Alǒkan e è nɔ zán dó yi Ɛntɛnɛ́ti jí é ɖé cí jivǐ ɖé ɖɔhun; é sixú d’alɔ mɛ, alǒ hɛn nǔ gblé dó mɛ wú. Lěe è zán gbɔn é wú wɛ é nɔ sín. Nɛ̌ a ka sixú kplɔ́n vǐ towe lɛ́, bɔ yě ná nɔ wá gbeta ɖagbe lɛ́ kɔn hwenu e yě ɖo azɔ̌wanú agbɔ̌nnɔ énɛ́ zán wɛ é gbɔn? Ði kpɔ́ndéwú ɔ, táan nabí a ka ɖó ná yí gbe bɔ vǐ towe lɛ́ ná nɔ zán alǒkan yětɔn ná ɖo azǎn ɖokpó ɖokpó jí?

•  Nǔ e a ɖó ná tuun lɛ́ é

•  Nǔ e a sixú wa lɛ́ é

•  “Mɛjitɔ́ wǎnyíyínɔ lɛ́ nɔ dó sɛ́n nú vǐ yětɔn lɛ́”

•   Alǒkan e è nɔ zán dó yi Ɛntɛnɛ́ti jí é nɔ nyí awǒvinú nú mɛ e ɖo zǐnzán wɛ é hweɖélɛ́nu. Lěe è xlɛ́ gbɔn ɖo xóta “Vǐ lɛ́ kpó alǒkan e è nɔ zán dó yi Ɛntɛnɛ́ti jí lɛ́ é kpó: Akpáxwé 1: Vǐ ce ka ɖó ná ɖó alǒkan e è nɔ zán dó yi Ɛntɛnɛ́ti jí é ɖé wɛ a?” mɛ é ɔ, alǒkan e è nɔ zán dó yi Ɛntɛnɛ́ti jí é ɖé nɔ zɔ́n bɔ vǐ towe hɛn ɔ, é ná mɔ nǔ e ɖo Ɛntɛnɛ́ti jí lɛ́ é bǐ, é sixú nyí nǔ ɖagbe alǒ nǔ nyanya.

   “É bɔwǔ bɔ è ná wɔn ɖɔ alǒkan e è nɔ zán dó yi Ɛntɛnɛ́ti jí é ɖé sixú zɔ́n bɔ vǐ mǐtɔn lɛ́ ná xo go gbɛtɔ́ nyanya tɛnmɛ tɛnmɛ lɛ́, kpó linlin nyanya tɛnmɛ tɛnmɛ lɛ́ kpó.”—Brenda.

•   Vǐ lɛ́ ɖó hudó alixlɛ́mɛ tɔn. Mɛ wínnyáwínnyá gěgé ko ɖo azɔ̌wanú nǔnywɛ́ xwítíxwítí tɔn lɛ́ zán wɛ ɖo gbɛzán yětɔn bǐ mɛ, amɔ̌, mɛxó gěgé tíin bɔ, agaɖanu din jɛ́n yě jɛ zǐnzán jí. É ɖo mɔ̌ có, énɛ́ ko xlɛ́ ɖɔ mɛxó lɛ́ kún tuun nǔtí dó azɔ̌wanú nǔnywɛ́ xwítíxwítí tɔn lɛ́ wú ó, bɔ vǐ lɛ́ wɛ ɖo tɛn ɖagbe mɛ, bó ná ɖɔ lěe yě ná zán alǒkan yětɔn lɛ́ gbɔn é kpó hwenu e yě ná zán dó é kpó ǎ.

