Klisanwun lɛ ɖi nǔ ɖɔ Jezu kú dó hwɛ gbɛtɔ́ lɛ tɔn tamɛ. (1 Piyɛ́ɛ 3:18) É ɖò mɔ̌ có, hwlɛngán nɔ byɔ nǔ hú è ɖi nǔ ɖɔ Jezu wɛ nyí Mɛhwlɛngántɔ́. Awoví lɛ tuùn ɖɔ Jezu wɛ nyí “Mawu ví,” amɔ̌, è na sú kún yetɔn dó, ye ɖò na gán wɛ ǎ.—Luki 4:41; Judi 6.

•  Etɛ un ka ɖó na wà bo na gán?

•  Etɛ ka nyí “Ðɛ Hwɛhutɔ́ tɔn” ɔ?

•  Fitɛ “Ðɛ Hwɛhutɔ́ tɔn” ɔ ka gosin?

•   A ɖó na ɖi nǔ ɖɔ Jezu sɔ́ gbɛ̀ tɔn dó savɔ̌ dó hwɛ mǐtɔn lɛ tamɛ. (Mɛsɛ́dó 16:30, 31; 1 Jaan 2:2) Enɛ byɔ ɖɔ mǐ ni ɖi nǔ ɖɔ Jezu nɔ gbɛ̀ nǔgbo, bɔ nǔ e Biblu ɖɔ dó wǔ tɔn lɛ é bǐ sɔgbe.

•   Mɔ nǔ jɛ nǔ e Biblu kplɔ́n mɛ nǔgbo lɛ é mɛ. (2 Timɔtée 3:15) Biblu ɖɔ ɖɔ Mɛsɛ́dó Pɔlu kpo Silasi kpo ɖɔ nú gantɔ́cɔ́tɔ́ ɖé ɖɔ: “Ði nǔ nú Aklunɔ Jezu, enɛ ɔ, Mawu na hwlɛn we gán.” Enɛ ɔ gudo ɔ, ye jɛ “Aklunɔxó” kplɔ́n gantɔ́cɔ́tɔ́ ɔ jí. (Mɛsɛ́dó 16:31, 32) Enɛ xlɛ́ ɖɔ gantɔ́cɔ́tɔ́ ɔ ɖó na mɔ nǔ jɛ nǔ nukɔn nukɔntɔn e ɖò Xó Mawu tɔn mɛ lɛ é mɛ cobo kpéwú bo ɖi nǔ nú Jezu nǔgbo. É ɖó hudo nukúnnúmɔjɛnǔmɛ e sɔgbe bo jinjɔn Mawuxówema ɔ jí é tɔn.—1 Timɔtée 2:3, 4.

•   Lɛkɔ sín hwɛ towe lɛ gudo. (Mɛsɛ́dó 3:19) A ɖó na lɛ́ lɛkɔ sín hwɛ towe lɛ gudo, alǒ nǔ nyanya ɖěɖee a ko lin wá yì lɛ é kpo ɖěɖee a ko wà wá yì lɛ é kpo ɖó na vɛ́ nú we tlílí. Nú a ɖó nǔ nǔwalɔ e Mawu gbɛ́ wǎn na lɛ é nu, bo nɔ wà ‘nǔ e na ɖexlɛ́ ɖɔ a lɛkɔ sín hwɛ towe lɛ gudo nǔgbo lɛ é’ ɔ, mɛ ɖevo lɛ na mɔ nǔ jɛ wu vaan ɖɔ a lɛkɔ sín hwɛ towe lɛ gudo.—Mɛsɛ́dó 26:20.

•   Blǒ Baptɛm. (Matie 28:19) Jezu ɖɔ ɖɔ mɛ ɖěɖee huzu ahwanvu emitɔn lɛ é ɖó na bló baptɛm. È bló baptɛm nú gantɔ́cɔ́tɔ́ e xó mǐ ɖɔ wá yì é. (Mɛsɛ́dó 16:33) Ðò ali ɖokpo ɔ nu ɔ, hwenu e mɛsɛ́dó Piyɛ́ɛ kplɔ́n nǔgbo e kúnkplá Jezu é ahwan ɖé gudo é ɔ, “mɛ e yí Piyɛ́ɛ xó sè lɛ [bló baptɛm].”—Mɛsɛ́dó 2:40, 41.

