NA PEQUENA illa de Sangir, en Indonesia, hai tres irmás nosas que son moi coñecidas por predicar e axudarlles ás persoas a entender a Biblia. Pero se visitases esta illa uns anos atrás, é posible que as atopases na praia facendo algo totalmente diferente.

Primeiro, metíanse na auga e buscaban pedras grandes para levar de volta á praia. Algunhas eran tan grandes coma balóns de fútbol! Despois, sentábanse nuns banquiños de madeira e usaban martelos para romper as pedras en anacos máis pequenos ca un ovo de galiña. A continuación, colocaban as pedriñas nuns caldeiros de plástico e subíanos por unhas escaleiras para levalos ata as súas casas. Alí metían as pedras en bolsas grandes para que puidesen ser transportadas en camións e usadas como material de construción de estradas.

Unha destas irmás chámase Hulda. As súas circunstancias permitíanlle pasar máis tempo cás outras facendo este traballo. Normalmente, destinaba tódolos cartos que ganaba para comprar as cousas que necesitaba a súa familia. Pero, durante un tempo tamén quixo gardar algo para outro propósito: comprar unha tableta para poder ter acceso á aplicación JW Library^®. Hulda descubrira que os vídeos e demais contido desta aplicación lle axudarían na predicación e a entender mellor a Biblia.

Durante mes e medio, Hulda estivo traballando dúas horas extra cada mañá e esnaquizou suficientes pedras como para encher un camión pequeno. Así, puido conseguir os cartos que necesitaba para comprar a tableta.

“Aínda que romper tantas pedras me deixou moi cansada e con algunhas dores”, conta Hulda, “todo isto esquecéuseme rapidamente cando tiven nas mans a miña tableta nova e puiden prepararme mellor e máis facilmente para predicar e estudar as reunións”. Tamén dixo que a tableta lle axudara moito ó principio da pandemia porque, grazas a ela, puido conectarse coa congregación para as reunións e a predicación. E nós estamos tan contentos coma ela de que puidese alcanzar a súa meta!