E Mena te Atua n Taabo Nako?
Ana kaeka te Baibara
E kona n nori bwaai ni kabane te Atua ao ni karaoi bwaai nako ake e kani karaoi. (Taeka N Rabakau 15:3; Ebera 4:13) Ma bon tiaki ana reirei te Baibara ae te Atua e mena n taabo nako, ao e mena i nanoni bwaai ni kabane. Ma e kaotaki bwa bon iai ngaia, ao iai te tabo teuana ae e mena iai.
Rabwatan te Atua: Bon te taamnei te Atua. (Ioane 4:24) E aki kona n noraki irouia aomata. (Ioane 1:18) Miitara mairoun te Atua aika n te Baibara a aki toki n taekinna bwa e mena n te tabo teuana. Ma e aki te roko n taekinaki bwa e mena n taabo nako.—Itaia 6:1, 2; Te Kaotioti 4:2, 3, 8.
Ana tabo ni maeka te Atua: E mena te Atua i karawa n te tabo ae e aki kona n noraki, ae kaokoro ma baika karikaki. Bon iai “ana tabo ni maeka i karawa” te Atua. (1 Uea 8:30) E taekinaki n te Baibara te tai teuana are “a rin iai natin te Atua ae koaua bwa a na tei i matan Iehova,” * ae nanona bwa bon iai te tabo teuana ae maeka iai te Atua.—Iobi 1:6.
Ngkana e aki mena te Atua n taabo nako, e kona ni kaotiota tabeakinau?
Eng. E rangi n tabeakinia aomata nako te Atua. E ngae ngke e maeka n te tabo ae e aki kona n noraki, ma e bon tabeakinia kaain te aonnaba ake a kani kakukureia ni koaua, ao e mwamwakuri ibukia. (1 Uea 8:39; 2 Rongorongo 16:9) Iangoa aron Iehova ni kaotiota tabeakinaia taan taromauria ni koaua:
Ngkana ko tataro: E kona Iehova n ongoraei am tataro n te tai are ko tataro iai.—2 Rongorongo 18:31.
Ngkana ko rawawata: “E kaan Iehova ma akana uruaki nanoia. E kamaiuia akana rawawata nanoia.”—Taian Areru 34:18.
Ngkana ko kainnanoa te kairiri: E na ‘anganiko te ataibwai ao n reireiniko’ Iehova rinanon ana Taeka ae te Baibara.—Taian Areru 32:8.
Iango aika kairua ibukin ae e mena n taabo nako te Atua
Te iango ae kairua: E mena te Atua i nanon taiani karikibwai.
Te koaua: E aki maeka te Atua n te aonnaba ke n te tabo teuana ae kona n noraki i nanon te iuniweeti aei. (1 Uea 8:27) E koaua ae a “tataekina mimitongin te Atua” itoi ma ana karikibwai nako. (Taian Areru 19:1) Ma e aki maeka te Atua i nanoni baika e karikii, n aron naba ae e aki maeka te tia korobanna i nanon ana korobanna. Ma e koaua ae e kona te korobanna ni kaotii aroaron te tia korobanna. N aron anne, ngkana ti taraa te aonnaba aei ao ti a kona naba n nori iai ‘aroaron te tia karikiriki aika aki nonoraki,’ n aron te korakora, te wanawana, ao te tangira.—I-Rom 1:20.
Te iango ae kairua: E riai te Atua ni mena n taabo nako bwa e aonga n atai bwaai aika riki ao n rangi ni korakora.
Te koaua: Te taamnei ae raoiroi, ke te mwaaka ae mwamwakuri, bon mwaakan te Atua ni karaoi bwaai. E kona te Atua rinanon taamneina ae raoiroi n atai ao ni karaoi bwaai ni kabane, man taabo nako, ao n taai nako.—Taian Areru 139:7.
Te iango ae kairua: E boni mena n taabo nako te Atua n aron ae oti n Taian Areru 139:8 ae kangai: “Ngkana I rierake nako karawa, ao ane ko na mena naba ikekei, ao ngkana I arora nneu ni wene n te Ruanimate, ao noria! ane ko na mena naba ikekei.”
Te koaua: Tiaki taekan te tabo ae maeka iai te Atua te kibu aei. Ti reireiaki iai n te aro ni kaikonaki, bwa akea te tabo ae kona n raroa mairoun te Atua ae e na aki kona ni karaoi iai bwaai ibukira.
^ bar. 3 Iehova bon aran te Atua ae kaotaki n te Baibara.