Di hwa ku wɔ kalaɉonŋaa hala di kɛ kólóɠaa maa mɛni ɓa galangbɔnŋaa hu. Yɛ pələi lɔ ə kɛ la toloo-toloo kalangbɔnŋaa hu, di kaa a nua yiiɠaa di maalɛɠɛɛ Zehova ɓa. Yili ɓə a gɛ diɛ di həɠə ɉu, ə gɛ di “ Yálá ŋɔ nu kpului [...] hon a nɛlɛɛ. ” (Túwɔ́ pələ 20:28). Di kaa a nua yiiɠaa di túwɔ́ pələ lɛlɛɛ, diɛ ɓo galangbɔn ɲɛi tɔwɔ, diɛ Yálá ŋɔ nu kpului hon a nɛlɛɛ, di hwa “ gɛ yɛ yee tɔɔ gwana, kɛlɛɛ, [da] gɛ a [di] kwəinɛɛ, yɛ pələi nwɛli kaa la Yálá ɓa ”. (Piɛli dɔlɔɔ 5:1-3.) Kóló ləkɛɛ ɓə da gɛ ku maa mɛni ɓa ?

Da ku hon a nɛlɛɛ, ə lɛɛ diɛ ku maakpɛ. Kalaɉonŋaa da ku tənəndɔɔ, diɛ ku maakpɛ, diɛ kpɔnmaa tɛɛ ku pɔ kuɔ lɛɛ a ku maalɛɠɛɛ Zehova ɓa. Yii di gɔlɔn diɛ Yálá ɓə góló kɛnɛɛ tii kalihwaɓo diɛ, di hwa hee galangbɔnŋaa mɛi. Kɛlɛɛ, da kóló kɛ ku kwəinɛɛ mɛni ɓa, ə lɛɛ ku wɔ mɛni lɛlɛɛ maa mɛni ɓa (Kɔlɛntə veelɛnaa 1:24). Yɛ pələi lɔ ɓəlaa púlú mun a ŋɔ ɓəlaa tɛi-tɛi kəlee hon na a nɛlɛɛ, ku wɔ kalaɉonŋaa diɛ kpɛli, da di hwaŋalɔ, ə gɛ di galan nea kəlee kɔlɔn galangbɔn ɉu. — Haŋɔn 27:23, TMN.

Da ku kalan Yálá liiɓa kɛ mɛni ɓa. Lɔwɔ kəlee yee mu, ku wɔ kalaɉonŋaa da kalan gɛ galangbɔn ɉu, diɛ ku wɔ laana laa huwala-wala (Túwɔ́ pələ 15:32). Di kaa nwɔnɔ a nua yiiɠaa di hwaŋalɔɔ, diɛ kɔɔmaa lɛlɛɛ lɛ kuɔ Yálá lawoo laa həliɛ hu. Da kɛ ku pɔ, ə lɛɛ diɛ ku maakwɛli Yálá lawoo laa həli pələɠaa kəlee ɓa.

Da ku tɛi-tɛi ku hwaŋalɔ. Ku wɔ kalaɉonŋaa da kɛ lɛɠɛi kuɔ, diɛ lono ku pɔ ŋaakpɔn gɛ pɛlɛ mu, diɛ kpɔnmaa tɛɛ ku pɔ ə gɛ, kuɔ pɛli lɛɛi a ku maalɛɠɛɛ Zehova ɓa. Da pa nwɔnɔ ku yəi bɛlɛ laaləi diɛ ku mɛi kaa, ə lɛɛ diɛ ku hwaŋalɔ a liɛwooɠaa yii da gwɛli Biblə hu. — Zaakə 5:14, 15.

Ə həɠə di kɛ kólóɠaa diɛ galangbɔn ɉu, kalaɉonŋaa mɔlɔɓəlaa da di kpɔɔ kólóɠaa kɛ, ə lɛɛ diɛ di yəi bɛlɛn nua maa mɛni ɲɛi kulɔ. Ku nán nonnii tii da kóló kɛ a nwala-walaa ku maa mɛni ɓa, maanɛɛ ku di maawiɛ. — Tesalonikə dɔlɔɔ 5:12, 13.

• Kóló ləkɛɛɠaa ɓə ku wɔ kalaɉonŋaa da gɛ ?

• Da kpɔnmaa tɛɛ ləi ku tɛi-tɛi ku pɔ ?