LÉSON 01
Kouman Labib-a pouvé idé ou ?
Nou tout ka pozé nou kò késyon asou lavi-a, soufrans-ya, lanmò-a ouben asou sa dimen ké poté. Nou tout gen bagaj ki ka enkyété nou touléjou : parèkzanp, kouman nou pouvé bay nou fanmi sa i bézwen pou viv é pou i gen tchò kontan. Bokou moun wè ki Labib-a ka réponn késyon enpòrtan asou lavi-a é ki i ka idé yé annan yé lavi. É ou menm, ès ou ka pansé ki Labib-a pouvé idé nou ?
1. Labib-a ka bay répons asou ki késyon ?
Labib-a ka bay répons asou sa késyon enpòrtan-yan : Kouman lavi-a koumansé ? Poukisa nou asou latè-a ? Poukisa moun inosan ka soufri ? Kisa ki ka pasé apré lanmò ? Tout moun lé viv byen ké ròt moun-yan atò poukisa i gen patché lagèr ? Kisa latè-a ké divini ? Sa nòrmal pozé nou kò sa késyon-yan. A sa milyon moun fè é yé té vréman kontan trouvé répons-ya annan Labib-a.
2. Ès Labib-a pouvé idé ou annan ou lavi ?
Annan Labib-a i gen patché bon konsèy. Parèkzanp, i ka idé fanmi-ya gen tchò kontan. I ka bay konsèy pou nou pa enkyété tròp é pou nou kontan travay nou ka fè-a. Ou ké wè annan sa ti liv-a sa Labib-a ka anprann nou asou sa zafè-ya ké patché ròt bagaj ankò. Asiré pa pitèt, nou kozé ké idé ou konprann ki ‘tousa ki marké annan Ékritir-a [sa lé di sa i gen annan Labib-a] pouvé itil pou ou’ (2 Timothée 3:16).
Sa liv-a ka ankourajé ou étidyé Labib-a, mé i pa ka pran so plas. A pou sa nou ka envité ou li vèrsé-ya ki annan léson-yan é gadé wè si yé ka alé ké sa ou ka anprann.
ANNOU FOUYÉ ANNAN LABIB-A
Annou wè kouman Labib-a idé moun, sa ou pouvé fè pou pran plézi li Labib-a é poukisa sa byen ki roun moun idé ou konprann sa Labib-a ka di.
3. Labib-a pouvé montré nou bon chimen-an
Labib-a kou roun lanp ki ka kléré byen fò. I pouvé kléré nou pou nou rivé pran désizyon ki bon, épi gras a li nou savé sa dimen ké poté.
Li Psaume 119:105 épi kozé asou sa késyon-yan :
-
Kisa moun-an ki ékri sa psaume-an té ka pansé di Labib-a ?
-
É ou menm, kisa ou ka pansé di Labib-a ?
4. Labib-a ka réponn késyon nou ka pozé nou kò
Roun madanm trouvé annan Labib-a répons asou késyon i té ka pozé so kò dipi plizyèr lannen. Gadé VIDÉYO-a épi kozé asou sa késyon-yan :
-
Ki késyon sa madanm-an té ka pozé so kò ?
-
Kouman étid Labib-a idé l’ ?
Labib-a ka ankourajé nou pozé nou kò késyon. Li Matthieu 7:7 épi kozé asou sa késyon-an :
-
Ki késyon ou ka pozé ou kò é ou té ké kontan trouvé répons-ya annan Labib-a ?
5. Ou pouvé pran plézi li Labib-a
Bokou moun kontan li Labib-a é yé ka di ki sa ka fè yé santi yé kò byen. Gadé VIDÉYO-a épi kozé asou sa késyon-yan :
-
Annan sa vidéyo-a, ès jennjan-yan kontan li ?
-
Mé poukisa yé kontan li Labib-a ?
Sa nou ka anprann annan Labib-a ka konsolé nou é ka bay nou roun èspwar. Li Romains 15:4 épi kozé asou sa késyon-an :
-
Ès sa ka entérésé ou konnèt plis bagaj asou konsolasyon ké èspwar Labib-a ka palé-a ?
6. Sa pi fasil konprann Labib-a lò roun moun ka idé nou
Bokou moun kontan li Labib-a, mé anplis di sa yé ka trouvé ki kozé ké rounòt moun asou sa yé ka li ka idé yé. Li Actes 8:26-31 épi kozé asou sa késyon-an :
-
Kouman nou pouvé konprann Labib-a ? (Gadé vèrsé-ya 30 ké 31).
Mouché Étchopyen-an té bézwen roun moun idé l’ konprann sa i té ka li. Jòdla osi bokou moun ka trouvé sa itil kozé asou Labib-a ké ròt moun.
I GEN MOUN KA DI : « Étidyé Labib-a pa ka sèrvi anyen, a pédi so tan. »
-
É ou menm, kisa ou ka pansé ? Poukisa ?
SA NOU WÈ
Labib-a gen bon konsèy pou tout sitiasyon nou ka jwenn, i ka réponn késyon enpòrtan asou lavi-a, i ka konsolé nou é i ka bay nou roun èspwar.
Kisa ou anprann
-
Ki konsèy nou ka trouvé annan Labib-a ?
-
Bay déztrwa késyon Labib-a ka réponn.
-
Kisa ou té ké kontan Labib-a anprann ou ?
SA OU POUVÉ TRAPÉ OSI
Konsèy Labib-a toujou itil jòdla.
« Une sagesse à l’épreuve du temps » (La Tour de Garde no 1 2018)
Labib-a idé roun mouché ki té ka pansé i té sa roun bonnaryen dipi i té toupiti.
Konsèy di Labib ki itil pou fanmi-ya.
« 12 clés du bonheur familial » (Réveillez-vous ! no 2 2018)
Bokou moun ka pansé ki a Bondjé ka dirijé monn-an. Mé ès a vréman sa ? Gadé sa Labib-a ka di.
