Efɛ́zinu lɛ́ 4:1-32
4 Énɛ́ wú ɔ, nyɛ mɛ e nyí gantɔ́ ɖó Aklúnɔ wútu é, ɖo byɔ̌byɔ́ mi wɛ ɖɔ gbɛ e mi nɔ zán é ní jɛxá ylɔ̌ e è ylɔ́ mi é.
2 Hwebǐnu hǔn, mi nɔ sɔ́ mǐɖée hwe, bo nɔ lɛ́ fá xomɛ, mi nɔ ɖó suúlu, mi nɔ mɔ miɖée gbɔ ɖo wǎnyíyí mɛ,
3 lobo nɔ lɛ́ wa nǔ e wú mi kpé é bǐ, bo hɛn bǔ e gbigbɔ ɔ zɔ́n bɔ mi ɖe é ɖó te, gbɔn fífá mɛ ninɔ xá miɖée lɛ́ gblamɛ.
4 Agbaza ɖokpó wɛ ɖe, bɔ gbigbɔ mímɛ́ ɖokpó ɖe, lěe nukúnɖíɖó e è ylɔ́ mi ná é lɔ nyí ɖokpó gbɔn é.
5 Aklúnɔ ɖokpó, nǔɖiɖi ɖokpó, batɛ́mu ɖokpó.
6 Mawu ɖokpó wɛ ɖe, bo nyí Tɔ́ nú mɛ bǐ. É kló hú mɛ ɖěvo ɖěbǔ, é nɔ w’azɔ̌ gbɔn mǐ bǐ jí, bɔ hlɔ̌nhlɔ́n tɔn nɔ w’azɔ̌ ɖo ali bǐ nu.
7 Mǐ mɛ ɖokpó ɖokpó mɔ fɛ́nú yí sín Mawu gɔ́n. Klísu wɛ ka má nǔníná vɔ̌nu énɛ́ nú mǐ mɛ ɖokpó ɖokpó.
8 Ðó Nǔwlánwlán mímɛ́ lɛ́ ɖɔ: “Hwenu e é yi jǐ aga é ɔ, é kplá gantɔ́ lɛ́ yi. É ná súnnu lɛ́ bɔ yě nyí nǔníná lɛ́.”
9 Étɛ́ ka nyí tínmɛ xógbe “é yi jǐ” ɔ tɔn? Tínmɛ tɔn wɛ nyí ɖɔ é ko wá do ɖ’ayǐ hwɛ̌, é nɛ́ wɛ nyí ayǐkúngban ɔ jí.
10 Mɛ e jɛ te é jɛ́n lɛ́ nyí mɛ e yi jǐ aga, bo zɛ jǐnukúnsin lɛ́ bǐ wú é, bo ná dó sixú bló bónú nǔ lɛ́ bǐ ná jɛnu.
11 É sɔ́ mɛɖé lɛ́ bɔ yě nyí mɛsɛ́dó, mɛɖé lɛ́ nyí gbeyíɖɔ, mɛɖé lɛ́ nyí wɛnɖagbejlátɔ́, mɛɖé lɛ́ nyí lɛ̌ngbɔ́nyitɔ́ kpó nǔkplɔ́nmɛtɔ́ kpó.
12 É wa mɔ̌, bo ná dó sɔ́ mɛ mímɛ́ lɛ́ ɖó ali jlɔ́jlɔ́ ɔ jí,* bónú yě ná wa mɛsɛntɔ́zɔ́ lobo bló bɔ agbaza Klísu tɔn ɔ ná lí dǒ,
13 káká jɛ hwenu e mǐ mɛ bǐ ná húzú ɖokpó* ɖo nǔɖiɖi mɛ, lobo ɖó nukúnnúmɔjɛnǔmɛ e sɔgbe é dó Vǐ Mawu tɔn ɔ wú é, bo ná nyí mɛ e ko su kpé* é, bɔ ɖo ali énɛ́ nu ɔ, mǐ ná húzú mɛ e lí dǒ ɖo ali bǐ nu lɛ́ é Klísu ɖɔhun.
