Ngkai Ana Tia Kakoaua Iehova ngaira, ti kakorakoraira ni kateimatoai utu, ae bon oin ara utu ao aia utu aomata. Ti karinea te Atua ngkai boni ngaia te tia Karika te babaire ibukin te utu. (Karikani Bwaai 2:​21-​24; I-Ebeto 3:​14, 15) E reireinia aomata te Atua rinanon te Baibara booto n reirei ake a a tia ni buokaki iai aomata ni kabutaa te aonnaba, bwa e na teimatoa tekatekaia n taanga ao ni kakukurei.

 Ti kabanea ara konaa n toua mwin ana taeka n reirei te Baibara, ibukina bwa ti buokaki iai n riki bwa buumwaane, buuaine, ao kaaro aika raoiroi riki. (Taeka N Rabakau 31:​10-​31; I-Ebeto 5:⁠22–​6:4; 1 Timoteo 5:⁠8) Te wanawana ae n te Baibara e boni buokiia naba utu aika kakaokoro aia Aro kaaina bwa a na nakoraoi maiuia. (1 Betero 3:​1, 2) Iangoi aia taeka aomata aika tiaki taani Kakoaua ake a a riki buuia bwa Ana Tia Kakoaua Iehova:

•   “Ti a bon unun nako naba ao ni bwarannano i nanon ara moan ririki n taanga aika onoua. Ma imwin rikin Ivete bwa Ana Tia Kakoaua Iehova, e a kaotiota riki te tangira ao te taotaonakinnano neiei. E a teimatoa tekatekara n taanga ni bitaki ake e karaoi.”​⁠—⁠Clauir, mai Brazil.

•   “I kaitaraa buu ae Chansa, ngke e a moana ana reirei teuaei n te Baibara ma Ana Tia Kakoaua Iehova, ibukina bwa irou a ururui naakai taian utu. Ni moa man te tai anne ao I a ataia ae e boni kanakoraoa tekatekara te Baibara.”​⁠—⁠Agness, mai Zambia.

 Ngkana ti karaoa ara mwakuri ni minita, ti boni kaotia nakoia raora n aomata ae a kona ni buokaki ni maiuakinan te wanawana ae n te Baibara bwa

•   A na rinea raoia ni mare ma te wanawana

•   E na nakoraoi aia moan ririki n tekateka n taanga

•   A na bwaati aroia nakoia aia koraki buuia

•   A na bwaati aron tikotikonakin te mwane

•   A na aki kakauntaeka

•   A na rabakau n ikabwarabure

•   A na bwaati n reireinia natiia

 E kona n riki anne n tabetai. N te katoto, e taekinaki n te ribooti n 1998 bwa man ana kakaae te kambwana ae te Sofres, ao e noraki bwa a riki kangaanga aika kakaiaki i nanon 1 mai buakoni maare aika 20 ae tii temanna iai ae rairaki nakon Ana Tia Kakoaua Iehova imwini mareia.

 E taetae ni burabetinna Iesu bwa te koraki ake a toui mwin ana reirei, a na boni boo ma te kakaaitara mairouia kaain aia utu n tabetai. (Mataio 10:​32-​36) E noria te tia kororongorongo rimoa ae Will Durant bwa i aan ana tautaeka te Embwaea n Rom, “ao a bukinaki Kristian bwa a ururui utu,” a ao tabeman naba Ana Tia Kakoaua Iehova a bon aitara naba ma anne ni boong aikai. Ma a karika te kauntaba aei taani Kakoaua?

 Ni kaboowiaia Ana Tia Kakoaua Iehova ni kaineti ma bukinaia are aongkoa a ururui utu, ao e taekinaki n te European Court of Human Rights bwa kaain te utu ake tiaki taani Kakoaua, n angiin te tai e riki te kauntaba i marenaia man aroia n rawa “ni karinei ke ni kariaia inaomatan te rao are temanna ni karaoi baika kakaraoaki n ana Aro ke ni kaboraoa maiuna ma ana koaua.” E reitia ni kangai te Boowi: “E nonoraki te kangaanga aei irouia taanga aika kakaokoro aia koaua ao ai uana naba ma Ana Tia Kakoaua Iehova.” b E ngae ngkana a kaaitara Ana Tia Kakoaua Iehova ma te ribuaka ibukin aia Aro, ma a boni kekeiaki naba n toui mwin ana taeka n reirei te Baibara ae kangai: “Tai kabooa ana buakaka te aomata n te buakaka. . . . Karaoa ami kabanea ni konaa ni karekea te rau ma aomata ni kabane.”​​⁠—⁠⁠I-Rom 12:​17, 18.

 A mutiakin ana kaetieti te Baibara taani Kakoaua ae a na mare “tii i nanon te Uea,” ae nanona, e na mare temanna ma te aomata ae titeboo ana koaua ma ngaia. (1 I-Korinto 7:​39) Bon aei ana tua te Baibara ao e bon rang ni manena naba. N te katoto, e taekinaki n te kaongora teuana n te Journal of Marriage and Family n 2010 bwa “taanga aika titeboo aia Aro, aia mwakuri, ao aia koaua” e bae n rangi n nakoraoi riki aia reitaki i marenaia. c

 Ma e ngae n anne ao taani Kakoaua a aki kaungaia kaain aia Aro bwa a na kitana buuia ae tiaki te tia Kakoaua. E kangai te Baibara: “Ngkana iai te tari te mwaane ae e aki onimaki buuna, ao e kariaia neiei bwa e na tiku ma ngaia, ao ke e tai kitana neiei. Ao ngkana iai te aine ae e aki onimaki buuna, ao e kariaia teuaei bwa e na tiku ma ngaia, ao ke e tai kitana teuaei.” (1 I-Korinto 7:​12, 13) A maiuakina te kaetieti aei Ana Tia Kakoaua Iehova.