Biblu gbɛ́ xóɖóxámɛ ǎ, é nyɔ́ wà ɔ, é ɖexlɛ́ ɖɔ nǔɖe wɛ é nyí bɔ Mawu na mɛ e wlí alɔ lɛ é. É dá “sunnu kpodo nyɔnu kpo” bo mɔ ɖɔ nǔ e emi bló lɛ é ɔ, “nǔ ɖagbe wɛ ye nyí tawun.” (Bǐbɛ̌mɛ 1:27, 31) Hwenu e é kɔn sunnu nukɔntɔn ɔ kpo nyɔnu nukɔntɔn ɔ kpo ɖó kpɔ́ bo wlí alɔ nú ye gudo é ɔ, é ɖɔ ɖɔ “ye mɛ we lɛ na huzu ɖokpo géé.” (Bǐbɛ̌mɛ 2:24) Xó ɖiɖó xá mɛ e è da é, kpo lee nǔ cí nú mɛ nǔgbo nǔgbo é ɖiɖexlɛ́ kpo ɖò kɔnɖókpɔ́ enɛ mɛ.

 Biblu tinmɛ vivǐ e asú lɛ nɔ sè ɖò alɔwliwli yetɔn mɛ é gbɔn lě: “Nyɔnu e a da ɖò dɔnkpɛ mɛ ɔ ni nyí awǎɖonú towe. . . . Acɔ́ɖiɖó tɔn, heɖiɖó tɔn ni nɔ mú we ahan ɖɔhun. Ma nú wanyiyi e a ɖó n’i ɔ ɖekpo gbeɖé ó.” (Nǔnywɛxó 5:18, 19) Mawu bló tuto bonu nyɔnu lɛ lɔ na sè xóɖóxámɛ sín vivǐ. Biblu ɖɔ: “Asú lɛ kpo asì lɛ kpo ɖó na sú xóɖóxámɛ sín hudo yeɖée lɛ tɔn lɛ sín dò.”—1 Kɔlɛntinu lɛ 7:3, God’s Word Bible.

Dogbó lɛ ɖò xóɖóxámɛ linu

 Mɛ e wlí alɔ lɛ é kɛɖɛ wɛ Mawu sɔ́ tuto xóɖóxámɛ tɔn ɖó te na, ɖó Eblée lɛ 13:4 ɖɔ: “Asidida abǐ asúdida ni nyí nǔ sísí; asú kpo asì kpo ni nɔ gbeji nú yeɖée. Mawu na ɖó hwɛ nú mɛ e nɔ ɖò nǔbliblí wà wɛ lɛ kpodo mɛ e nɔ ɖò aga lɛ̀ wɛ lɛ kpo.” Asú kpo asì kpo lɛ ɖó na nɔ gbeji nú yeɖée lɛ bo na kpò ɖò akpá e ye dó nú yeɖée lɛ é wu tɛ́dó wɛ. Cejɛnnabi nɔ zɔ́n bonu ye nɔ ɖó awǎjijɛ ɖaxó hugǎn ɔ ǎ, loɔ, nǔgbododó Biblu tɔn elɔ xwixwedó wɛ nɔ zɔ́n: “Nǔnamɛ nɔ dó xomɛhunhun nú mɛ hú nǔyiɖomɛsí.”—Mɛsɛ́dó 20:35.