Bukin Tera Bwa A Teimatoa n Tei i Nuka Ana Tia Kakoaua Iehova ni Kaineti ma Waaki n Tautaeka?
A teimatoa Ana Tia Kakoaua Iehova n tei i nuka ni kaineti ma waaki n tautaeka ibukin aia koaua n aia Aro ae boto i aon ana reirei te Baibara. Ti aki kataia n anai nanoia aomata, n rinerine ibukini bwaatei n te tautaeka, ke n anga arara ibukin te tia tei, ke ni kan riki bwa te tia tautaeka, ke ni boutokaa te mwakuri ibukini bitakin taian tautaeka. Ti kakoauaa ae te Baibara e katerea bukini karaoan aei iroura, n te aro ae mataata raoi.
Ti kakairi n ana katoto Iesu are e aki kariaia bwa e na kaueaaki. (Ioane 6:15) E reireinia taan rimwina bwa a na “aki arona aroia kaain te aonnaba” ao e katereterea ae a na aki tabeitera ni kaineti ma ana waaki te tautaeka.—Ioane 17:14, 16; 18:36; Mareko 12:13-17.
Ti kakaonimaki ni koaua nakon Ana Tautaeka n Uea te Atua, are e mwaneweia Iesu ngke e kangai: “E na tataekinaki te rongorongo ae raoiroi aei ae taekan te Tautaeka n Uea n te aonnaba ni kabutaa.” (Mataio 24:14) Ngkai taan tei ngaira ibukin Ana Tautaeka n Uea te Atua, ti mwiokoaki bwa ti na tataekina rokona, ti teimatoa n tei i nuka ni kaineti ma aia waaki tautaeka n aaba nako, n ikotaki naba ma are ti maeka iai.—2 I-Korinto 5:20; I-Ebeto 6:20.
Ibukina bwa ti tei i nuka, ti a kona iai n tibwaanako te rongorongo ae raoiroi ae taekan Ana Tautaeka n Uea te Atua nakoia aomata aika kaain taian tautaeka nako. Ti kataia ni kaotia n ara taeka ao n ara mwakuri bwa ti bon onimakina Ana Tautaeka n Uea te Atua bwa e na katoki kangaanga n te aonnaba.—Taian Areru 56:11.
Kioina ngkai ti rarawa nakon te iraraure i marenaia tautaeka, ti a katiteuanaaki bwa kaain te botaki n itaritari ae katobibia te aonnaba. (I-Korote 3:14; 1 Betero 2:17) Ni kaitaraan anne, Aaro aika irekereke ma waaki n tautaeka a boni karaurenakoia kaain aia Aro.—1 I-Korinto 1:10.
Karineia taian tautaeka. E ngae ngke ti aki kan riki bwa taan tautaeka, ma ti boni karinea te mwaaka ni kairiri n te aba ae ti maeka iai. E boraoi aei ma ana tua te Baibara aei: “Ke a a aantaeka aomata nako irouia ake a mwiokoaki n te mwaaka n tautaeka.” (I-Rom 13:1) Ti ongeaba n te tua, ti kabwakai ara taekiti, ao ti uataboa ana kakorakora te tautaeka ni karekea te mweraoi nakoia ana aomata. Ti aki boutokai mwakuri ake a ekaanako te tautaeka, ti kakairi n ana taeka n reirei te Baibara are ti na tataro ibukia “ueea, ma ake a kakannato ni kabane,” ao riki ngkana a karaoi babaire ake e kona n rotakibuaka iai te inaomata n taromauri.—1 Timoteo 2:1, 2, kabwarabwara mai nano.
Ti karinea naba riaia tabemwaang ni karaoi aia motinnano ni kaineti ma ana waaki te tautaeka. N te katoto, ti bon aki kamangaoa te rinerine ke n tukiia naake a kan rinerine.
E koaua bwa te iango ae boou arora n tei i nuka? Tiaki ngaia anne. A bon tei naba i nuka ni kaineti ma te mwaaka n tautaeka abotoro ao tabeman riki Kristian n te moan tienture. E taekinaki ae kangai n te boki ae Beyond Good Intentions: “E ngae ngke a kakoauaa Kristian ake rimoa bwa a kabaeaki bwa a na karineia kaain te tautaeka, ma a aki kakoauaa ae a na uataboa te waaki n tautaeka.” N aron anne, e taekinaki naba n te boki ae On the Road to Civilization bwa Kristian rimoa a bon aki “kan riki bwa taan tautaeka.”
E na karuanikaia mweraoin te botannaomata teira i nuka ni kaineti ma waaki n tautaeka? E bon aki. Boni kaain te aba ngaira aika ti tatangira ao bon akea te bwai ae a na maaku iai taan tautaeka. Iangoa te ribooti n 2001 man te National Academy of Sciences of Ukraine. E taekinaki iai aei ibukin teira i nuka ni kaineti ma waaki n tautaeka: “Ni boong aikai ao a bae tabeman n ribaa aroia Ana Tia Kakoaua Iehova aei. Bon aei raoi bukini kabuakakaaia n te tautaeka n Nazi ao ni Komuniti n taai aika nako.” Ma e ngae ngke a mena i aan te Soviet ae tuamatoa taani Kakoaua, ma a bon “teimatoa naba n noraki bwa kaain te aba aika ongeaba n te tua. A bwabwaina te koaua ao ni kakaonimaki ni mwakuri n taabo ake a kawakinaki iai maan ao n taabo ni bitineti ni kaineti ma te ununiki, ao akea te karuanikai ae noraki nakon te Tautaeka ni Komuniti.” N aron naba anne ni boong aikai, e kangai motikan te ribooti anne: aia koaua ao aia mwakuri Ana Tia Kakoaua Iehova e bon aki kamamaraa mweraoin ao onimakinan te tautaeka teuana ma teuana.”