ƝAAKWƐLƐI 02
Biblə a kilitɔɔmaalaa tɛɛ
Lɔi mɛi naa kəlee, maawɛli mɛniɠaa a kɛ həlii nua diɛ ə ma kɛ liihɛlɛn da mɛni nwanaa. Mɛniɠaa tii ta aa ta həli yɛ́ ? Ə́ kaa kiɛ mɔnɔ mii maahɔlɔɓo ə́ kɔlɔi ho pono li, awala kɛtii ə́ wɛlikɛmaamun da aa haa. Ya pɛli kiɛ ə́ kpɔɔ maaləngɛi yɛ́ ma, ‘ yɛnɛɛ kaa pai lɛlɛi a holo ta ? ’ Biblə a gɛɛmaalən tii mukulɔ a kpaalə ta yii a gu hwaŋalɔ kpɔ kɛnɛ.
1. Kilitɔɔmaalaa ləkɛɛ ɓə Biblə a dɛɛ gu pɔ ?
Mɛnii gɛi mɔnɔ yɛ ɓo lɔi mɛi, Biblə a yili hukulɔ guɔ. Aa wɔlɔ wɛlɛɛ lɛlɛɛ tɛɛ gu pɔ, yii a nɛ yɛ ma ɉu ho kea kweali mɛniɠaai tii diɛ kpɛɛ. Biblə ŋɔ mɛni laakwəlamoɔɠaa ‘ da liilaa yɛnɛɛ hee ə́ tɔwɔ di ə́ wɔ tinaa tɔwɔ hee a nwunnanɛɛ ’ (Ɉeremi 29:11-12 ɓo). Gilitɔɔmaalaa tii a pɛli kpɔnmaa tɛɛ gu pɔ gu tɔɔ kpaan gu wɔ mɔnɔɠaa hu háákələi ə lɛɛ gu pɛli kwəinɛɛ hɔlɔɓoi. Mɛni laakwəlamoɔɠaa tii da pɛli kpɔnmaa tɛɛ nwɔnɔ gu pɔ ə gɛ guɔ pɛli tinaa kɛi kwəinɛɛ hu yii kpɛɛ ho ma.
2. Lə ɓə Biblə a mo yɛ hwilɛn na pələi gu wɔ yɛnɛɛ kɛ pələ kaa tinaa pai kɛi la ?
Biblə a mo yɛ ma tinaa “ haa hwa kea kɛ laa, haa wɔlɔ mɛni hwa kɛ ɉu, woolaa hwa kɛ laa ə ma kɛ mɔnɔ ” (Kulɔ ponoŋa hɛɓɛ 21:4 ɓo). Mɛniɠaai da gɛ kilitɔɔmaalaa lɔpee hwa lɛɛ nukanŋaa yəi háákələi, yɛ pələi yeehowololaa kaa la, pulu mɛni, ɲɔn da haa, gəlee kaa pai kpɛɛi. Biblə a mo yɛ ma nukanŋaa kaa tinaa pai pɛlii yiipoo yii kpɛɛ ho ma hɔlɔɓoi Alizana hu lɔi mɛi.
3. Lə ɓə a pɛli kpɔnmaa tɛɛ ə́ pɔ yɛ́ pɛli laana yɛ́ ma mɛniɠaa Biblə a mo bɔ mɛni kaa tinaa pai kɛi ?
Nu tamaa da kɛ bɔ mɛni lɛlɛɛɠaa da di kiliŋahiɛ ma bɔ mɛni ə kɛ, kɛlɛɛ di ho laa li na kpɔ a neelee akɛ mɛniɠaa tii pɔ mɛni kaa pai kɛi. Biblə nwɛi yii a mo gaa a dee. Gwa kɛi “ Yálá lawoo hɛɓɛ maakpɛɛ,” mɛniɠaa Biblə a mo, gwa pɛli ma gu laa di la (Gɛlaɠaa 17:11). Ya kɛi Biblə kalan, yɛ́ kpinii ə́ kaa pai gaai akɛ mɛniɠaa a mo yɛ hwilɛn na tinaa mɛniɠaa diɛ ya pɛli laana.
Ə́ WƆ MƐNIKƆLƆNŊAA TA PƐLƐ MA
Mɛniɠaa Biblə a mo yɛ hwilɛn na pələi yɛnɛɛ kaa tinaa pai kɛi la, daɠaa kaa. Gilitɔɔmaalaa Biblə a dɛɛ gu pɔ, gaa pələi a kpɔnmaa tɛɛ la nua pɔ háákələi.
4. Biblə a yɛnɛɛ lɛlɛɛ yii kpɛɛ ho ma ŋɔ kilitɔɔmaalaa tɛɛ gu pɔ.
Mɛni laakwəlamoɔɠaa Biblə hu, ə́ ɲɛi hee ɓɛ daɠaa diɛ. Nɛlɛ ɓə nwɛli aa too yɛ́ kpɔ kɛnɛ ? Lə mɛni ɓa ?
Vɛlisɛɛɠaa ŋɛi pɛɛn ni mɛni laakwəlamoɔɠaa kwɛlɛ di ɓo ə lɛɛ ka lono kɛ gɛɛmaalənŋaa ŋɛi mɛi :
-
Ə́ wɔ kiliɓa vɛlisɛɛɠaa ŋɛi da pɛli kilitɔɔmaalaa tɛɛ ə́ pɔ ? Ə́ wɔ kili ɓa da pɛli kilitɔɔmaalaa tɛɛ ə́ yəi bɛlɛn nua pɔ ə ma kɛ ə́ ɓəlaa ?
