Titu 1:1-16
1 Nyɛ Pɔ́lu ɔ, un nyí kannumɔ Mawu tɔn, bo lɛ́ nyí mɛsɛ́dó Jezu Klísu tɔn, sɔgbe xá nǔɖiɖi mɛ e Mawu cyán lɛ́ é tɔn kpó nukúnnúmɔjɛnǔmɛ nǔgbó ɔ tɔn e sɔgbe é kpó; nǔgbó énɛ́ sɔgbe xá gbejíninɔ nú Mawu,
2 bo lɛ́ jínjɔ́n nukúnɖíɖó gbɛ mavɔmavɔ e sín akpá Mawu e ma sixú ɖó adingban ǎ é dó sín hwenu línlín ɖíe é tɔn jí;
3 amɔ̌, ée hwenu e Mawu ɖésúnɔ ɖó dó é su é ɔ, é bló bɔ è tuun xó tɔn gbɔn mawuxóɖiɖɔzɔ́ e è sɔ́ d’así nú mì, sɔgbe xá gbeɖiɖe Mawu Mɛhwlɛ́ngántɔ́ mǐtɔn tɔn é gblamɛ;
4 nyɛ wɛ ɖo wěma wlán sɛ́dó Titu e nyí vǐ jɔ vǐ, sɔgbe xá nǔɖiɖi e mǐ ɖó ɖo bǔ é wɛ:
Mawu Tɔ́ ɔ kpó Klísu Jezu Mɛhwlɛ́ngántɔ́ mǐtɔn kpó ní ná fɛ́nú kpó fífá kpó we.
5 Un jó we dó nyi Klɛ́ti bónú a ní jlá nǔ e ma ɖo nǔganjí ǎ* lɛ́ é ɖó, bo lɛ́ sɔ́ mɛxó agun tɔn lɛ́ sín toxo ɖé mɛ jɛ ɖěvo mɛ, sɔgbe xá wě élɔ́ e un ɖe xá we é:
6 mɛxó agun tɔn ɖé ɖó ná nyí mɛ e wú è ma nɔ mɔ nǔ ɖě ɖɔ dó ǎ é, asi ɖokpó wɛ é ɖó ná ɖó, vǐ tɔn lɛ́ ɖó ná nyí nǔɖitɔ́ e è ma dó hwɛ ɖɔ yě nɔ zán gbɛ kwíjikwíji* alǒ fɔ́n gǔ ǎ lɛ́ é.
7 Ðó nǔjíkpɔ́ntɔ́ Mawu tɔn ɖé ɖɔhun ɔ, nukúnkpénǔwútɔ́ ɖé ɖó ná nyí mɛ e wú è ma nɔ mɔ nǔ ɖě ɖɔ dó ǎ é, é ɖó ná nyí tasyɛ́ntɔ́ ǎ, é ɖó ná nyí xomɛsinnɔ ǎ, é ɖó ná nyí ahannumúnɔ ǎ, é ɖó ná nyí alǎnnúwatɔ́* ǎ, é ɖó ná yí wǎn nú afu ǎ,
8 loɔ, é ɖó ná nɔ yí mɛ, é ɖó ná yí wǎn nú ɖagbewiwa, é ɖó ná nɔ ɖó ayi te,* é ɖó ná nyí nǔjlɔ́jlɔ́watɔ́, é ɖó ná nyí gbejínɔtɔ́, é ɖó ná nɔ ɖu ɖo éɖée jí,
9 é ɖó ná nɔ tɛ́ dó xó nǔgbó* ɔ wú gbánwúngbánwún ɖo lěe é nɔ kplɔ́n nǔ mɛ kpó azɔ̌tuuntuun kpó gbɔn é mɛ, bo ná dó sixú kpé wú bo ná nɔ ná akɔ́nkpinkpan mɛ* gbɔn nǔkplɔ́nmɛ ɖagbe ɔ* gblamɛ, lobo lɛ́ kpé wú bo ná nɔ gbɛ́ nǔ nú mɛ e nɔ dɔn nǔ lɛ́ é.
10 Ðó gǔfɔ́ntɔ́, xóɖɔtɔ́ e sín xó ma nɔ hɛn le ɖěbǔ wá ǎ é kpó mɛblɛ́tɔ́ kpó gěgé wɛ tíin, ɖo tají ɔ, mɛ ɖěɖěe nɔ tɛ́ dó adagbigbo wú lɛ́ é.
11 É ɖo dandan ɖɔ è ní xwe nu yětɔn dó xɔ, ɖó mɛ énɛ́ lɛ́ nɔ fɔ́n bo nɔ ɖo blǒbló wɛ bɔ xwédo lɛ́ blěbú nɔ zɛ gbě, gbɔn nǔ e yě ma ɖó ná kplɔ́n mɛ ǎ lɛ́ é kplɔ́nkplɔ́n mɛ ɖó afu wú gblamɛ.
12 Mɛɖé nyí to yětɔn mɛ nu, bo nyí gbeyíɖɔ yětɔn, bo ɖɔ: “Klɛ́tinu lɛ́ ɔ, adingbannɔ wɛ yě nyí tɛgbɛ, gběkanlin e nɔ hɛn nǔ gblé dó mɛ wú lɛ́ é wɛ yě nyí, fɔnlínnɔ adɔtɔ́nɔ lɛ́ wɛ nú yě.”
13 Nǔgbó wɛ kúnnuɖiɖe énɛ́ nyí. Ðó hwɛjijɔ énɛ́ wú ɔ, nɔ fɔ́n bo nɔ ɖo nǔ gbɛ́ nú yě wɛ syɛ́nsyɛ́n, bónú yě ní dó sixú nɔ ganjí ɖo nǔɖiɖi ɔ mɛ;
14 ma nɔ wlí tó xɛxó Jwifu lɛ́ tɔn lɛ́ kpó gbeɖiɖe mɛ ɖěɖěe lɛ́ kɔ sín nǔgbó ɔ gúdo lɛ́ é tɔn lɛ́ kpó wú ó.
15 Nǔ lɛ́ bǐ wɛ nɔ nyí nǔ mímɛ́ nú mɛ e mɛ́ lɛ́ é; amɔ̌, mɛ e blí bo ma lɛ́ ɖó nǔɖiɖi ǎ lɛ́ é ɔ, nǔ ɖěbǔ nɔ nyí nǔ mímɛ́ nú yě ǎ, ɖó linlin yětɔn kpó ayixa yětɔn kpó bǐ wɛ blí.
16 Yě nɔ ɖɔ ɖo agbawungba ɖɔ émí tuun Mawu, bo ka nɔ gbɛ́ ɛ gbɔn nǔwiwa yětɔn lɛ́ gblamɛ, ɖó nǔvɛ́mɔ wɛ nú yě, yě nɔ se tónú ǎ, bo lɛ́ jɛxá azɔ̌ ɖagbe alɔkpa ɖěbǔ ǎ.
Tínmɛ e ɖo do lɛ́ é
^ Alǒ “jɛ do.”
^ Alǒ “hannyahannya.”
^ Alǒ “mɛxotɔ́.”
^ Alǒ “zán nǔwúkpíkpé tamɛ linlin tɔn.”
^ Alǒ “wɛn ɖejidéwú.”
^ Alǒ “dó wǔsyɛ́n lanmɛ nú mɛ.”
^ Alǒ “nǔkplɔ́nmɛ e nɔ hɛn le wá é.”
