« Menm si pandémi Kovid-19-a fini, sa pa lé di ki sa maladi-a pa ka malmennen nou lasanté toujou. […] Lò rounòt pandémi ké rivé, é nou sir sa ké rivé, nou ké divèt paré » (Tedros Adhanom Ghebreyesus, diréktèr jénéral annan Òrganizasyon mondyal di lasanté, 22 mai 2023).

 Roun lo ké roun patché moun ka pran fè toujou akoz di konsékans pandémi Kovid-19-a mennen, ki a annan yé tèt ouben annan yé kò. Ès gouvèrnman-yan ké òrganizasyon ki ka okipé di lasanté moun-yan ké pouvé fè sa ki fo lò prochen pandémi-a ké rivé ? É menm dipi aprézan, ès yé pouvé fè tousa ki fo kont problèm lasanté nou gen jòdla ?

 Labib-a ka palé di roun gouvèrnman ki ké pèrmèt tout moun gen roun bon lasanté. I ka di ki « Bondjé-a ki annan syèl-a ké mété roun rwayonm », sa lé di so gouvèrnman (Daniel 2:44). Gras a sa gouvèrnman-an, « pyès moun pa ké di : “Mo malad”. » (Isaïe 33:24). Tout moun ké gen roun bon lasanté é ké gen menm fòrs-a ki lò yé té jennjan (Job 33:25).