LÉSON 4
Jézi Kris : a kimoun ?
1. Di ki koté Jézi té ka vini ?
Jézi pa té kou sé lézòt moun-yan : anvan i fèt asou latè-a, i té ka viv annan syèl-a é i té sa roun lèspri (Jean 8:23). A li Bondjé kréyé an prémyé. É apré, Jézi li menm édé Bondjé kréyé tout sé lézòt bagaj-ya. A li rounso Jéova kréyé dirèktéman. A pou sa Labib-a ka di ki i sa « sèl pitit Bondjé » (Jean 1:14). Yé ka aplé l’ osi « Paròl-a » paské i té sa Pòrt-Paròl Bondjé : Jéova itilizé l’ pou poté diféran mésaj. — Li Proverbes 8:22, 23, 30 ; Colossiens 1:15, 16.
2. Poukisa Jézi vini asou latè-a ?
Bondjé voyé so Pitit asou latè-a : I pran lavi Jézi épi i mété l’ annan vant Mari, roun fanm jwif ki té vyèrj. Atò, papa Jézi pa té sa roun imen (Luc 1:30-35). I vini asou latè-a 1) pou ansényé lavérité asou Bondjé, 2) pou montré nou kouman pou nou fè volonté Bondjé gras a so èkzanp, menm lò nou anba traka é 3) pou bay so lavi parfè « pou péyé ranson-an ». — Li Matthieu 20:28.
3. Poukisa nou bizwen roun ranson ?
Roun ranson a pri pou péyé pou libéré roun moun anba ménas lanmò (Exode 21:29, 30). Jòdla nou ka vini vyé é nou ka mouri. Mé a pa sa Bondjé té prévwè pou nou. Kouman nou savé sa ? Bondjé di prémyé wonm-an Adan ki, si i té ka dézobéyi, i té ké mouri. Atò, si Adan pa té dézobéyi, si i pa té péché, i pa té ké jen mouri (Genèse 2:16, 17 ; 5:5). Labib-a ka anprann nou ki lanmò « antré » annan monn-an akoz di Adan. I bay tout so désandan-yan péché-a ké pinisyon péché-a : lanmò. A pou sa nou bizwen roun ranson pou libéré nou di kondanasyon lanmò nou rousouvwè di Adan. — Li Romains 5:12 ; 6:23.
Kimoun ki té pouvé péyé sa ranson-an é libéré nou di lanmò ? Lò nou ka mouri, nou ka péyé sèlman pou nou pròp péché. Atò, pyès moun enparfè pa pouvé péyé pou péché sé lézòt-ya. — Li Psaume 49:7-9.
4. Poukisa Jézi mouri ?
Jézi pa té kou nou menm : i té parfè. I pa jen fè pyès péché. A pou sa i pa té bizwen mouri pou so péché. A pou péché sé lézòt-ya i mouri. Bondjé montré nou ki i té kontan nou toubonnman : i voyé so Pitit asou latè-a mouri pou nou. Jézi osi montré ki i té kontan nou : i obéyi so papa é i bay so lavi pou nou pròp péché. — Li Jean 3:16 ; Romains 5:18, 19.
Gadé vidéyo Poukisa Jézi mouri ?
5. Kisa Jézi ka fè jòdla ?
Lò Jézi té asou latè-a, i géri sé moun-yan ki té malad, i résisité sé moun mouri-ya, é i édé moun-yan ki té gen problèm. Konsa, i montré sa i ké fè pita pou tout sé moun-yan ki ka obéyi Bondjé (Matthieu 15:30, 31 ; Jean 5:28). Apré lanmò Jézi, Bondjé roubay li lavi, i roudivini roun kréyatir èspirityèl (1 Pierre 3:18). Apré sa Jézi antann « òbò Bondjé a so drèt » jouktan Bondjé bay li pouvwar pou dirijé tout latè-a (Hébreux 10:12, 13). Jòdla i Rwa annan syèl-a. So disip-ya ka anonsé sa bon nouvèl-a asou tout latè-a. — Li Daniel 7:13, 14 ; Matthieu 24:14.
Kou i rwa, titalò, Jézi ké itilizé so pouvwar pou tiré tout sé soufrans-ya ké tout sé moun-yan ki ka fè si i gen soufrans. Tout sa ki gen lafwa annan Jézi é ki ka obéyi l’ ké viv annan roun paradi asou latè-a. — Li Psaume 37:9-11.
