Titiraki Mairouia Taani Wareware
Antai te “aine” are e taekinaki n Itaia 60:1, ao e kangaa neiei n “teirake” ao ni “kaotaa te oota”?
E kangai Itaia 60:1: “Teirake ngkoe ae te aine, kaotaa te oota, bwa e a roko am oota. E a oota i aom mimitongin Iehova.” E kaotaki ni bwaninin te rongorongo bwa te “aine” e tei ibukin Tion, ke Ierutarem are kautun Iuta n te tai arei. a (Ita. 60:14; 62:1, 2) E tei te kaawa ibukin te natannaomata ni kabane. A ueke titiraki aika uoua n ana taeka Itaia: Te moan, n ningai ao e kangaa Ierutarem n “teirake” ao ni kaotaa te oota ni kaikonaki? Te kauoua, iai kakororaoan ana taeka Itaia aikai aika kakawaki riki n ara bong aikai?
N ningai ao e kangaa Ierutarem n “teirake” ao ni kaotaa te oota ni kaikonaki? E urubekebeke Ierutarem ao ana tembora ngke a tauaki I-Iutaia bwa taenikai i Baburon i nanon 70 te ririki. Ma imwini bwakani Baburon irouia I-Miria ma I-Botia ao a inaomata tibun Iteraera ake n aonon nako te Embwaea ni Baburon n okiri oin abaia ao ni kaoka te taromauri ae koaua. (Etira 1:1-4) Ni moan 537 B.C.E., ao a okira abaia nikira aika kakaonimaki ake mani baronga aika 12. (Ita. 60:4) A anga taiani karea nakon Iehova, a bukamarui Tooa, ao ni manga katea te tembora. (Etira 3:1-4, 7-11; 6:16-22) E a manga oota naba mimitongin Iehova i aon Ierutarem, ae taekaia ana aomata ake a kaokaki nakon abaia. Ao naakai a manga riki bwa nibwan te oota nakoia te natannaomata ake a aki kinaa Iehova.
Ma a tii kakororaoaki tabeua nanon ana taetae ni burabeti Itaia ibukini manga kaokani bwaai nakon aroia i Ierutarem rimoa. A aki teimatoa n ongeaba tibun Iteraera iroun te Atua. (Neem. 13:27; Maraki 1:6-8; 2:13, 14; Mat. 15:7-9) Imwina riki, a rawa naba ni butimwaea te Mesia ae Iesu Kristo. (Mat. 27:1, 2) N 70 C.E., ao e a uruakaki Ierutarem ao ana tembora te kauatai.
Bon Iehova ae taekina rikin te kabuanibwai anne. (Tan. 9:24-27) E mataata raoi bwa tiaki ana kantaninga Iehova bwa e na kakororaoaki ni kabane taetae ni burabeti ake n Itaia mwakoro 60 ibukini manga kaokani bwaai, i Ierutarem are i aon te aba.
Iai kakororaoan ana taeka Itaia aikai aika kakawaki riki n ara bong aikai? Eng iai, ma e kaineti nakon te aine ni kaikonaki ae taekan “Ierutarem are i eta.” E korea ae kangai te abotoro Bauro ibukin neiei: “Boni ngaia tinara.” (IKar. 4:26) Ierutarem are i eta bon taekan ana botaki te Atua i karawa ae kaainaki irouia anera aika kakaonimaki. Natin neiei bon Iesu ao Kristian aika kabiraki aika 144,000 aika kantaningaa te nako karawa n aroni Bauro. A riki Kristian aika kabiraki bwa “te natannaomata ae itiaki,” ae “ana Iteraera te Atua.”—1Bet. 2:9; IKar. 6:16.
E kangaa Ierutarem are i eta n “teirake” ao “ni kaotaa te oota”? E karaoa anne rinanoia natina aika kabiraki aika n te aonnaba. Kabotaua te baere a rinanona ma are taetae ni burabetinaki n Itaia mwakoro 60.
