E tangirira Iehova bwa ti na ‘kawakina te kakaonimaki.’ (Mika 6:8) E rangi ni kakawaki riki anne n tekatekam n taanga imwini marem ibukina bwa ngkana ko aki kakaonimaki ao ko aki kona n onimakinaki. Ao e rangi ni kakawaki te onimakinaki ibukini kateimatoaan te tangira.

Ni boong aikai, e a mamaara bwainan te kakaonimaki n te tekateka n taanga imwin te mare. Ko riai ni motinnanoia bwa ko na karaoi baika uoua aikai ngkana ko na kateimatoa tekatekam n taanga imwini marem.

TE BAE E TAEKINAKI N TE BAIBARA: “[Kakoauaa] raoi bwa baikara bwaai aika kakawaki riki.” (I-Biribi 1:10) Tekatekam taanga imwini te mare Bon teuana mai buakoni baika a rangi ni kakawaki ni maium, ngaia are e riai ni moanibwaiaki.

E tangiriko Iehova bwa ko na kaatuua am iango irouni buum ao n “tekateka ni kamareirei” ma ngaia. (Te Minita 9:9, BG) E katereterea bwa ko aki riai ni kakeaa bongani buum ma kam riai n ukeri aanga aika kam na kukurei iai. (1 I-Korinto 10:24) Karaoa ae e na namakinna buum bwa ko kainnanoia ao ko kukurei irouna.

TE BAE KO KONA NI KARAOIA:

• Taraa raoi am tai ae ko riai ni kabanea ma buum ao ni kaota raoi tabeakinana

• Iangoia bwa ko na taekina “ngaira” n oneani mwini “ngai”

TE BAE E TAEKINAKI N TE BAIBARA: “Ane teimatoa n tarataraa te aine n iango i nanona bwa e kani wene n taanga ma ngaia, ao e a tia ni wene ni kimoa ma ngaia i nanona.” (Mataio 5:28) Ngkana iai ae e teimatoa n iaiangoi aroaro aika kammaira, n etina e aki kakaonimaki nakoni buuna.

E taku Iehova bwa ko riai ni “kawakina nanom.” (Taeka N Rabakau 4:23, BG; Ieremia 17:9) Ni karaoan aei, ko riai ni kawakina matam. (Mataio 5:29, 30) Kakairi n ana katoto te baatua ae Iobi are karaoa te berita ma matana bwa e na aki tarataraa te teinnaine. (Iobi 31:1) Motinnanoia bwa ko na aki matakuakina te bwaitingako. Ao kakorakorako n rarawa n iraorao ni karekenano ma te aomata ae tiaki buum.

TE BAE KO KONA NI KARAOIA:

• Ko riai ni kaotia nakoia aomata ae ko kakaonimaki ni koaua nakoni buum

• Iaiangoa ana namakin buum ao katoka am iraorao ae na kona ni karawawataa buum