•   Setónú nú alixlɛ́mɛ Jezu tɔn lɛ. (Eblée lɛ 5:9) Mɛ ɖěɖee nɔ setónú nú nǔ e Jezu kplɔ́n ye lɛ é bǐ lɛ é nɔ xlɛ́ ɖò gbɛzán yetɔn bǐ mɛ ɖɔ ye nyí ahwanvu tɔn lɛ. (Matie 28:20) Ye nɔ ‘ɖò Mawuxó ɔ ɖótó wɛ kpowun ǎ; azɔ̌ wɛ ye nɔ zé dó wà na titewungbe.’—Jaki 1:22.

•   Dɛ kaka jɛ vivɔnu. (Maki 13:13) ‘Nǔ e hudo ahwanvu Jezu tɔn lɛ é wɛ nyí ɖɔ ye na dɛ,’ bo na dó mɔ hwlɛngán. (Eblée lɛ 10:36) Ði kpɔ́ndéwú ɔ, mɛsɛ́dó Pɔlu setónú nú nǔkplɔnmɛ Jezu tɔn lɛ mlɛ́mlɛ́, bo nɔ gbeji nú Mawu hwebǐnu. É lɛ́ dɛ ɖò gbɛwezun ɔ nu sín hwenu e é huzu Klisanwun é kaka jɛ kú.—1 Kɔlɛntinu lɛ 9:27.

 Ðò sinsɛn ɖé lɛ mɛ ɔ, mɛ lɛ nɔ xò ɖɛ alɔkpa ɖé lɛ ɖi “Ðɛ Hwɛhutɔ́ tɔn” kpo “Ðɛ Hwlɛngán tɔn” kpo. Hwɛhwɛ ɔ, mɛ ɖěɖee nɔ xò ɖɛ enɛ lɛ é nɔ yí gbè ɖɔ hwɛhutɔ́ wɛ nú emi, bo nɔ xlɛ́ ɖɔ emi ɖi nǔ ɖɔ Jezu kú dó hwɛ emitɔn lɛ tamɛ ɖò ɖɛ mɛ. Ye nɔ lɛ́ xoɖɛ sɛ́dó Jezu ɖɔ é ni byɔ ayi alǒ gbɛzán emitɔn mɛ. Amɔ̌, Biblu ɖɔ xó dó “Ðɛ Hwɛhutɔ́ tɔn” e è ko wlan ɖ’ayǐ é ɖé wu ǎ, mɔ̌ jɛn é ma ka lɛ́ ɖɔ è ni xò ǎ é nɛ.

 Mɛɖé lɛ lin ɖɔ enyi mɛɖé vɔ́ xógbe “Ðɛ Hwɛhutɔ́ tɔn” ɔ tɔn lɛ ɖɔ ɔ, é sixu kúdeji ɖɔ è na hwlɛn ɛ gán. Amɔ̌, ɖɛ xixo kpowun ko kpé bonu è na mɔ hwlɛngán ǎ. Ðó mǐ nyí hwɛhutɔ́ lɛ wutu ɔ, mǐ nɔ kpò ɖò nǔ wà nyi dò wɛ. (1 Jaan 1:8) Enɛ wu wɛ Jezu kplɔ́n ahwanvu tɔn lɛ ɖɔ ye ni nɔ xoɖɛ hwebǐnu nú sɔ́kɛ hwɛ yetɔn lɛ tɔn. (Luki 11:2, 4) Hú mɔ̌ ɔ, Klisanwun ɖé lɛ hɛn hwlɛngán mavɔmavɔ e sín ali jí ye ɖè é bú, ɖó ye ɖó Mawu sinsɛn te.—Eblée lɛ 6:4-6; 2 Piyɛ́ɛ 2:20, 21.

 Hwenuxó-wlantɔ́ lɛ kpò ɖò gbě tɔn vo sɛ̀ tɔn vo ɖɔ dó fí e “Ðɛ Hwɛhutɔ́ tɔn” ɔ gosin é wu wɛ. Mɛɖé lɛ ɖɔ ɖɔ nǔwiwa mɔhun jɛ kan vun jí ɖò huzuhuzu e è nɔ ylɔ́ ɖɔ Réforme protestante é hwenu. Mɛ ɖevo lɛ ɖi nǔ ɖɔ gbɛtɔ́ lɛ jɛ “Ðɛ Hwɛhutɔ́ tɔn” ɔ xò jí bɛ́sín hwenu e sinsɛn lɛ jɛ kpɔ́ sù jí ɖò xwè kanweko 18gɔ́ kpo 19gɔ́ kpo vlamɛ é. Mawuxówema ɔ yí gbè nú nǔwalɔ enɛ ɖò ali ɖebǔ nu ǎ; nǔgbo ɔ, é sɔ́ ta nǔkplɔnmɛ Biblu tɔn lɛ.