A riai n “teirake” Kristian aika kabiraki ibukina bwa a a tia ni mena ngkoa i nanon te rotongitong ni kaineti ma te onimaki, ngke e rikirake te tannako man te koaua imwini mateia abotoro n te kauoua n tienture C.E. (Mat. 13:37-43) Ngaia are a a riki bwa taenikai irouni Baburon ae Kakannato ae te botaki n Aro ae kewe ae katobibia te aonnaba. A teimatoa n riki bwa taenikai nikiraia taani kabiraki ni karokoa “tain tokin te waaki ae ngkai i aon te aba,” ae te tai ae moanaki n te ririki 1914. (Mat. 13:39, 40) N te tai ae waekoa imwin anne n 1919, ao a a kainaomataaki ao ni waekoa ni kaotaa te oota n te aro ni kaikonaki, n aroia n anga ngaiia ibukin te mwakuri n uarongorongo. b I nanon ririki aika bati, ao a a tia ni karekea te oota anne aomata man natannaomata nako, n ikotaki ma nikiraia kaain ana Iteraera te Atua aika ueea ake a taekinaki n Itaia 60:3.—TeKao. 5:9, 10
N taai aika imwaira, ao a nang kabutaanako te oota are mairoun te Atua Kristian aika kabiraki n te aro ae rianako riki. N te aro raa? Ngkana e toki aia tai maiu i aon te aonnaba, a nang riki ngkanne bwa kaain te “Ierutarem ae Boou,” ke buuni Kristo aika ueea ao ibonga aika 144,000.—TeKao. 14:1; 21:1, 2, 24; 22:3-5.
E na kakororaoaki nanon Itaia 60:1 rinanon te Ierutarem ae Boou. (Kabotaua Itaia 60:1, 3, 5, 11, 19, 20 ma Te Kaotioti 21:2, 9-11, 22-26.) N aroni ngkoa are e riki Ierutarem are i aon te aba bwa nibwan te tautaeka n Iteraera rimoa, ngkanne e na riki naba Ierutarem ae Boou ma Kristo bwa taan tautaeka n te waaki ae boou. E kangaa Ierutarem ae Boou n “ruo mai karawa mairoun te Atua”? Man arona ni karaoa ana mwakuri ae a rotaki iai kaain te aonnaba. “A na nakonako . . . n ootana” aomata aika mamaaka te Atua man natannaomata nako. A na kainaomataaki naba man te bure ao te mate. (TeKao. 21:3, 4, 24) N te tai anne a nang “manga [kaokaki] bwaai ni kabane nakon aroia rimoa” n aron are e a kaman taekinna Itaia ao burabeti riki ake tabemwaang. (Mwa. 3:21) E moanaki manga kaokani bwaai ngke e riki Kristo bwa te Uea ao e na toki n tokin ana Tautaeka ae Maanna Tenga te Ririki.
a N Itaia 60:1 ao e kamanenaaki te taeka ae te “aine” n Te Baibara ae Tabu te Rairai ae te Aonnaba ae Boou n oneani mwin “Tion,” ke “Ierutarem,” ibukina bwa te weabe n te taetae n Ebera ibukin te taeka ae “teirake” ao “kaotaa te oota” a kaineti nakon te aine, n aron naba te taeka ae “ngkoe.”
b E kabwarabwaraaki naba n Etekiera 37:1-14 ao Te Kaotioti 11:7-12 taekani manga kaokan te taromauri ae itiaki are moanaki n 1919. E a kaman taekina Etekiera manga kaokan aroia Kristian aika kabiraki imwini kataenikaiaia ni kaineti ma te onimaki i nanon te tai ae rangi ni maan. E kaineti te taetae ni burabeti are n Te Kaotioti nakoni manga bungiakin te kurubu ae uarereke ae kaainaki irouia taari mwaane aika kabiraki ake a kairiri imwin te tai ae maan teutana are e toki iai aia mwakuri ibukini kabureaia ae e aki eti. N 1919, a a mwiokoaki bwa “te toro ae kakaonimaki ma ni wanawana.”—Mat. 24:45; nora Te Taromauri ae Itiaki Ibukin Iehova—E a Kaokaki!, bar. 118.
