Ngkana ko tabu ao nanona bwa ko kaokoroaki man te aki itiaki. Te taeka n Ebera ae rairaki bwa “tabu” e nako man te taeka ae nanona “kaokoroa.” Ngaia are te bwai ae tabu e kaokoroaki bwa e na aki kakabonganaaki ibukini bwaai tabeua, ke e taraaki bwa e tabu, ni kaineti ma raoiroina, itiakina, ke tabuna.

 E bon rangi n tabu te Atua. E taku te Baibara: “Akea temanna ae tabu n aron Iehova.” a (1 Tamuera 2:2) Ngaia are e bon tau ngkai e katea te kaetieti te Atua ni kaineti ma te bwai ae tabu.

 Te taeka ae “tabu” e kona ni kabonganaaki nakoni baike a boni kaineti nakon te Atua, riki bwaai aika kaokoroaki aika tii kabonganaaki n te taromauri. N te katoto, e taekini baikai te Baibara:

•   Taabo aika tabu: E kangai te Atua nakoni Mote i rarikin te aroka are urarake: “E tabu te tabo ane ko tei iai.”​—Te Otinako 3:2-5.

•   Botaki aika tabu: A taromauria Iehova I-Iteraera rimoa n aia toa ake a kakaraoi ake a aranaki bwa “bwabwaro aika tabu.”​—Nakoaia Ibonga 23:37.

•   Bwaai aika tabu: Bwaai ake a kabonganaaki n taromaurian te Atua n ana tembora rimoa i Ierutarem a aranaki bwa “bwaai ni kabane aika tabu.” (1 Uea 8:4) Bwaai aika tabu aikai a riai n rangi ni karauaki bwa a rangi n tabu, e ngae ngke a aki riai n taromauriaki. b

 Eng. E tua ni kangai te Atua nakoia Kristian: “Kam na itiaki ibukina bwa I itiaki.” (1 Betero 1:​16) E eti bwa a aki kona aomata aika aki kororaoi n roko ni kororaoin itiakin te Atua. Ma e ngae n anne, aomata ake a ongeaba n ana tua te Atua aika raraoi, a kona n iangoaki bwa a “itiaki, ao [ni] butimwaeaki iroun te Atua.” (I-Rom 12:1) Te aomata are kakorakoraa ni kaitiakia e kaotiota aei n ana taeka ao n ana mwakuri. N te katoto, e kakairi n ana taeka n reirei te Baibara are e “riai n itiaki ao n rawa nakon te wene ni bure” ao n “itiaki n [aroarona] ni kabane.”​—1 I-Tetaronike 4:3; 1 Betero 1:​15.

 Eng. Ngkana te aomata e kaaki taekan ana kaetieti te Atua ibukin te aroaro ni maiu, ao e nang aki iangoaki iroun te Atua bwa e itiaki. N te katoto, e kaineti kanoani bokin te Baibara ae Ebera nakoia “taari aika . . . itiaki,” ma e anga te kauring bwa a kona ni karikirakea “te nano ae buakaka ae aki onimaki ae reke mani kitanan te Atua ae maiu.”​—Ebera 3:​1, 12.

 Te iango ae kairua: E itiaki riki te aomata ngkana e tiku n aki iein.

 Te koaua: E ngae ngke e kona n rineia te Kristian bwa e na tiku n aki iein ke e na iein, ma tiaki nanona bwa e na itiaki i matan te Atua ngkana e aki iein. E koaua bwa te koraki ake a tiku n akea buuia, a kona ni kaatuua riki moanibwaian te taromauri. (1 I-Korinto 7:​32-​34) Ma e kaotaki n te Baibara bwa a kona naba n itiaki naake iai buuia. Bon iai buun temanna ana abotoro Iesu are Betero.​—Mataio 8:​14; 1 I-Korinto 9:5.