“Pá vígàí beè ié nágé lé nyíe kilma ló nà gbógó. Ene dee, Elaine ea beè elá ló nu gè lẹ́ kpá boo kọọmá kpẹ̀aá beè dõo biscuit nè nà gbógó. Tṍó e bà né va biscuita lọ̀l, kọ̀láá tṍó e ínà kuló kĩá, gbò gbógóá ólò gbĩ́ gè kil ló pá vígàá kọbé bà neè va nu gè dè.

“Gbò gbógóá beè dé kpéè ló ba biscuit vaá nda beè de nágé kpéè ló ńkem̀ sọ́l em beè zọ̀va loáá tṍó e sìgà ẽ́ téní. Sõò náa beè tànim gè kpáá zọ̀va loá gã́bug bel. Tṍóá, m beè sigá ló 70 gbáá, vaá m̀ gáà beè àgala boo beè nu e Gbò Neǹ Ditõ̀ò Jìhóvà ziga ló dú kà kà. M beè gbóó bugi togó kọọ̀ àé dú lé beè áá m̀m̀ nó Kpá Káí boo nà lóó, boo béè kọọ̀ nu e gã́bug bõ̀ònaló fã̀ ólò noòmà náa léémám.

“Mm̀ gbò tṍóá, m beè mòn nàgé dõòna kà pá vígà e bà di élá ló nu gè lẹ́ kpá boo kọọmá kpẹ̀a gbẹá dõòna ke tõ̀ò. Baala beè du nágé lé. Bà ólò tú Kpá Káí aamá kọ̀láá kà nà bíb, vaá vó beè naa kọ ḿ kpáá palàge dẹlẹ́ va nyíé boo.

“Enè dee Elaine beè bĩinám kọọ̀, ‘E kọ ò zigà kọọ̀ gbò nom dú dõònù ea aa bá Bàrì?’ M beè aalá kọọ̀, ‘Ẽei!’ Elaine beè gbóó bugi kpá Àìzáíà 11:​6-9 nèm. Lọl tṍóá ààmà, a beè kpáá tànim gè nó Kpá Káí, sõò náa beè tànim gè tú tọ́ọ̀ kà kpá gè bugi lọ̀l vá bá.

“Gbò dee ea bẽene, m beè dé kpéè ló gè zọ̀ Elaine nè a dóm ea kọlà Brent loá sọ́l. Ba beè kọ ḿ bugi lọl mm̀ kpá Máátìù tẹlẹ mm̀ kpá Tóm be m̀ gbĩ́ gè nyimá nú ea kọlà ge nyoone nvéè Kráìst. M beè naa vó. Pọ́ì ńkem̀ tṍó aa ló tṍóá, m beè gbóó zìgà kọọ̀ Brent nè Elaine á noòmàm Kpá Káí. Níá beè naaá mm̀ gbáá 2016.

“Buù sè m̀ ólò ẹ̀bmà dẽè nà Nò Kpá Káí nè ge sí nònù gbẹá Kíndòm Họ́ọ̀I. Nyíém beè palàge ẹẹ gè nyimá nu e Kpá Káí kọ́. Tṍó e enè gbáá nè sìgà téní, m beè gbóó dììa múú. Kátogóí, m sígá ló 79 gbáá vaá m̀ agala kọọ̀ m mon kà kà bõ̀ònaló. Jìhóvà a tã́ànèm dee bá tení dú ló gè naa kọ ḿ dũunà pá tọ e bà gé fã́e beeá ló bàlà booí.”