E karika rabwatara te Atua ma te konabwai ae kamimi ni kona ni kamarurungnga i bon irouna. Ngkana e ikoaki rabwatara, e nananga, ke e teke, “e a mwakuri naba ni bairea kamaoan te maneka ae bubura ke ae uarereke.” (Johns Hopkins Medicine) E waekoa te rabwata ni mwakuria katokan te raraa, kabuburaan taian ia, kamaoan te maneka, ao ni kakorakoraa te iriko are ikoaki.

IANGOA AEI: Ngkana e karaoa rabwatara te tia Karikiriki bwa e na boni kona ni kamaoa ikoakina, tiaki ngkanne ti kona n onimakina raoi ana berita ae e kona ni kamarurungira naba man te uruakinnano? E korea ae kangai te tia areru: “E kabebeteia akana uruaki nanoia, ao e bautii ikoakia.” (Taian Areru 147:3) Ma ngkana ko taonaki n te rawawatannano, ko na kangaa ni koaua raoi bwa e na bauta ikoakim Iehova, ngkai ao n te tai ae e na roko?

E berita ni kangai te Atua: “Tai maaku bwa I memena iroum. Tai raraoma bwa bon Atuam ngai. N na kakorakorako, eng, N na buokiko.” (Itaia 41:10) Te aomata ae ataia bwa e mwannanoaki iroun Iehova, e rau nanona ao e kona n nanomwaaka i aani kataaki aika kakaokoro. E atonga te rau n te nano aei te abotoro Bauro bwa “te rau are mairoun te Atua ae riaon aia iango aomata.” E reitia Bauro ni kangai: “I konai bwaai ni kabane ni karaoi iroun teuare anganai te korakora.”—I-Biribi 4:4-7, 9, 13.

E buokira te Baibara ni kakorakoraa onimakinan ana berita nako Iehova ibukia aomata n taai aika imwaira. N te katoto, e tuangira Te Kaotioti 21:4, 5 (e oti kanoana n te iteraniba ae imwina) te bae E na karaoia ao bukina ngkai ti kona n onimakinna bwa e na boni karaoia:

• “E na kaoa te rannimata ni kabane” mai mataia aomata. E na kamaunai rawawatara ni kabane Iehova ao raraomara, e ngae naba ngkana rawawatara akanne a taraa n aki kakawaki irouia tabemwaang.

• Te Uea ae Moan te Mwaaka ae karikii bwaai nako are “tekateka i aon te kaintokanuea” i karawa ma te mimitong, e na kaota mwaakana ni katoka te rawawata ao ni karekei baika ti kainnanoi.

• E karaui nanora Iehova bwa a ‘kakaonimaki ao a koaua’ ana berita nako. Ibukin anne, e a karekea atongana bwa te Atua ae koaua bwa e kakakoroi bukin ana berita.

“‘E na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki. A a mauna bwaai rimoa.’ Ao e taku Teuare tekateka i aon te kaintokanuea: ‘Noria! I a kabooui bwaai ni kabane.’ Ao e a manga kangai: ‘Korei, bwa a kakaonimaki taeka aikai ao a koaua.’”​—Te Kaotioti 21:4, 5.

E oti anuan ao aroaron Tamara are i karawa n te karikibwai ao n te Baibara. E ngae ngke e aki teretere n te karikibwai te kakao ae ti na ataa te Atua ao n riki bwa kaanga Raoraora ni kaan, ma e katerea te Baibara te kakao anne ni kangai: “Kaania te Atua, ao ane e na kaaningkami.” (Iakobo 4:8) E kangai Mwakuri 17:27: “E bon aki raroa mairoura n tatabemanira nako.”

Ngkai ko a tabe ni kikinaa te Atua, ko na kakoauaa riki ae e ‘mumutiakiniko.’ (1 Betero 5:7) Baikara kakabwaia aika kona n reke man onimakinan Iehova?

Iangoa aron Toru mai Tiaban. E kaikawaaki teuaei iroun tinana ae te Kristian, ma e a manga irekereke ma aia waaki n iowawa kaain te kaeng ae te yakuza, ke te Mafia mai Tiaban. E taekina aei, “I kakoauaa ae e ribaai te Atua, ao I namakinna ae mateia raoraou riki naake I rangi n tangiriia, boni katuuaaeau.” E taekinna Toru bwa kaainakin te kaeng aei ae bati iai kani kakaraoan ae buakaka, e a riki iai bwa “te aomata ae akea ana tangira ao ana nanoanga.” E ururing rikaaki ni kaineti ma aroarona are e kakaraoia ao e taku: “I kani moantaai ni mate imwin tiringan temanna ae rangi n tanoata riki taekana nakoiu bwa I aonga ni kamoamoaaki iai.”

Ma ngke a uaia n reiakina te Baibara Toru ma buuna ae Hannah, ao e a rangi ni bitaki maiun teuaei  ma ana iango. E taku Hannah: “I nora raoi bitakini maiuni buu.” E taku Toru ma te aki nanououa: “Bon iai te Atua ae mwamwannanoira n tatabemanira nako. E aki tangira maten temanna, ao e kani kabwarai aia bure naake a rairi raoi nanoia man aia kairua. E ongoraei baika ti aki kona n tuangia tabemwaang bwa tii ngaia, ae baika akea ae e kona n ota iai. N te tai ae e a kaan roko ao Iehova e nang katoki kangaanga ni kabane, te rawawata, ao te maraki. E boni buokira naba ngkai n aanga aika ti aki kantaningai. E tangirira ao e buokira ngkai ti mangori.”—Taian Areru 136:23.

N aron ae oti n te baere e rinanona Toru, ataakin ae e kona te Atua ni katoki kabuanibwai ao e nang waekoa ni kamaunai ao ni kaoi rannimata, e aki tii anganira te kantaninga ibukin taai aika a na roko, ma e buokira naba ni kanakoraoa maiura ngkai. Eng, e ngae ngke e a on te aonnaba aei n te rawawata, ma ko boni kona ni kakabwaiaaki n ana mwamwannano te Atua.