Nɛ̌ Jezu ka Cí?

Xósin e Biblu na é

Mɛɖé tuùn lee Jezu cí é tawun ǎ, ɖó Biblu tinmɛ lee é cí ɖò wěxo é ǎ. Enɛ xlɛ́ ɖɔ nǔ e Jezu nyí ɖò wěxo é kún ɖò taji ó. É ɖò mɔ̌ có, Biblu ɖɔ nǔɖe lɛ bɔ ye sixu d’alɔ mǐ bɔ mǐ na tuùn lee é sixu ko cí é.

Wuntun lɛ: Jwifu wɛ nú Jezu, b’ɛ sixu ko ɖu wuntun ɖé lɛ sín gǔ sín nɔ tɔn e jɔ ɖò kúnkan Sɛmu tɔn mɛ é gɔ́n. (Eblée lɛ 7:14) É cí ɖɔ é kún ɖó wuntun bǔnɔ ɖé, b’ɛ zɔ́n b’ɛ gbɔn vo ó ɖɔhun. Ðò ninɔmɛ ɖé mɛ ɔ, é kpéwú bo bɛ yɛ bo gosin Galilée wá Jeluzalɛmu, bɔ mɛɖé tuùn i ǎ. (Jaan 7:10, 11) Enyi é ɖò ahwanvu tɔn e kpo é kpo vɛ́ lɛ é tɛntin ɔ, è tlɛ nɔ tuùn i ɖó vo ǎ. Flín ɖɔ é byɔ ɖɔ Judasi Isikaliɔti ni dó gesí Jezu nú ahwan e wá wlí é.—Matie 26:47-49.
Ða tɔn sín gaɖiɖi: É cí ɖɔ ɖa Jezu tɔn lɛ kún ɖiga ó, ɖó Biblu ɖɔ: “Nú ɖa e ɖò sunnu ta ɔ ɖiga ɔ, winnyanú wɛ é nyí n’i.”—1 Kɔlɛntinu lɛ 11:14.
Atán tɔn: Jezu ɖó atán. É xwedó Jwifu lɛ sín sɛ́n e byɔ ɖɔ sunnu mɛxo lɛ ni ma ‘xwlɛ́ gekplá yetɔn lɛ ó’ é. (Levíi ví lɛ 19:27; Galatinu lɛ 4:4) Gɔ́ na ɔ, Biblu ɖɔ xó dó atán Jezu tɔn wu ɖò nǔɖɔɖ’ayǐ e kúnkplá wuvɛ̌ e é mɔ lɛ é mɛ.—Ezayíi 50:6.
Agbaza tɔn: Nǔ lɛ bǐ xlɛ́ ɖɔ Jezu sɔ́ asú. Ðò sinsɛnzɔ́ Jezu tɔn hwenu ɔ, é bló kilomɛtlu gegě. (Matie 9:35) Jezu ɖè nǔ kwiji sín tɛmpli Jwifu lɛ tɔn mɛ azɔn we, bo flí tavo akwɛɖyɔtɔ́ lɛ tɔn xwè, lobo sɔ́ lanbá dó nya kanlin lɛ tɔ́n na gbè ɖokpo. (Luki 19:45, 46; Jaan 2:14, 15) Xókwíntinmɛwegbo McClintock kpo Strong kpo tɔn ɖɔ: “Wema wɛnɖagbe tɔn lɛ bǐ wɛ xlɛ́ ɖɔ Jezu sɔ́ asú, bo lɛ́ ɖò anyǔ mɛ.”—Volume IV, wexwɛ 884.
Nukúnmɛ sín xlɛ̌ tɔn: É nɔ dɔn mɛ dó wǔ, bo nɔ sè wuvɛ̌ xá mɛ, b’ɛ ɖò wɛn ɖɔ nukúnmɛ sín xlɛ̌ tɔn lɛ nɔ xlɛ́ mɔ̌. (Matie 11:28, 29) Gbɛtɔ́ alɔkpa lɛ bǐ nɔ ba gbɔdónúmɛ kpo alɔdó kpo ɖò gɔ̌n tɔn. (Luki 5:12, 13; 7:37, 38) Yɔkpɔvu lɛ lɔ tlɛ nɔ vo ɖò akpá tɔn.—Matie 19:13-15; Maki 9:35-37.

Nukúnnúmɔjɛnǔmɛ agɔ dó lee Jezu cí é wu

Nukúnnúmɔjɛnǔmɛ agɔ: Mɛɖé lɛ nɔ lin ɖɔ kúnkan Aflikanu lɛ tɔn ɖé mɛ wɛ Jezu na ko gosin, ɖó wema Nǔɖexlɛ́mɛ tɔn jlɛ́ ɖa tɔn lɛ dó avɔkanfún wu, bo ɖɔ ɖɔ afɔ tɔn lɛ nɔ kɔ́n “ganvɔ e è sínsín ɖò zo mɛ” é ɖɔhun.—Nǔɖexlɛ́mɛ 1:14, 15, Mawuxówema.

Nǔgbo: Nǔ e è “ɖexlɛ́” mɛ lɛ é wɛ ɖò wema Nǔɖexlɛ́mɛ tɔn mɛ. (Nǔɖexlɛ́mɛ 1:1) É nyí lee Jezu cí ɖò wěxo hwenu e é ɖò ayikúngban jí é dó gesí wɛ xógbe nǔjlɛdonǔwu tɔn e è zán dó ɖɔ xó dó ɖa tɔn kpo afɔ tɔn lɛ kpo wu lɛ é ɖè ǎ, loɔ, jijɔ e é ɖó ɖò fínfɔ́n sín kú tɔn gudo lɛ é wɛ. Ðò xó e è ɖɔ ɖò Nǔɖexlɛ́mɛ 1:14 mɛ dó Jezu wu bo ɖɔ “ta tɔn kpo ɖa tɔn lɛ kpo wé avɔkanfún abǐ lawé ɖɔhun” é mɛ ɔ, è zán sinmɛ dó jlɛ́ nