Tabeua rairai n te Baibara a kabongana te taeka ae “moone” ibukin rairan te taeka n Ebera ae “Tiore” ao te taeka ni Kuriiti ae “Eriti,” aika taeka aika kaineti nakon ruanimateia te botannaomata. (Taian Areru 16:10; Mwakuri 2:​27) A bati aomata aika kakoauaa te ai ni moone, n aron ae oti n aia korobanna Aaro ae n te kaongora aei. Ma e kaokoro ana reirei te Baibara.

1. A aki ataa te bwai teuana naake a mena i moone ao a aki namakina te maraki. “Akea te mwakuri ke te babaire ke te atatai ke te wanawana i nanon [Tiore].”​—Te Minita 9:​10, kabwarabwara mai nano.

2. A nako moone aomata aika raoiroi. A ataia mwaane aika kakaonimaki ake Iakoba ma Iobi bwa a na roko naba i moone.​—Karikani Bwaai 37:35, kabwarabwara mai nano; Iobi 14:13, kabwarabwara mai nano.

3. Boon te bure te mate ao tiaki te kammarakaki n aki toki n te ai ni moone. “Ane e mate ao e a bwara baena man ana bure.”​—I-Rom 6:7.

4. Te kammarakaki n aki toki e na bon urua ana kaetitaeka ae riai te Atua. (Te Tua-Kaua 32:4) Ngke e bure te moan aomata are Atam, ao te Atua e tuangnga bwa tuuaana bon tii te mate, ngke e kangai: “Bon te tano ngkoe ao ko na manga okira te tano.” (Karikani Bwaai 3:​19) E a tia ni kewe ngkanne te Atua ngkana ngaia bwa e boni kaaki Atam n te ai ni moone .

5. Bon akea n ana iango te Atua taekan te kammarakaki n aki toki. Te iango ae e na katuuaaeia aomata n te ai ni moone te Atua, e boni kauntaba ma ana reirei te Baibara ae “te Atua bon te tangira.”​—1 Ioane 4:8; Ieremia 7:​31.