A teimatoa ni karikirakea aia reitaki ae kaan i marenaia aomata aika iraorao. E kaoira te Atua bwa ti na taetae nakoina ao ni kauka naba kawaira ni karekean ara iraorao ae kaani ma ngaia. E taku: “Kam na maneweai, ao kam na nako n tataro nako Iu, ao N na ongo i roumi.” (Ieremia 29:12, BG) Ngkana kam maroro ma te Atua ao ane kam na ‘kaaniaki [mangaia] ao ane e na kaaningkami.’ (Iakobo 4:8) Ti kaungaaki n te Baibara ni kangai: “E a kaan Iehova nakoia akana weteia ni kabaneia.” (Taian Areru 145:18, BG) Ngkana ti teimatoa n tataro nakoina, e na rikirake ao ni korakora ara iraorao ma ngaia.

E taku Iesu: “Antai i buakomi ae butiaki iroun natina kanana te kariki, ao e na anganna te atibu? Ke tao e butiia te ika, ao e na anganna te naeta? Mangaia are e ngae ngke kam buakaka ma kam ataa te angania natimi bwaintangira aika raraoi, ao ai batira riki ngkanne nanon Tamami are i karawa ni kan anga bwaintangira aika raraoi nakoia akana butiia!” (Mataio 7:9-11) Eng, e kaoira te Atua bwa ti na tataro ibukina bwa ‘e mumutiakinira.’ (1 Betero 5:7) E kaoko naba bwa ko na kaotii am kangaanga nakoina. Ti tuangaki ae kangai n te Baibara: “Tai raraomaeakina te bwai teuana, ma a na kaotaki ami bubutii ni bwaai ni kabane nakon te Atua, n te tataro ma te kakorakora n tataro ni bubutii n raonaki n te katituaraoi.”—I-Biribi 4:6.

A a ataia te koraki ake a mwaatai n anuaia aomata, bwa a boni kainnanoa naba te tataro aomata aika mirion ma mirion mwaitiia. A irekereke naba iai aomata aika kakeaa te Atua ao aika a nanououa n aroaron te Atua. * E oti n aei bwa a boni kainnanoa te Atua aomata nako. E taku Iesu: “A a kukurei akana ataia bwa a kainnanoa te Atua.” (Mataio 5:3) Ngkana ti katoatai n reitaki ma ngaia, e na kona ni buokira n te bae ti kainnanoia.

Baikara kakabwaia aika ti na karekei mani butimwaean ana kakao te Atua ae ti na tataro nakoina?