   Nǔgbó wɛ ɖɔ alɔ sixú bí nú vǐ towe lɛ́ ɖo alǒkan e è nɔ zán dó yi Ɛntɛnɛ́ti jí é ɖé zínzán mɛ hú hwiɖésúnɔ mɛtún ɔ, amɔ̌, énɛ́ ko xlɛ́ ɖɔ yě tuun lěe è ná zán kpó nǔnywɛ́ kpó gbɔn é ǎ. Vǐ ɖěɖěe tlɛ tuun nǔ gěgé dó nǔnywɛ́ xwítíxwítí wú lɛ́ é ɖó hudó alixlɛ́mɛ mɛjitɔ́ yětɔn lɛ́ tɔn, bónú yě ná kplɔ́n lěe yě ná zán alǒkan e è nɔ zán dó yi Ɛntɛnɛ́ti jí é ɖé ɖo ali e sɔgbe é nu gbɔn é.

   “Ényí a sɔ́ alǒkan e è nɔ zán dó yi Ɛntɛnɛ́ti jí é ɖé d’así nú vǐ towe, bó má kplɔ́n ɛ lěe é ná zán gbɔn é ǎ ɔ, é cí ɖɔ a sɔ́ mɔ̌to ɖé sín cávi n’i, bó sɔ́ ɛ jínjɔ́n fí e hǔnkuntɔ́ ɔ nɔ jínjɔ́n é, dó zo hǔn ɔ mɛ, lobo ɖɔ n’i ɖɔ: ‘Kɛnklɛ́n bó wa dɛ̌dɛ̌,’ bó ka kplɔ́n ɛ lěe é ná kun gbɔn é ǎ ɖɔhun.”—Seth.

•   Kplɔ́n bó tuun nǔ ɖěɖěe vǐ towe sín alǒkan sixú wa lɛ́ é. Nǔ azɔ̌wanú ɖěɖěe sixú d’alɔ vǐ towe bɔ é ná zán alǒkan tɔn ɖo ali e sɔgbe é nu lɛ́ é ní má we. Ði kpɔ́ndéwú ɔ:

   Alɔ tɛ́ jí è ka nɔ sɔ́ alǒkan ɔ ɖó, bɔ é nɔ ná acɛ mɛjitɔ́ lɛ́ bɔ yě nɔ ɖó dogbó nú táan nabí e vǐ yětɔn lɛ́ sixú zán ɖo alǒkan yětɔn jí é kpó tɛn Ɛntɛnɛ́ti tɔn e jí yě sixú yi lɛ́ é kpó?

   A ka tuun ɖɔ alɔ e jí è nɔ sɔ́ alǒkan ɖó, bɔ é nɔ sú ali dó nǔ e ma sɔgbe ǎ lɛ́ é kún nɔ w’azɔ̌ hwebǐnu ó a?

   Lě do a tuun nǔ gěgé dó alǒkan vǐ towe tɔn wú sɔ é ɔ, mɔ̌ do wɛ a ná ɖo gbesisɔmɛ, bó ná d’alɔ ɛ, bɔ é ná zán ɖo ali e sɔgbe é nu sɔ.

   Nǔgbódodó Biblu tɔn: “Mɛ e tuun nǔ ɔ, hlɔ̌nhlɔ́n nɔ jɛ hlɔ̌nhlɔ́n jí n’i.”—Nǔnywɛ́xó 24:5.

•   Ðǒ dogbó lɛ́ ayǐ. Ðɔ nǔ e a ná yí gbe ná lɛ́ é kpó nǔ e a ma ná yí gbe ná ǎ lɛ́ é kpó. Ði kpɔ́ndéwú ɔ:

   A ná yí gbe bɔ vǐ towe ná ɖo fɛn xwe dó alǒkan ɔ mɛ wɛ, hwenu e mi ɖo nǔ ɖu wɛ é, alǒ hwenu e mi ɖo xwédo mitɔn alǒ xɔ́ntɔn mitɔn lɛ́ ba kpɔ́n wɛ é wɛ a?

   Alǒkan vǐ towe lɛ́ tɔn ná nɔ nɔ xɔnɔnɔ yětɔn lɛ́ mɛ zǎnmɛ wɛ a?

   Azɔ̌wanú tɛ́ lɛ́ a ka ná yí gbe ná?

   Ényí vǐ towe nɔ zán táan gěgé ɖo alǒkan tɔn jí ɔ, nɛ̌ a ka ná wa gbɔn bó ná tuun?

