Sé don-la moun ki Témwen a Jéova ka fè, ka kouvè on gran pawti a sé dépans-la ki lyanné èvè aktivité mondyal an nou a. Adan sal di Wayòm an nou é adan sélézòt koté-la nou ka réini-nou la, ni dé bwat a ofrann ki fèt èspésyalman pou moun pé sa dépozé don a yo. Men nou ni dòt mwayen a dispozisyon an nou ankò. Ou ka touvé lis a sé métòd-lasa asi paj Entèwnèt an nou « Pou fè on don ». Asi paj-lasa, ni plizyè òpsyon diféran : swa nou pé bay on lajan pou soutyenn aktivité mondyal an nou, swa nou pé soutyenn on lasanblé lokal oben nou pé chwazi lé dé òpsyon alafwa.

 Sé moun-la ki Témwen a Jéova pa ka péyé dim-la é yo pa oblijé bay on pawti a lajan-la yo ka touché la chak mwa nonplis (2 Korentyen 9:7). Pannan réinyon an nou, nou pa ni a péyé pou rantré é nou pa jen ka fè lakèt. Anplisdisa, Témwen a Jéova ki kalifyé pou pran swen a sé lasanblé-la pa’a mandé lajan pou sé batèm-la, pou sé lantèwman-la, pou sé mayé-la oben pou dòt sèwvis ankò. Nou pa’a vann manjé oben dòt biten pou nou pé sa sanblé lajan ; nou pa’a òwganizé pon manifèstasyon ni fè pon tonbola pou fè lajan rantré pou òwganizasyon an nou. Nou pa k’ay jwenn sé moun-la pou mandé-yo lajan nonplis. Témwen a Jéova pa ka bay pon enfòwmasyon pèwsonèl asi sé moun-la ki fè on don (Matyé 6:2-4). Asi sit Entèwnèt an nou é asi piblikasyon an nou, ou pé’é jen touvé pon piblisité pou fè-nou fè lajan.

 Tout moun ki vé pé vin adan réinyon an nou. Toulémwa, pannan sé réinyon-lasa, yo ka li on rapò pou tchenn-nou okouran a sitiyasyon a sé kont-la. Anplisdisa, adan chak lasanblé lokal, yo ka vérifyé sé dosyé a kontabilité-la é yo ka fè sa souvan. Konsa, nou sèten kè yo ka sèvi èvè lajan-la byen konm i fo (2 Korentyen 8:20, 21).

•   Bwat a ofrann : Nou pé mèt on ti monné oben dépozé on chèk adan sé bwat a ofrann-la ki adan sé sal di Wayòm la, sé sal-la pou sé gran lasanblé-la oben sélézòt koté-la nou ka réini la.

•   Don asi Entèwnèt : Adan onlo péyi, nou pé sèvi èvè paj-la « Pou fè on don » pou fè on ofrann pa kat oben pa viwman. Nou pé sèvi osi èvè dòt tèknik an lign pou péyé b. Sèwten Témwen a Jéova ka désidé bay alavans on ofrann ki ké sòti asi kont a yo chak mwa, konsa, toulémwa, yo ka pé « mèt on ti dèkwa dè koté » (1 Korentyen 16:2).

•   Prévwa fè on don : Pou fè sèwten don, fò ou ké òwganizé-w alavans é/oben fò-w ké pran randévou èvè on moun ki kalifyé adan domenn jiridik. Métòd-lasa pé fè-w trapé sèwten avantaj kon pa ègzanp péyé mwens enpo. Onlo moun pé di jan sa itil lèwvwè ou ka chèché ni plis enfòwmasyon asi sé don-lasa – don kè ou pé fè pannan ou vivan oben ki ka vin valab apré mò a-w. Si zò vlé sèvi èvè yonn adan sé métòd-la ki ka vin la pou fè on don, pa ézité pran kontak èvè biwo mondyal a Témwen a Jéova ki adan péyi a zòt pou ni plis enfòwmasyon :

  •   kont ki labank

  •   kontra asirans é plan pou larètrèt

  •   kaz é téren

  •   aksyon é obligasyon

  •   tèstaman é byen ou ka kité pou lésé ondòt moun jéré-y

 Pou ni plis enfòwmasyon asi sé diféran métòd-la pou fè on don adan péyi a-w oben adan réjyon a-w, ou pé ay asi paj-la « Pou fè on don ».