Nú mɛ gěgé ɔ, dlɔ̌ e ma ko jɛnu ǎ é ɖé wɛ nǔ wiwa xá mɛ e ma ɖó sinmɛ agbaza tɔn ɖokpó ɔ xá mɛ ǎ lɛ́ é ɖó zɛ̌nzɛ̌n nyí.

•   “Gbɔn gbɛ ɔ bǐ mɛ ɔ, mɛ e ma ɖó sinmɛ agbaza tɔn ɖokpó ɔ xá mɛ ǎ lɛ́ é ɖiɖe ɖó vo kpo ɖo nǔ hɛn gblé wɛ ɖo tutoblónúnǔ lɛ́ mɛ, gbɛ̌ kplékplé lɛ́ mɛ, bo lɛ́ ɖo nǔ hɛn gblé wɛ dó gbɛzínzán gbe bǐ gbe tɔn gbɛtɔ́ lɛ́ tɔn wú. Mɛ e ma ɖó sinmɛ agbaza tɔn ɖokpó ɔ xá mɛ ǎ lɛ́ é ɖiɖe ɖó vo kpo ɖo mɛ lɛ́ sísɛ́ wɛ bɔ yě nɔ wa nǔ agɔ xá yěɖée.”—António Guterres, secrétaire général des Nations unies.

 É ka sixú nyɔ́ bló bɔ è ná nɔ wa nǔ xá mɛ e ɖó sinmɛ agbaza tɔn vovo lɛ́ é bǐ ɖó zɛ̌nzɛ̌n a? Étɛ́ Biblu ka ɖɔ?

 Biblu kplɔ́n mǐ linlin e Mawu nɔ ɖó dó mɛ e ɖó sinmɛ agbaza tɔn vovo lɛ́ é wú é.

•   “Gbɛtɔ́ ɖokpó jí wɛ [Mawu] gbɔn bo ɖó akɔta lɛ́ bǐ ayǐ bónú yě ná kpé ayǐkúngban ɔ bǐ nukúnmɛ.”—Mɛsɛ́dó 17:26.

•   ‘Mawu nɔ ɖe mɛɖé ɖó vo ɖo mɛɖé mɛ ǎ, loɔ, ɖo akɔta lɛ́ bǐ mɛ ɔ, mɛ e nɔ ɖó sísí e gɔ́ngɔ́n é n’i, bo nɔ lɛ́ wa nǔ e sɔgbe é sín nǔ nɔ nyɔ́ nukún tɔn mɛ.’—Mɛsɛ́dó 10:34, 35.

 Biblu ɖe xlɛ́ ɖɔ gbɛtɔ́ lɛ́ bǐ wɛ nyí nǔ ɖokpó ɔ, bɔ sinmɛ agbaza tɔn lɛ́ bǐ wɛ nɔ nyɔ́ Mawu nukúnmɛ.

 Axɔ́súɖuto Mawu tɔn e nyí acɛkpikpa jǐxwé tɔn ɖé é ná bló bɔ è ná nɔ wa nǔ xá mɛ e ɖó sinmɛ agbaza tɔn vovo lɛ́ é bǐ ɖó zɛ̌nzɛ̌n. Acɛkpikpa énɛ́ ná kplɔ́n gbɛtɔ́ lɛ́ lěe yě ná nɔ wa nǔ xá mɛ ɖěvo lɛ́ ɖo ali ɖagbe nu gbɔn é. Gbɛtɔ́ lɛ́ ná kplɔ́n lěe yě ná ɖu ɖo linlin mɛ e ɖó sinmɛ agbaza tɔn vovo lɛ́ é ɖiɖe ɖó vo tɔn lɛ́ jí gbɔn é.

•   “Nǔjlɔ́jlɔ́wiwa wɛ mɛ e ná nɔ ayǐkúngban ɔ jí lɛ́ é ná kplɔ́n dandan.”—Ezayíi 26:9, nwt.

•   “Hwɛjijɔ ná hɛn fífá wá; é ná ná mɛ ayijayǐ kpó jiɖiɖe kpó káká sɔ́yi.”—Ezayíi 32:17.

 Ðo égbé ɔ, mɛ lǐvi mɔ̌kpán wɛ ɖo lěe yě ná nɔ wa nǔ xá mɛ ɖěvo lɛ́ kpó sísí kpó, kpódó yɛ̌yi kpán gbɔn é kplɔ́n wɛ ɖo Biblu mɛ.

•   Bo ná dó mɔ nǔ ɖěvo lɛ́ d’é jí hǔn, xa xójláwéma Fọ́n! e xóta tɔn nyí “Be Nuvẹun Gán Busẹ Ya?” é.

•   Xa xóta “Comment parler de racisme à votre enfant” bo ná dó tuun lěe mɛjitɔ́ lɛ́ sixú ɖɔ xó dó xóta énɛ́ jí gbɔn ɖo xwédo mɛ é.