Ko Ataia?
E kangaa ni boutokaaki etin te Baibara, ni buriki ao n aanga ni karao buriki ake a kuneaki i buakoni mwin uruakini Baburon?
A A TIA taan rabakau ni bwain aantano, ni kunei bwaini Baburon rimoa aika rangi ni bati, aika buriki aika umunaki ake e kateaki iai te kaawa aei. E taku te tia rabakau ni bwain aantano ae Robert Koldewey, bwa a karaoaki aeka ni buriki aikai ni nnen te ai ae mena “i tinanikun te kaawa, ae raoiroi iai te bokaboka ao kanaan te ai . . . ae rangi ni bati.”
E kaotaki n rongorongon rimoa bwa a kakabongana nnen te ai aei kaain te tautaeka ni Baburon ibukin te bwai ae rangi ni buakaka. E kangai Paul-Alain Beaulieu, ae te tia rabakau i aon rongorongon Aturia ma taetaena, man te Reirei ae Rietata i Toronto: “Tabeua koroboki mai Baburon . . . e oti iai kabuekaia aomata i aan ana tua te uea ibukin aia bure ni karitei ke aki karinean te bwai ae tabu.” Te koroboki teuana are man ana tai te Uea ae Nebukaneta, e oti iai te kibuntaeka aei: “Kamaunaia, kabuekiia, umunia, . . . Uotiia nakon nnen te ai . . . kawaerakea bubuia ao karenakoia iai ni kamateia.”
A kauringaki n aei taani wawareka te Baibara te rongorongo are n Taniera mwakoro 3. Ti wareka iai taekan te Uea are Nebukaneta ni katea te boua ae karaoaki man te koora, i aon te tabo ae aoraoi ae Ruura, i tinanikuni Baburon. N te tai anne ao a rawa ataeinimwaane aika teniman aika taian Ebera aika Tiateraka, Metiaka, ao Abeteneko, ni bobaraaki nakon te boua, ike e a rangi n un iai Nebukaneta, ao n tua bwa e na karakaaki riki “kabuebueni nnen te ai arei itiua te tai nakon are bon arona,” ao ni kairaki mwaane aika teniman aikai ni “karenakoaki . . . nako nanoni nnen te ai ae uramwaaka.” A kamaiuaki iroun te anera ae korakora.—Tan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Te buriki ae umunaki ae mwakoro iai aran Nebukaneta
E boutokaaki naba etin rongorongo aika n te Baibara ni burikini Baburon. A bati i buakoni buriki aikai aika mwakoro i aoia taeka aika kamoamoaa te uea. E kangai te koroboki teuana: “Nebukaneta bon Ueani Baburon . . . Te baareti, boni nnen au Toka ae I kateia . . . A bia tautaeka iai n aki toki kanoau.” E kuri n titeboo te koroboki aei ma are n Taniera 4:30, are e kamoa iai Nebukaneta ni kangai: “Tiaki boni Baburon ae Kakannato aei ae I boni kateia ibukin ana auti te uea n oini korakorau ma mwaakau, ao ibukini kakannaton karineau?”
