Antai ae riai n angareirei i aon taekan te wene n taanga nakoia naati? N te Baibara ao a mwiokoaki iai kaaro, ao a bati kaaro ake a noria bwa a manena taeka n ibuobuoki aika i nano aikai:

•   Tai maamaa. E aki wimakiki te Baibara ni kaineti ma taekan te wene n taanga ao bwaai ni kakariki, ao te Atua e tuangia tibun Iteraera bwa a riai naba n reiakinaki “ataei” taekani baikai. (Te Tua-Kaua 31:12; Nakoaia Ibonga 15:​2, 16-​19) Ko kona ni kabonganai taeka aika e na aki taraaki iai te wene n taanga ke te bwai ni kakariki n te rabwata bwa e kamaamaa.

•   Reireinia teutana imwin teutana. N oneani mwin ae ko na taningaa ikawain natim ao ko a tibwa kabwarabwarai nakoina bwaai ni kabane aika irekereke ma te wene n taanga, e raoiroi riki ae ko reireinna teutana imwin teutana ni kaineti ma ae e kona n ota iai.​—1 I-Korinto 13:11.

•   Reireinia te aroaro ni maiu ae riai. E bae n iai n taabo n reirei te angareirei teutana nakoia ataei i aon te wene n taanga. Ma te Baibara e kaungaia kaaro bwa a na reireinia natiia tiaki tii i aon taekani bwaai ni kakariki, ma bon te aroaro naba ae riai ni kaineti ma te wene n taanga.​—Taeka N Rabakau 5:​1-​23.

•   Kakauongo nakon natim. Tai waekoa n un ke n iangoia bwa tera ae e a tia ni karaoia natim, ngkana e titiraki ibukin te wene n taanga. Ma ‘waekoa n ongora, ao iremwe n taetae.’​—Iakobo 1:​19.

Arom ni kamanoa natim mairouia taani karaoi mwakuri n tangako

•   Reireiniko i bon iroum. Ukeri baika e kakaraoi te tia tangakoiia aomata.​—Taeka N Rabakau 18:15; nora mwakoro 32 n te boki ae Questions Young People Ask​—Answers That Work, Volume 1.

•   Tararuaa raoi natim. Tai katuka natim iroun te aomata ae ko aki raoi ataia bwa e tau n onimakinaki ke e aki, ao tai kariaia natim bwa e na “aki tauaki arona.”​—Taeka N Rabakau 29:15.

•   Reireinia te iango ae riai ibukin te ongeaba. A riai n ataia ataei ae a na ongeaba irouia aia karo. (I-Korote 3:​20) Ma ngkana ko reireina natim bwa e riai n ongeaba irouia aomata nako aika ikawai, ko a kairia iai bwa e na kai mwane n te mwakuri n tangako. A kona ni kangai kaaro aika Kristian nakon natiia, “Ngkana iai ae e tuangko bwa ko na karaoa te bae bure i matan te Atua, ao tai karaoia.”​—Mwakuri 5:​29.

•   Kaotii aanga aika bebete ibukini kamanoana. Buoka natim bwa e na rabakau arona ngkana iai temanna ae kataia ni kumeia, ngkana akea ngkoe i rarikina. Karaoani kaotioti aika kimototo a kona n angan natim te ninikoria n taekina “Tai kumeai! N na tua taekam!” ao ni waekoa ni birinako. Ko riai ni kakauringia “natim n taai nako,” kioina ngkai a kai mwaninga.​—Te Tua-Kaua 6:7, Contemporary English Version.