Késyon moun ka pozé
« Fanm »-an yé ka palé annan Isaïe 60:1, a kimoun, é kouman i ka « lévé » é ka « kléré toupatou » ?
Men sa nou ka li annan Isaïe 60:1 : « Lévé, o fanm, épi kléré toupatou, pas to limyèr rivé. Laglwar Jéova ka kléré to. » Sa ki marké anvan ké apré sa vèrsé-a ka montré nou ki sa « fanm »-an, a té Syon ouben Jérizalèm. A té kapital Jida annan lépòk Izayi (Is. 60:14 ; 62:1, 2). Annan sa vèrsé-a, Jérizalèm ka réprézanté tout nasyon Israyèl-a. Mé sa ki marké annan sa vèrsé-a ka mennen dé késyon : Prémyèrman, kitan é kouman Jérizalèm « lévé » épi « kléré toupatou » annan domenn èspirityèl-a ? Dézyèmman, ès profési Izayi ka fèt roun fason ki pi gran ?
Kitan é kouman Jérizalèm « lévé » épi « kléré toupatou » annan domenn èspirityèl-a ? Jwif-ya rété Babilòn pannan 70 lannen, é pannan tout sa tan-an, Jérizalèm ké so tanp té krazé. Mé lò Mèd-ya ké Pèrs-ya pran Babilòn, yé pèrmèt Jwif-ya ki té ka rété Babilòn routounen Jérizalèm pou yé roukoumansé adoré Bondjé kou i lé (Esd. 1:1-4). Donk, an 537 anvan nou lépòk, plizyèr Jwif ki té fidèl é ki té ka vini di 12 ti nasyon Israyèl-a routounen Jérizalèm (Is. 60:4). Yé roukoumansé fè sakrifis pou Jéova, fè lafèt-ya yé té ka fè chak lannen é yé roukonstrwi Tanp-a (Esd. 3:1-4, 7-11 ; 6:16-22). Laglwar Jéova roukoumansé kléré Jérizalèm, sa lé di so pèp. A konsa yé divini kou roun limyèr ki té ka kléré nasyon-yan ki té annan soukou èspirityèl-a.
Mé profési Izayi-ya pa fèt konplètman a sa lépòk-a. Près tout Jwif-ya arété adoré Bondjé (Néh. 13:27 ; Mal. 1:6-8 ; 2:13, 14 ; Mat. 15:7-9). Pita, yé pa menm asèpté Jézi Kris kou Mési-a (Mat. 27:1, 2). An 70 di nou lépòk, yé krazé Jérizalèm ké so tanp roun dézyèm kou.
Jéova té ja di dipi lontan ki sa malò-a té ké rivé (Dan. 9:24-27). Sa ka montré ki i té ja désidé ki a pa té ké Jérizalèm ki té asou latè-a ki té ké réyalizé tout profési-ya ki annan Isaïe chapit 60.
Ès profési Izayi ka fèt roun fason ki pi gran ankò ? Wi, mé a rounòt fanm senbolik ki ka réyalizé sa profési-a : « Jérizalèm laro-a ». Men sa Pòl ékri asou li : « A li ki nou manman » (Gal. 4:26). Jérizalèm laro-a, a parti òrganizasyon Bondjé-a ki annan syèl-a, sa lé di zanj-ya ki fidèl. Pitit sa Jérizalèm-an, a Jézi ké 144 000 wen-yan ki, kou Pòl, gen èspwar viv annan syèl-a. Wen-yan sa « roun nasyon ki sen », « Israyèl Bondjé-a » (1 Pierre 2:9 ; Gal. 6:16).
Kouman Jérizalèm laro-a « lévé » épi « kléré toupatou » ? Grasa so pitit-ya ki wen é ki ka viv asou latè-a. Annou konparé sa yé viv ké profési ki annan Isaïe chapit 60.
Krétyen wen-yan té divèt « lévé » paské, annan 2è syèk-a di nou lépòk, kou Labib té di, « vyé zèrb-a », sa lé di apòstazi-a, kouvri yé é mété yé tout annan soukou èspirityèl (Mat. 13:37-43). A konsa yé divini prizonyé di Gran Babilòn-an, sa lé di tout fo rélijyon-yan yé tout ansanm. É yé rété prizonyé jik « lafen sa monn-an », ki koumansé an 1914 (Mat. 13:39, 40). Roun ti moso tan apré, an 1919, Bondjé libéré yé di Gran Babilòn-an. É lanmenm, yé koumansé kléré moun-yan èspirityèlman, yé mété tout yé fòrs pou préché rwayonm Bondjé-a a. Ké tan-an, moun tout nasyon vin bò d’ sa limyèr-a, é annan yé i gen krétyen wen-yan ki asou latè-a toujou. A « rwa-ya » yé ka palé annan Isaïe 60:3 (Rév. 5:9, 10).
Dimen, krétyen wen-yan ké fè plis moun ankò wè limyèr Jéova-a. Poukisa nou ka di sa ? Lò yé ké mouri, yé ké fè parti di « nouvo Jérizalèm »-an, sa lé di madanm Kris-a ki ka réprézanté 144 000-ya ki ké rwa ké prèt é ki ké travay ansanm ké li (Rév. 14:1 ; 21:1, 2, 24 ; 22:3-5).
Nouvo Jérizalèm-an ké gen roun ròl enpòrtan annan réyalizasyon profési Isaïe 60:1 (konparé Isaïe 60:1, 3, 5, 11, 19, 20 ké Révélation 21:2, 9-11, 22-26). A annan vil Jérizalèm gouvèrnman Israyèl tan-lontan té fika. Menm fason-an, a nouvo Jérizalèm-an ké Kris ki ké gouvèrné monn nouvo-a. Kouman nouvo Jérizalèm-an ki ‘òbò Bondjé ké désann di syèl-a’ ? Lò i ké fè bagaj pou nou asou latè-a. « So limyèr ké gidé » moun tout nasyon ki gen lakrent pou Bondjé. Yé pa ké ni péché, ni mouri ankò (Rév. 21:3, 4, 24). A konsa ‘tout bagaj ké rouviré kou anvan’, kou Izayi ké ròt profèt té anonsé (Actes 3:21). Tout bagaj koumansé rouviré kou anvan lò Kris divini rwa é sa travay-a ké fini lò 1 000 lannen-yan ké bout.
a Ézéchiel 37:1-14 ké Révélation 11:7-12 té anonsé ki an 1919, sèrvitèr Bondjé-ya té ké roukoumansé adoré l’ kou i lé. Profési Ézékyèl ka palé di tout krétyen wen-yan. Yé té ké prizonyé pannan roun bon moman. Mé apré sa, yé té ké roukoumansé adoré Jéova kou i lé. Profési Révélation-an li menm ka palé di roun ti group frè wen ki té ké dirijé pèp Bondjé-a. Yé pa té ké pouvé sèrvi Jéova ké balan pannan roun ti moman paské yé té ké mété yé lajòl san yé pa té fè anyen. Mé apré sa, Bondjé té ké fè yé rouviv annan domenn èspirityèl-a. An 1919, Jéova chwazi sa group-a pou i divini « èsklav fidèl ké avizé-a » (Mat. 24:45 ; gadé Le culte pur de Jéhovah enfin rétabli !, p. 118).
