AKO 9
E Mafai Ke Fiafia Fefe’aki Lou Famili?
1. Koleā e mā’uiga tafito le āvaga ki le manu’ia o le famili?
Ko Seova le tupu’aga o logo e mālie, ko le ’Atua fiafia tie loto ke fiafia mo famili. (1 Timoteo 1:11) Ko ia leia na fakatu’utu’u ’ia le nofo āvaga. E aoga le āvaga i le lao ki le fiafia o le famili, talie e soli e ia le tokamālie ki mātu’a mo fānau. Ko le kau Kilisiteano e ma’ua ke faka’apa’apa ki lao o lolātou fenua ki le tosi āvaga. Lau ia Luka 2:1, 4, 5.
E fefe’aki le āvaga ki le ’Atua? E loto a ia ke fakatasi le tagata mo le fafine tu’uma’u. E loto Seova ko le tagata mo le fafine ke lā feagatonu’aki. (Epeleo 13:4) E vesi’a ki le mavete. (Malakia 2:16) Kae na fakataga ki se Kilisiteano ke mavete mo toe āvaga mo kapau na tono lona āvaga. Lau ia Mateo 19:3-6, 9.
2. E tonu ke felogoi fefe’aki le taumātu’a?
Na fakatupu e Seova le tagata mo le fafine ke lā fetokoi’aki i lolā ma’uli fakataumātu’a. (Senesi 2:18) Ko le pule famili, le tagata, ke tokaga ki le ma’uli fakatino o lona famili, mo ako’i lātou ke iloa le ’Atua mo fakamu’amu’a lona āvaga ti mo lā fe’alofalofani mo fefaka’apa’apa’aki. O tupu ko taumātu’a fuli e se saosaoa, ko le kalavi o le fiafia fakataumātu’a ko le ako o le loto fakamolemole. Lau ia Efeso 4:31, 32; 5:22-25, 33; 1 Petelo 3:7.
3. Kapau e se koi mālie la kulu felogoi taumātu’a, koleā le ne’a e tonu ke fai?
Kapau e kulu tau mo ni mamae, kulu faiga ke kulu felogoi tasi i le ’alofa. (1 Kolinito 13:4, 5) E se fakataga i le Folafola a le ’Atua a le mavete, ka ke fakatokatoka a faigata’a fakataumātu’a. Lau ia 1 Kolinito 7:10-13.
4. Fānau, koleā e loto ki ai le ’Atua o uiga mo koutou?
E loto Seova ke kotou fiafia. E soli atu e ia ni tokoi aoga ki lokotou temi tupulaga. E loto ke kotou fakaaoga le poto mo ne’a alā ku matala ki ai okotou mātu’a. (Kolose 3:20) E loto Seova ke kotou iloa le fiafia i le fai o lona finegalo, o fela’aki mo lona Alo. Lau ia Ekelesiasi 11:9-12:1; Mateo 19:13-15; 21:15, 16.
5. Mātu’a, e fefe’aki lakulu faiga ke fiafia a kulu fānau?
Kulu ga’oi makeke ki le soli o ne’a kai, le nofo’aga mo ne’a lava o fānau. (1 Timoteo 5:8) Ke fiafia a kulu fānau e tonu ke ako’i ke lotou ’alofa ki le ’Atua mo tuku lātou ke aga a ia o ako’i. (Efeso 6:4) E kulu fakasā ai lokulu ’alofa ki le ’Atua tie logoi e fānau mo ma’ua e lātou a fa’asiga tio e mālie na fakatafito ki le Folafola a le ’Atua. Lau ia Teutelonome 6:4-7; Māsau Fakatā 22:6.
E fua mālie ki fānau mo kapau e fakaloto makeke’i mo viki’i lātou. E aoga ke toe fakatonutonu’i mo akonaki’i lātou talie ke puipui mei aga e fakatupu veli kia lātou. (Māsau Fakatā 22:15) Aua na makeke lasi lona akonaki’i. Lau ia Kolose 3:21.
E lasi a tosi na tā e le kau Fakamā’oki a Seova mo tokoi ki mātu’a mo fānau. Ko tosi e fakatafito ki le Tosi-Tapu. Lau ia Pesalemo 19:7, 11.
