Lè dé moun mayé ka fè on timoun, yo ka kontan toubònman, men anmenmditan sa ka chouboulé-yo. Antankè jennparan, zò pa dwèt té ka atann-zòt vwè kè prèstout tan a zòt é tout fòs a zòt ka pasé pou tibébé-la. É difètkè zò pa’a dòmi asé é kè zò ka pasé pa tout kalté santiman, mennaj a zòt pé pran gaz adan sa. Kifè, zò toulédé ké oblijé òwganizé-zòt pou okipé dè timoun a zòt toupannan zò ka pwotéjé mayé a zòt. Alò kijan konsèy ki an Bib-la pé édé-zòt rivé about a difikilté-lasa ?

MI SA LABIB KA DI : « Lanmou ni pasyans é i ni bonté », « i pa ka chèché pwòp entéré a-y, i pa ka fè kòlè fasil » (1 Korentyen 13:4, 5). Vou ki toufré vin manman, sa nòwmal kè ou ni zyé yenki anlè tibébé a-w. Men mari a-w pé ni lenprésyon kè ou ka mété-y akoté. Alò, sonjé kè li osi bizwen lanmou a-w. Èvè pasyans é bonté, édé-y santi kè i itil é kè li osi pé okipé dè tibébé-la.

« Zòt sé mari-la, viv èvè yo é chèché konprann-yo » (1 Pyè 3:7). Fò ou aksèpté kè madanm a-w ké pòté bon mannèv pou i okipé dè timoun a zòt, é sa ké pran prèstout fòs a-y. Kifè, i pé ka santi-y istrésé, krazé, é menm anpenn akòz dè sé nouvo rèsponsabilité-la i ni la. Pétèt menm kè délè, i ké fè kòlè kont vou, men rété kalm pas « on moun ki pa ka fè kòlè fasil ni plis valè ki on nonm ki fò » (Pwovèb 16:32). Chèché konprann sitiyasyon-la é bay èd-la i bizwen la (Pwovèb 14:29).

SA OU PÉ FÈ :

• Papa : Édé madanm a-w okipé dè tibébé-la, menmsi sé lannuit. Pasé mwens tan ka fè dòt biten pou pasé plis tan èvè madanm a-w é timoun a-w.

• Manman : Lè mari a-w vlé ba-w on pal pou okipé dè tibébé-la, aksèpté èd a-y. Menmsi i pa’a fè-y kon i dwètèt, pa fè-y rèpwòch, men montré-y jantiman kijan pou i fè.

MI SA LABIB KA DI : « Toulédé ké fè onsèl chè » (Jénèz 2:24). Menmsi fanmi-la vin pli gran, sonjé kè vou é moun-la ou mayé èvè-y la, zò toujou « onsèl chè ». Fè tousa ou pé pou mayé a zòt rété solid.

Si ou sé on madanm, fè mari a-w sav jan ou kontan davwa i ka édé-w é i ka soutyenn-vou. Lè ou ké fè sa, sé konsi sé « géri » ou ké géri-y (Pwovèb 12:18). Si ou sé on mari, di madanm a-w jan ou enmé-y é jan i ni valè ba-w. Di-y on bèl woulo-bravo pou mannyè i ka okipé dè fanmi-la (Pwovèb 31:10, 28).

« Fò chakmoun kontinyé chèché entéré a lòt moun-la, olyé i chèché pwòp entéré a-y » (1 Korentyen 10:24). Toujou fè sa ki méyè pou madanm a-w, oben mari a-w. Fò zò toulédé pran tan palé ansanm, félisité-zòt é kouté-zòt. Pa sonjé yenki vou adan zafè a rèlasyon sèksyèl la. Tchenn kont dè sa moun-la ou mayé èvè-y la bizwen. Labib ka di : « Fò pa yonn privé lòt, sòf si sé ansanm zò désidé sa » (1 Korentyen 7:3-5). Kifè, palé franchman dè kèsyon-lasa antrè zòt. Si ou ni pasyans é si ou ka konprann lòt-la, ou ké rann mayé a-w pli solid.

SA OU PÉ FÈ :

• Sonjé pran tan yenki pou zò toulédé.

• Fè dé ti biten ki ka montré moun-la ou mayé èvè-y la kè ou enmé-y. Pa ègzanp, maké on timo-dou ba-y oben ofè-y on kado.

MI SA LABIB KA DI : « Dépi ou toupiti timoun ou konnèt sa ki maké adan sé liv sakré la, ki pé ba-w sajès pou ou sové » (2 Timoté 3:15). Réfléchi asi sa ou ké fè pou anségné tibébé a-w. Menm avan i fèt, i pé aprann onlo biten. Dépi an vant a manman-y, i ja ka rèkonnèt vwa a zòt é i ka réyaji lè zò kontan, lè zò tris oben lè zò kòlè. Li ba-y alòskè i toupiti toujou. Menmsi i pa’a konprann sa ou ka li, sa pé édé-y enmé li lè i ké pi gran.

Timoun a-w pé’é jan two piti pou tann palé dè Bondyé. Palé pou timoun-la tann-vou lè ou ka priyé Jéova èvè-y (Détéwonòm 11:19). Menm lè zò ka jouwé, palé èvè-y dè biten kè Jéova fè (Sòm 78:3, 4). Lè i ké grandi, i ké rèsanti lanmou ou ni pou Jéova é i ké aprann enmé-y osi.

SA OU PÉ FÈ :

• Mandé Bondyé sajès-la ki fo la pou anségné tibébé a-w.

• Répété ba timoun a-w sa ou vlé i aprann granbonnè.