“Mi ma nú awakanmɛ kú mǐ dó nǔɖagbewiwa wú ó. Ðó é jɛ hwetɔnnu ɔ, mǐ ná ya sínsɛ́n tɔn lɛ́, ényí nǔ ma cikɔ nú mǐ ǎ ɔ nɛ́.”—Galátinu lɛ́ 6:9, Biblu gbɛ yɔ̌yɔ́ ɔ tɔn.

 “Awakanmɛ ní má kú mǐ dó nǔɖagbewiwa wú ó. Ðó nú awakanmɛ ma kú mǐ ǎ, bónú hwetɔnnu wá su ɔ, mǐ ná mɔ ajɔ tɔn yí.”—Galátinu lɛ́ 6:9, MAWUXÓWÉMA.

 Mɛsɛ́dó Pɔ́lu dó wǔsyɛ́n lanmɛ nú klisánwun lɛ́ ɖɔ yě ní kpo ɖo nǔ ɖagbe alǒ nǔ e nyɔ́ ɖo Mawu nukúnmɛ é wa wɛ. Ényí yě wa mɔ̌ ɔ, yě sixú ɖeji ɖɔ Mawu ná d’ajɔ tɔn yě.

 “Mi ma nú awakanmɛ kú mǐ . . . ó.” È sixú lɛ́ tínmɛ nukɛgbe énɛ́ dó “nǔ ní má ci kɔ nú mǐ . . . ó.” Ðo gbe dodó ɔ mɛ ɔ, xógbe énɛ́ sixú lɛ́ ɖe linlin akpakpa ní ma gɔn sísɔ́ mɛ ó tɔn tɔ́n. Ðó mɛsɛ́dó Pɔ́lu sɔ́ éɖée dó xó énɛ́ lɛ́ mɛ wútu ɔ, gbe yí wɛ é ɖe ɖɔ awakanmɛ kú émí lɔ hweɖélɛ́nu.—Hlɔ̌manu lɛ́ 7:21-24.

 “Nǔɖagbewiwa” alǒ nǔ ɖagbe ɔ, nǔ ɖěɖěe klisánwun ɖé ɖó ná wa ɖo mawusinsɛn tɔn kpáxwé lɛ́ é bǐ wɛ ɖ’é mɛ. Azɔ̌ e mɛɖé nɔ wa nú ganjíninɔ klisánwun hǎtɔ́ tɔn lɛ́ tɔn kpó mɛ ɖěvo lɛ́ tɔn kpó é lɔ ɖ’é mɛ.—Galátinu lɛ́ 6:10.

 “É jɛ hwetɔnnu ɔ, mǐ ná ya sínsɛ́n tɔn lɛ́, ényí nǔ ma cikɔ nú mǐ ǎ ɔ nɛ́.” Pɔ́lu flín nǔxatɔ́ tɔn lɛ́ ɖɔ lěe é nɔ byɔ́ hwenu cóbɔ glesi ɖé sín nǔkún nɔ nyɔ́ gbɔn é ɔ, mɔ̌ wɛ é sixú byɔ́ hwenu cóbɔ yě ná mɔ le e ɖo ɖagbewiwa mɛ é. Gbɔn xó e Pɔ́lu ɖɔ dó nǔ yíyá wú é gblamɛ ɔ, é cá wěmafɔ élɔ́ dó nǔgbó tají e ɖo wěmafɔ 7​gɔ́ ɔ mɛ é wú: “Nǔ e mɛɖé dó é wɛ é ná ya.” Ðo xógbe ɖěvo mɛ ɔ, ényí klisánwun ɖé nɔ wa nǔ e nɔ nyɔ́ Mawu nukúnmɛ é ɔ, è ná d’ajɔ ɖaxó è, káká jɛ gbɛ mavɔmavɔ sín ajɔ jí.—Hlɔ̌manu lɛ́ 2:6, 7; Galátinu lɛ́ 6:8.

 Mɛsɛ́dó Pɔ́lu wlán wěma énɛ́ sɛ́dó klisánwun e ɖo Galáti lɛ́ é ɖo 50-52 H.M. tɔn sín avla mɛ. É bló mɔ̌ bo ná dó cyɔ́n alɔ yě jí ɖo mɛ e nɔ ɖɔ ɖɔ émí nyí klisánwun bo ka nɔ sló kɔ nú nǔgbó e kunkplá Jezu lɛ́ é sí. (Galátinu lɛ́ 1:6, 7) Adingban-núkplɔ́nmɛtɔ́ énɛ́ lɛ́ nɔ dɔn nǔ ɖɔ klisánwun lɛ́ ɖó ná se tónú nú Sɛ́n e Mawu ná akɔta Izlayɛ́li hwexónu tɔn ɔ gbɔn Mɔyízi jí é. (Galátinu lɛ́ 2:15, 16) Pɔ́lu tínmɛ ɖɔ Sɛ́n ɔ ko wa azɔ̌ tɔn kpé, bɔ é kún sɔ́ byɔ́ ɖɔ mawusɛntɔ́ lɛ́ ní lɛ́ se tónú ná ó.—Hlɔ̌manu lɛ́ 10:4; Galátinu lɛ́ 3:23-25.

 Hwenu e Pɔ́lu dó wǔsyɛ́n lanmɛ nú klisánwun hǎtɔ́ tɔn lɛ́ ɖɔ yě ní kpo ɖo ‘nǔ ɖagbe wa wɛ’ é ɔ, ényí ɖiɖɔ wɛ é ɖe ɖɔ è ní se tónú nú Mɔyízisɛ́n ɔ ǎ. Loɔ, wǔsyɛ́n dó lanmɛ nú yě wɛ é ɖe ɖɔ yě ní ɖo “Klísu sín sɛ́n ɔ se tónú ná wɛ,” bɔ nǔ e Jezu kplɔ́n mɛ dó ɖagbe wiwa nú mɛ ɖěvo lɛ́ wú é bǐ ɖ’é mɛ.—Galátinu lɛ́ 6:2; Matíe 7:12; Jaan 13:34.

 Kpɔ́n video kléwún élɔ́ bo ná dó mɔ nǔ tawun tawun e jí wěma Galátinu lɛ́ tɔn ɖɔ xó dó lɛ́ é.