No artigo anterior analizamos o sinal que Xesús deu. Este sinal dános probas visibles que demostran que o Reino de Deus xa se estableceu no ceo e que Xesús é o seu Rei.

A Biblia di que nada máis ser nomeado Rei, Xesús botou a Satanás e os demos do ceo. Por iso, agora só poden actuar na Terra. Esta é unha das razóns polas que as cousas empeoraron tanto a partir do ano 1914 (Apocalipse 12:7, 9).

A pesar de que as condicións do mundo van a peor, Xesús, como Rei do Reino, fixo cousas para axudar ás persoas por toda a Terra. Grazas ó labor de ensinanza da Biblia a nivel mundial que Xesús predixo, moitos están coñecendo e aplicando na súa vida os principios bíblicos (Isaías 2:2-4). Millóns de persoas xa aprenderon a non deixar que o traballo sexa o máis importante na súa vida, a mellorar a relación que teñen cos seus familiares e a desfrutar das cousas materiais sen facerse escravo delas. Estanlles sacando proveito ós consellos da Biblia xa agora e preparándose para ser a clase de persoas que Deus quere como súbditos do seu Reino.

Xesús xa está gobernando no ceo, pero na Terra aínda gobernan os seres humanos. Non obstante, Deus deulle as seguintes instrucións a Xesús: “Domina nos teus inimigos” (Salmo 110:2). Pronto, Xesús destruirá por completo a tódolos que se opoñan ó Reino de Deus e solucionará os problemas daquelas persoas que estean dispostas a obedecer a Deus.

Nese tempo, o Reino de Deus tomará as seguintes medidas:

• Eliminará as relixións falsas. As relixións que contaron mentiras sobre Deus e que lles fixeron difícil a vida ás persoas xa non existirán máis. Na Biblia compárase as relixións falsas cunha prostituta. A súa destrución collerá a moitos por sorpresa (Apocalipse 17:15, 16).

• Acabará coa gobernación humana. O Reino de Deus poñerá fin a todo tipo de gobernación humana (Apocalipse 19:15, 17, 18).

• Destruirá as persoas malvadas. Que vai pasar con aquelas persoas que insistan en facer cousas malas e non queiran obedecer a Deus? A Biblia di: “Os malvados serán desbotados da terra” (Proverbios 2:22).

• Eliminará a Satanás e os demos. A Biblia explica que xa non van poder enganar nunca máis “as nacións” (Apocalipse 20:3, 10).

Que significarán todas estas medidas para aqueles que acepten o Reino de Deus?

Xesús reinará dende o ceo e conseguirá facer máis cousas polas persoas das que ningún gobernante humano puido lograr. Con el gobernarán 144.000 axudantes escollidos da humanidade (Apocalipse 5:9, 10; 14:1, 3). Xesús asegurarase de que se faga a vontade de Deus na Terra. Que vai facer o Reino de Deus pola humanidade?

• Eliminará as enfermidades e a morte. A Biblia afirma: “Ningún habitante dirá: ‘Estou enfermo’”. Tamén explica: “A morte xa non existirá máis” (Isaías 33:24, TNM; Apocalipse 21:4).

• Conseguirá verdadeira paz e seguridade. A Biblia di “O meu pobo vivirá nun campo de paz” e “cada un sentará debaixo da súa parra e debaixo da súa figueira sen que ninguén o atemorice” (Isaías 32:18; Miqueas 4:4).

• Haberá traballo satisfactorio para todos. A Biblia promete: “Os meus elixidos disfrutarán da obra das súas mans. Non se fatigarán en van” (Isaías 65:22, 23).

• Resolverá os problemas medioambientais. A Biblia explica: “¡Que se alegren o deserto e maila terra reseca, que brinque de ledicia a estepa e que floreza!” (Isaías 35:1).

• Ensinaralles ás persoas o que teñen que facer para vivir para sempre. A Biblia di: “E nisto consiste a vida eterna: que te coñezan a ti, o único Deus verdadeiro, e a quen mandaches, Xesús Cristo” (Xoán 17:3).

Deus quere que ti tamén te poidas beneficiar de todas estas cousas boas (Isaías 48:18). O seguinte artigo explicará o que podes facer para desfrutar dun futuro marabilloso.