14 Énɛ́ wú ɔ, mǐ sɔ́ ɖó ná cí yɔkpɔ́vú lɛ́ ɖɔhun ǎ, ɖó mɛ e nɔ xwedó nǔkplɔ́nmɛ masɔgbe mɛ ɖěɖěe nɔ blɛ́ mɛ lɛ́ é tɔn lɛ́ é ná cí tɔjíhún e ɖo xu jí, bɔ jɔhɔn kpó aslɔkɛ́ lɛ́ kpó xo yi dě ɔ, yě nɔ xo yi dě é ɖɔhun. Ayi wínníwínní wɛ mɛ énɛ́ lɛ́ nɔ zán dó dɔn mɛ dó nǔ nyanya mɛ.
15 Amɔ̌, ée mǐ ná nɔ ɖo nǔgbó ɖɔ wɛ é ɔ, wǎnyíyí ní sísɛ́ mǐ, bónú mǐ ní su ɖo nǔ lɛ́ bǐ mɛ ɖo kɔnɖókpɔ́ mɛ xá Klísu e nyí ta ɔ é.
16 È dɔn agbaza ɔ bǐ ɖó bǔ ganjí gbɔn jǐ tɔn, bɔ wǔjɔnú lɛ́ ɖokpó ɖokpó nɔ d’alɔ yěɖée lɛ́, bo nɔ ná nǔ e sín hudó agbaza ɔ ɖó lɛ́ é. Ényí wǔjɔnú ɖokpó ɖokpó wa azɔ̌ tɔn ganjí ɔ, énɛ́ nɔ zɔ́n bɔ agbaza ɔ nɔ su, bónú agbaza ɔ blěbú ná lí dǒ ɖo wǎnyíyí mɛ.
17 Énɛ́ wú ɔ, nǔ e un ɖɔ bo jlá ɖo Aklúnɔ nyíkɔ mɛ é ɖíe: Mi sɔ́ ɖó ná kpo ɖo gbɛ zán wɛ akɔta ɖě lɛ́ ɖɔhun ǎ, ɖó yědɛɛ lɛ́ ɔ, linlin maɖótaɖé* yětɔn lɛ́ wɛ yě nɔ zán gbɛ sɔgbe xá.
18 Yě* ɖo ablu mɛ bo jɛ zɔ nú gbɛ e nyí Mawu tɔn é, ɖó yě ba ná tuun Mawu ǎ, bɔ ayi yětɔn lɛ́vɔ́ kú atli.*
19 Ðó nǔ ɖěbǔ sɔ́ nɔ nyí winnyá nú yě ǎ wútu ɔ, yě jó yěɖée dó nú wunhínhɔ́nnúwiwa,* bo nɔ wa nǔblíblí alɔkpa lɛ́ bǐ, b’ɛ ka nɔ jɛmɛ nú yě gbeɖé ǎ.
20 Amɔ̌, mi kplɔ́n nǔ mɔ̌hun ɖé dó Klísu wú ǎ.
21 Jezu kplɔ́n mɛ nǔ e nǔgbó ɔ nyí é, bɔ ényí mi se xó tɔn lɛ́, lobɔ è lɛ́ kplɔ́n nǔ mi gbɔn jǐ tɔn hǔn, mi tuun nǔ énɛ́ ganjí nɛ́.
22 È kplɔ́n mi ɖɔ mi ní ɖe gbɛtɔ́ xóxó ɔ nyi ayǐ. É wɛ sɔgbe xá walɔ e mi nɔ zán ɖ’ayǐ é, lobɔ é nɔ lɛ́ fɔ́n bo nɔ ɖo gblěgblé wɛ, ɖó jlǒ tɔn mɛblɛ́blɛ́ tɔn lɛ́ wútu.
