E a kerikaaki bwainan te aroaro ae riai. A tatakarua aoraki aika akea aia katei nakoia taokita, a taetae ma te un taan amwarake n te kirabu nakoia touati, a iowawa nakoia taani mwakuri n te wanikiba bwatintia aika akiako, a kaenaena ataei aika rawa ni kairaki, a karaoi mwakuri ni kakamaaku ao n iowawa nakoia taan reirei, a babakanikawai tabeman taan tei n te tautaeka ao a kakan raoiroi taan tei ake tabeman.

 Te Baibara boni kairani kawaira ae kona n onimakinaki ni kaineti ma bwainan te aroaro ae riai. E kabwarabwaraaki naba iai bukini karakon bwainan te aroaro ae riai ni boong aikai.

 Kerikaakini bwainan te aroaro ae riai ae taekan te aroaro ae raoiroi, ae itiaki ao ae tau ni bwainaki​—e a noraki rikina ni katobibia te aonnaba.

•   Ni kaineti ma te rinerine ni kaoti iango mairouia te Botannaomata, ao a katautaua I-Amerika bwa e a rangi ni kerikaaki riki ngkai te aroaro ae riai n te United States, ni kabotauaki ma 22 te ririki n nako.

•   N te kakaae teuana are karaoaki nakoia aomata aika raka i aon 32,000 mwaitiia n aaba aika 28, ao a taekinna 65 te katebubua man te mwaiti anne bwa a noria ae e a rangi ni karako mwaitiia aomata aika maiuakina te aroaro ae riai ni boong aikai.

 E a kaman taekinaki n te Baibara rikin te aroaro ae ti a noria ni boong aikai.

•   “A na roko taai aika kangaanga ni kabaneani boong. A na riki aomata bwa taani bangaomata, taan nanonrang, taani kamoamoa, ao taani kainikatonga. A na aki ataa te katei, a na aki ongeaba irouia aia karo, a na aki kaotiota te kakaitau, . . . a na aki bwabwaina te akoi, ao a na iowawa.”​—2 Timoteo 3:​1-3, Good News Translation.

 Ibukini karekean riki te rongorongo ni kaineti ma kakoroani bukin te taetae ni burabeti aei, wareka te kaongora ae “Did the Bible Predict the Way People Think and Act Today?”

 Mirion ma mirion mwaitiia aomata ake a a tia ni kunea bwa te Baibara bon te bwai ni kairiri ae te kabanea n tamaroa ibukin te aroaro ae riai, e ngae ngkai ti maeka n te aonnaba ae e a kerikaaki iai bwainan te aroaro anne. Kaetieti ake iai ibukini bwainan te riai, boni baika “a kona n onimakinaki n taai nako, ngkai ao n aki toki.” (Taian Areru 111:8) Iangoi katoto tabeua:

•   Te bwai ae e taekinna te Baibara: “Bwaai ni kabane aika kam tangiriia aomata bwa a na karaoi nakoimi, kam riai n karaoi naba nakoia.”​—Mataio 7:12.

   Nanona: Ti riai ni bwabwaina te akoi ao te karinerine nakoia aomata, n aron ae ti tangiria bwa e na karaoaki nakoira.

•   Te bwai ae e taekinna te Baibara: “Ngkai kam a tia ni kaaki te mwamwanaa te aba, ao ke e atoatonga te koaua temanna ma temanna nakon raona.”​—I-Ebeto 4:25.

   Nanona: Ti riai ni bwabwaina te koaua ni baike ti taekin ao ni karaoi.

 Ibukini karekean riki rongorongona, taiaoka wareka:

•   Te Taua n Tantani ae atuna “E Eti ao E Kairua​—Te Bwai ni Kairiri ae Ko Kona n Onimakinna.”

•   Te kaongora “Tolerance​—How the Bible Can Help.”