Ə́ kiliŋahiɛ lɔ yɛ ɲɛnɛɛ ŋɛi di kaa maamɛni ɓoi ɓɛ, ya kɛ ɉu.
|
MƐNIƓAA ŊƐI DA HO KEA PAI LAAI NUTA ƁA . . . |
NU KƏLƏI KAA PAI MƐNIƓAA ŊƐI DƆLƆ KƆLƆI . . . |
|---|---|
|
|
|
|
|
|
|
|
|
|
5. Gilitɔɔmaalaai gaa Biblə hu a gu wɔ mɛniɠaa kaa pələ maahwalən.
Mɛniɠaai a kɛ tɛɛ lɔi mɛi, nukanŋaa diɛ gaa, a kɛ nwanai diɛ yɛ di hwiikpɛɛ. Nutaɠaa da kɛ kɔi kpɔ a nwala-walaa ə gɛ diɛ pɛli mɛniɠaa maahwalən ɉii nɛlɛɛ kɔlɔi. Mɛniɠaa Biblə a mo yɛ ma, maa kaa pai hwalən ɉii a nɛlɛɛ kɔlɔi, gaa pələi gaa kpɔnmaa tɛɛ la nua pɔ háákələi. VIDIO kaa, ə lɛɛ ka lono kɛ gɛɛmaalənŋaa ŋɛi mɛi.
-
Vidio hu, hulu mɛni ləkɛɛ ɓə hee Rafika hu ?
-
Vulu mɛnii ə́ gaa pələi ma ho kpɛɛ la, Biblə ə kpɔnmaa tɛɛ ləi bɔ ?
Kilitɔɔmaalaai Biblə a dɛɛ gu pɔ yɛ hwilɛn na gu wɔ yɛnɛɛ dɔwɔ pələ ɓa, a kpɔnmaa tɛɛ gu pɔ mɛniɠaai da gu hwiikpɛɛ, gu yəi ə tɛɛ diɛ. Hanwon 17:22 da Romə 12:12 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Gilitɔɔmaalaa maamɛni ɓoɔ Biblə hu, ə́ wɔ kili ɓa a pɛli ə́ wɔ yɛnɛɛ hwialaɓoi háákələi ? Ləi ?
NUTAƓAA DA KƐ KƐI MA : “ Mɛniɠaa Biblə a mo yɛ hwilɛn na tinaa mɛniɠaa diɛ, gaa a mɛniɠaai hwa pɛli kɛi. ”
-
Ə́ wɔ kili ɓa lə mɛni ɓa maanɛɛ yɛ́ kpinii ə́ gaa akɛ mɛniɠaa tii da pɛli kɛi ?
YII GU GALAN
Biblə a yɛnɛɛ lɛlɛɛ laakwəlamo guɔ, a kilitɔɔmaalaa tɛɛ gu pɔ ə lɛɛ ə kpɔnmaa tɛɛ gu pɔ háákələi guɔ pɛli tɔɔi kpaan gu wɔ mɔnɔɠaa hu.
Nɛɛ ə́ kili pɔ
-
Lə mɛni ɓa nukanŋaa maakpaan gaa kilitɔɔmaalaa ɓa ?
-
Lə ɓə Biblə a mo yɛ hwilɛn na tinaa ɓa ?
-
Kilitɔɔmaalaa a kɛ ə́ yəi, a pɛli kpɔnmaa tɛɛ ləi ə́ pɔ háákələi ?
MƐNI TAKPƐLIƓAA
Pələi kilitɔɔmaalaa a pɛli kpɔnmaa tɛɛ la ə́ pɔ ya kɛ mɛni wala-walaɠaa hu, yili kɛ pələ maakwɛli.
“ Minɛ ɓə gwa pɛli kilitɔɔmaalaa hɔlɔɓoi laa ? ” (Réveillez-vous !, 22 avril 2004)
Ɲɔn ɲii gbɛɛlaa walaa, nuai da kaa diɛ, gaa pələi kilitɔɔmaalaa a pɛli kpɔnmaa tɛɛ la di pɔ.
“ Ɲɔn ɲii gbɛɛlaa walaa : Biblə a pɛli kpɔnmaa tɛɛ gu pɔ yili hu ? ” (Hɛɓɛ yii gaa gwɛli yɛli ɓa)
Ɓɛlowai ya kɛ nwələi ŋɛi ŋɔ vidio kaa la, Alizana ŋɛi Biblə a maamɛni ɓo, ə́ kiliŋahiɛ lɔ yɛ, yɛ́ ka ə́ yəi bɛlɛn nua ka kɛ laa.
Gaa pələi gilitɔɔmaalaai maamɛni ɓoɔ Biblə hu ə nuta ŋɔ yɛnɛɛ maahwalən na, yai kɛi mɛni kəlee kɛ ə gɛ yɛ pɛli yɛnɛɛ mɛniɠaa hwialaɓoi.
“ Vá kea giliŋahiɛ gɛ́ ma maanɛɛ ŋi ɲɛnɛɛ ŋɛi maahwalən ” (La Tour de Garde, 1er juillet 2013)