23 Mi ɖó ná kpo ɖo blǒbló wɛ, bɔ hlɔ̌nhlɔ́n e nɔ xlɛ́ ali linlin mitɔn é ná ɖo yɔ̌yɔ́ húzú wɛ.
24 Mi ɖó ná sɔ́ gbɛtɔ́ yɔ̌yɔ́ ɔ dó. É wɛ nyí gbɛtɔ́ yɔ̌yɔ́ e Mawu dá sɔgbe xá jlǒ tɔn é. Gbɛtɔ́ yɔ̌yɔ́ énɛ́ ɔ nɔ wa nǔ jlɔ́jlɔ́, bo nɔ lɛ́ nɔ gbejí nǔgbó nǔgbó tɔn.
25 Énɛ́ wútu ɔ, din e mi ko jó mɛblɛ́blɛ́ dó é ɔ, mɛ ɖokpó ɖokpó ní nɔ ɖɔ nǔgbó nú nɔzo tɔn, ɖó agbaza ɖokpó ɔ sín wǔjɔnú lɛ́ wɛ mǐ nyí.
26 É sixú wá jɛ bɔ mi sin xomɛ, amɔ̌, mi ma hu hwɛ ó. Mi ma nɔ xomɛsin jí káká bónú hwe ní yi xɔ ó.
27 Mi ma hun ali nú* Awǒvi ó.
28 Mɛ e nɔ j’ajo é ní ma sɔ́ j’ajo ɖě ó. É nyɔ́ wa ɔ, é ní nɔ wa azɔ̌ syɛ́nsyɛ́n, bo nɔ w’azɔ̌ ɖagbe lɛ́ kpó alɔ tɔn lɛ́ kpó, bo ná dó sixú ɖó nǔɖé bá má xá mɛ e ɖo hudó mɛ é.
29 Xó gblégblé ɖé ní ma nɔ tɔ́n sín nu mitɔn mɛ ó. Loɔ, ní nɔ nyí xó ɖagbe e ná hɛn mɛ ɖěvo lɛ́ lí dǒ, sɔgbe xá lěe ninɔmɛ ɔ byɔ́ ɖó é kɛ́ɖɛ́, bo ná dó sixú nɔ ɖɔ nǔ e ɖó le é nú mɛ e ɖo sise wɛ lɛ́ é.
30 Gɔ́ ná ɔ, mi ma nɔ dɔn gbigbɔ mímɛ́ Mawu tɔn dó aluwɛ mɛ* ó. É wɛ è dó ɖó wuntun mi ná káká jɛ gbe e gbe è ná tún kan nú mi, gbɔn gbɛxixɔ ɔ gblamɛ é.
31 Mi ní jó mɛhɛndóxomɛ syɛ́nsyɛ́n bǐ, xomɛsin bǐ, majijɛ bǐ, jlɛɖiɖɔ bǐ, mɛzunzun bǐ, kpó nǔ ɖěvo e nɔ wa nǔ dó mɛ wú é bǐ kpó dó.
32 Amɔ̌, mi nɔ nyɔ́ xomɛ dó miɖée lɛ́ wú, bo nɔ ɖe nǔbláwǔkúnúmɛ e gɔ́ngɔ́n é xlɛ́, lobo nɔ sɔ́ hwɛ kɛ miɖée lɛ́ faa, lěe Mawu ɖésúnɔ sɔ́ hwɛ kɛ mi faa, gbɔn Klísu jí gbɔn é ɖɔhun.
Tínmɛ e ɖo do lɛ́ é
^ Alǒ “bo ná dó kplɔ́n azɔ̌ mɛ mímɛ́ lɛ́.”
^ Alǒ “ná ɖo bǔ.”
^ Alǒ “lí dǒ ɖo nǔɖiɖi mɛ.”
^ Alǒ “vɔ̌tɔ́.”
^ Blǔju tɔn, “Taglomɛ yětɔn.”
^ Blǔju tɔn, “syɛ́n.”
^ Alǒ “winnyánúwiwa.” Aseligeyíya ɖo Glɛ̌kigbe mɛ. Kpɔ́n Xógbe ɖé lɛ́ sín tínmɛ.
^ Alǒ “ná tɛn.”
^ Alǒ “dó akpɔ nú gbigbɔ mímɛ́ Mawu tɔn.”