   A ná ɖɔ táan nabí e yě ná zán ɖo alǒkan yětɔn lɛ́ jí ɖo azǎn ɖokpó ɖokpó jí é wɛ a?

   Blǒ bónú vǐ towe ní tuun sɛ́n lɛ́.Ðo gbesisɔmɛ bó ná dɔn tó n’i, ényí é t’afɔ yě jí ɔ nɛ́.

   Nǔgbódodó Biblu tɔn: “Vǐ wa nǔ nyi do hǔn, ma gɔn tó dɔn n’i ó.”—Nǔnywɛ́xó 23:13

•   Nɔ kíjé vǐ towe sín alǒkan. Tuun kódu e vǐ towe nɔ zán dó dó gan alǒkan tɔn mɛ é, bɔ, ényí é byɔ́ ɖó mɔ̌ hǔn, nɔ ba do nú nǔ e é nɔ bló ɖo alǒkan tɔn jí é, káká jɛ nǔ e é nɔ wlán sɛ́dó mɛ lɛ́ é, nǔ e è nɔ wlán sɛ́dó è lɛ́ é, azɔ̌wanú lɛ́, fɔtóo lɛ́ kpó tɛn Ɛntɛnɛ́ti tɔn e jí é nɔ yi lɛ́ é kpó.

   “Mǐ ɖɔ nú vǐ nyɔ̌nu mǐtɔn ɖɔ mǐ ná nɔ kíjé alǒkan tɔn hwɛhwɛ, mǐ kún ka ná nɔ ɖɔ n’i, cóbó ná nɔ wa mɔ̌ ó. Ényí mǐ mɔ ɖɔ é kún ɖo zǐnzán wɛ ganjí ó ɔ, mǐ sixú ɖó dogbó nú lěe é ná zán gbɔn é.”—Lorraine.

   Ðó a nyí mɛjitɔ́ ɖé wútu ɔ, a ɖó acɛ lɛ́ bǐ, bó ná tuun lěe vǐ towe nɔ zán alǒkan tɔn gbɔn é.

   Nǔgbódodó Biblu tɔn: “Ényí vǐ ɖé ɖo walɔ ɖé lɛ́ zán wɛ ɔ, è nɔ ko tuun vǐ alɔkpa e é nyí é; é ɖo gbɛ ɖagbe, gbɛ jlɔ́jlɔ́ zán wɛ kpó é gbɔ kpó ɔ, è nɔ ko tuun.”—Nǔnywɛ́xó 20:11.

•   Kplɔ́n ɛ nǔgbódodó lɛ́. D’alɔ vǐ towe, bónú é ní ɖó jlǒ bá wa nǔ ɖagbe. Étɛ́wú énɛ́ ka ɖo tají? Ðó ényí vǐ ɖé jló nǔgbó bó ná hwlá nǔɖé dó mɛjitɔ́ tɔn lɛ́ ɔ, é ná mɔ ali e nu é ná wa mɔ̌ ɖe é, ényí mɛjitɔ́ tɔn lɛ́ tlɛ wa nǔ ɖěbǔ ɔ nɛ́. a

   Énɛ́ wú ɔ, kplɔ́n nǔ vǐ towe, bónú é ní ɖó jijɔ ɖagbe lɛ́, ɖi gbejíninɔ, mɛɖéejíɖuɖe, bó nɔ yí gbe nú nǔ e mɛ nǔwalɔ tɔn lɛ́ tɔ́n kɔ dó é. Vǐ e ɖó walɔ ɖagbe é ná ɖibla zán alǒkan tɔn kpó nǔnywɛ́ kpó hú gǎn.

   Nǔgbódodó Biblu tɔn: ‘Mɛxó lɛ́ ko tuun nǔ ɖagbe ɖo nǔ nyanya mɛ gbɔn nǔwiwa yětɔn lɛ́ gblamɛ, bɔ é ko má yě.’—Eblée lɛ́ 5:14.