakana neʼe sünain tü Pütchi Aapünakat nümüin Moisés, jama müin sünüiki tü pütchi ashajuushikat mayaa: «Süsaleechi naainjala chi wayuu macheʼekai süchiirua oonowaa sümaa tü pütchi ashajünakat sünain tü rooyo sümaajatkat tü Pütchi Aapünakat nümüin Moisés».
11 Pansaasü wamüin nnojoleerüin neʼe lotuin nukuwaʼipa wanee wayuu nuʼupala Maleiwa saaʼujee noonooin sümaa tü Pütchi Aapünakat nümüin Moisés, süka jamüin, saashin tü pütchi ashajuushikat «kateerü noʼu chi wayuu lotokoi akuwaʼipa sünainjee kanoulain nia».
12 Nnojotsü choʼujaain kanoulainjachin wanee wayuu sünain tü Pütchi Aapünakat nümüin Moisés, saashin tia pütchikat «nieechi kataka oʼu chi wayuu oonookai sümaa».
13 Müshii niyaʼlajakai waaʼin Cristo jee taashishii waya nutuma suulia süsalain waya waainjala sünainjee tü Pütchi Aapünakat nümüin Moisés. Niaichipaka süsalain naainjala wachikumüin süka müin tü pütchi ashajuushikat mayaa: «Süsalashi naainjala nutuma Maleiwa chi wayuu akachennakai sünain wanee wunuʼu».
14 Alatüsü tia süpüla saapünajatüin sümüin wayuu süpüshuaʼa nükajee Cristo Jesús tü anaa aapünakat nümüin Abrahán. Saaʼujee kanoulain waya, aapünüsü wamüin tü nüpülainkat Maleiwa, tü nüküjatüjütkalia achiki paala.
15 Tawalayuwaa, taküjain paala jümüin wanee kasa saaʼinrawaika wayuu: süpansaajünüle wanee pütchi, jaʼitashi waneeshin neʼe chi wayuu apansaajakai shia, nnojotsü süpüla sümalajeʼennüinjatüin sutuma wayuu jee nnojotsü süpüla sükooʼomüinjünüinjatüin.
16 Aküjünatüjülia nümüin Abrahán jee nümüin chi nülüinkai tü kasa aaʼinnajatkat napüleerua. «Namüin püikeyuu» nnojotsü müin tü pütchikat, suluʼu müin wattakai naalii na aashajaanakana achiki. «Nümüin chi pülüinkai» müsü tü pütchikat, jama waneeshin neʼe chi aashajaanakai achiki, nia Cristo.
17 Anuu joo tanüiki jümüinña: tü Pütchi Aapünakat nümüin Moisés, aapünüsü shia 430 juya süchikijee nüpansaajüin Maleiwa tü pütchikat nümaa Abrahán, nnojotkalaka sümalajeʼennüin tia pütchikat sutuma tü Pütchi Aapünakat nümüin Moisés jee nnojotsü sütaʼülüin sukuwaʼipa tü pütchi aküjünatüjütkalia paala.
18 Woonooinjanalejeʼeya sümaa tü Pütchi Aapünakat nümüin Moisés süpüla saapünüin wamüin tü nüsülajakat Maleiwa, nnojotsüjaʼamata sünainjeejatüin shia tü nüküjatüjütkalia achiki Maleiwa. Nüsülajapejeʼe Maleiwa tia nümüin Abrahán sükajee kamaneein nia nümüin.
19 ¿Kasapülajatcheʼe saapünaka tü pütchikat nümüin Moisés? Tü Pütchi Aapünakat nümüin Moisés, aapünüsü shia mapa süpüla sütüjaanajatüin aaʼu eein kasa mojusü, waneʼereeya nüntapa chi nülüinkai Abrahán, chi aküjünakai amüin tü kasa aainjünajatkat. Naküjain na aapieekana sümüin wayuu tü Pütchi Aapünakat nümüin Moisés, naküjain shia nükajee wanee nanüikeʼejana.
20 Waneeshire neʼe wanee wayuu sünain apansaajaa wanee pütchi, nnojoishi choʼujaain wanee nünüikeʼejanainjachikai, akaʼaya neʼe chi Maleiwakai, waneeshia nia sünain apansaajaa tia pütchikat.
21 ¿Amalajaasüche tü pütchi nüküjatüjütkalia Maleiwa sutuma tü Pütchi Aapünakat nümüin Moisés? ¡Nnojorüleejaʼa! Eerejeʼeya wanee pütchi aluwataanaka anain kataka atuma soʼu wayuu, lotusüjeʼe sukuwaʼipa wayuu sükajee tia pütchi aluwataanakalü anain.
22 Aküjünüsü suluʼu tü Karaloʼuta Nüchikimaajatkat Maleiwa saapünajatüin shikii wayuu süpüla sajapuluʼuinjatün shia tü kaainjalaakat. Tia süpülajatü saapünüin tü kasa aküjünatüjütkalia achiki paala namüin na wayuu kanoulakana nünain Jesucristo, jama nayainjanain kamüin shia na wayuu kanoulakana.
23 Süpülapünaa kanoulain waya nünain Jesucristo, müshii shiʼrajakai waaʼu tü Pütchi Aapünakat nümüin Moisés, sajapuluʼushii waya. Shia waʼatapajaka tü kasa niiʼiyatajatkat Maleiwa wamüin.
24 Tü Pütchi Aapünakat nümüin Moisés, müsü suʼunirakai saaʼin tü wakuwaʼipakat* nünainmüin Cristo süpüla süküjünajatüin lotuin tü wakuwaʼipakat sünainjee kanoulain waya.
25 Süka kanoulainnapain waya nünain Cristo, nnojoluitpa choʼujaain suʼunirajatüin wakuwaʼipa tü Pütchi Aapünakat nümüin Moisés.
26 Jamüshiijaʼa jia, nüchonnii jia Maleiwa jüpüshuaʼa saaʼujee kanoulain jia nünain Cristo Jesús.
27 Jüpüshuaʼa jiakana woutiisakana saaʼu nünülia Cristo, müshi jaʼatakai naaʼin Cristo maʼaka naʼatüin nüsheʼin wanee wayuu.
28 Paaʼinwashii jia jüpüshuaʼa nümaa Cristo Jesús, nnojoishi chira eekai judíoin jee chira eekai griegoin, nnojoishi chira eekai achepchieein jee chira eekai taashin akuwaʼipa, nnojoishi chira eekai tooloin jee türa eekai jierüin.
29 Juushikajaalejeʼeya süchiirua nukuwaʼipa Cristo, nüikeyuujaʼamata jia Abrahán, aapüneerü jümüin tü aküjünakalü achiki nümüin.
Noota
^ Pünaʼla tia suluʼu tü kanüliakat «Sooʼomüin pütchi A5».
^ Tü aküjüneekat suluʼu tü pütchikat griego shia nüchiki wanee wayuu aaʼinmajüi tepichi.
