Tera te Rabwata n Tautaeka Ibukia Ana Tia Kakoaua Iehova?
Te Rabwata n Tautaeka bon te kurubu ae uarereke ae kaainaki irouia Kristian aika ikawai n te onimaki ake a kakaraoi babaire ibukia Ana Tia Kakoaua Iehova ni katobibia te aonnaba. Bon uoua iteran aia mwakuri:
A tararuaa katauraoan te kaetieti ae boto i aon te Baibara are a taekinaki rinanoni booki, bobotaki n taromauri, ao aia kuura n reirei Ana Tia Kakoaua Iehova.—Ruka 12:42.
A tararuai aia mwakuri Ana Tia Kakoaua Iehova ni katobibia te aonnaba, n aroia ni karaoi babaire ibukin te mwakuri ni minita n ana tabo te botannaomata, ao a tararuaa naba aroni kamanenaani bwaintangira.
E kakairi te Rabwata n Tautaeka n aia katoto “abotoro ma unimwaane ake i Ierutarem” n te moan tienture, ake a karaoi babaire aika kakawaki ibukia ekaretia ni Kristian ni kabane. (Mwakuri 15:2) N aroia mwaane akana kakaonimaki akanne, kaain te Rabwata n Tautaeka bon tiaki naba mataniwi n ara botaki. A onimakina te Baibara ibukini kairiraia, ao a ataia ae Iehova ae te Atua e a tia n rinea Iesu Kristo bwa Atun te ekaretia.—1 I-Korinto 11:3; I-Ebeto 5:23.
Antai kaain te Rabwata n Tautaeka?
N Tianuare 2018 ao kaain te Rabwata n Tautaeka bon Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson, ao David Splane. A boni beku naakai ni kautun ara botaki i Warwick, i New York, n te U.S.A.
Tera aroni bairean ana mwakuri te Rabwata n Tautaeka?
E a tia te Rabwata n Tautaeka ni katei komete aika onoua ibukin tararuaan iteran nako ara mwakuri aika kakaokoro, ao a beku kaain te Rabwata n Tautaeka n tatabemania nako ni kaka teuana te komete ke e bati riki mani komete aikai.
Te Komete Ibukini Kanakoraoani Babaire: E tabe ma tararuaani baika irekereke ma te tua, kabuanibwai aika karina, baika riki ike a a bwainikirinaki iai kaain ara botaki ibukin aia koaua n aia Aro, ao kangaanga aika karina aika rotaki iai Ana Tia Kakoaua Iehova.
Te Komete ae Tabeakinia Taani Beku: E tabe ma baireaia kaain te utu ni Betaera.
Te Komete ae Tabeakina te Boreeti: E tararuaa boreetian ao karorokoan ara boki aika aanaki n te Baibara irouia taari nako, ao kateitei ibukin taabo n taromauri, aobiti n raitaeka, ao aobiti n tararua ma bwaina nako.
Te Komete Ibukin te Mwakuri: E tararuaa ara mwakuri n tataekina te ‘rongorongo ae raoiroi ae taekan te Tautaeka n Uea.’—Mataio 24:14.
Te Komete Ibukin te Angareirei: E tabe ma katauraoan te kairiri man te Baibara rinanoni bobotaki n taromauri, kuura n reirei, ao bwanaa ao taamnei aika raweaki.
Te Komete Ibukin Rongorongo: E tararuaa katauraoani kaetieti ibukin te onimaki aika koreaki ke a kanakoaki n taiani kaombiuta n ara atureti ae kakawaraki, ao e tararuaa naba te mwakuri n raitaeka.
Irarikin ana mwakuri te Rabwata n Tautaeka rinanoia komete aikai, e boni boowi naba ni katoa wiki ibukin iangoani baika kainnanoaki n ara botaki. N ana boowi aikai, a mamaroroakina te bae e taekinaki n te Baibara, ao a kariaia taamnein te Atua bwa e na kaiririia bwa a na boraoi n iango ni karaoan aia motinnano.—Mwakuri 15:25.
Antai taan ibuobuoki nakon te Rabwata n Tautaeka
Boni Kristian aika kona n onimakinaki aika katoamaua aia mwakuri komete n te Rabwata n Tautaeka. (1 I-Korinto 4:2) Bon iai aia konabwai ao wanawanaia n te mwakuri ae tararuaaki iroun te komete are a mena i aana, ao a iririi aia boowi ni katoa wiki. E ngae ngke a aki ibuokanibwai taan ibuobuoki aikai ni karaoani babaire, ma a boni katauraoi taeka n reirei aika kakawaki ao rongorongo tabeua, a mwakuria kanoan aia babaire komete, ao n tuoi mwini mwakuri aikai. A kona naba ni mwiokoaki iroun te Rabwata n Tautaeka bwa a na kawariia taari n aaba tabeua, ke a na karaoi botaki tabeua n aron botaki aika katoa ririki ke aia angabeeba kaain te Kuura ni Kireata.
Te komete |
Te ara |
---|---|
Tabe ma Kanakoraoani babaire |
|
Tabeakinia taani beku |
|
Tabe ma te Boreeti |
|
Tabe ma te Mwakuri |
|
Tabe ma te Angareirei |
|
Tabe ma Rongorongo |
|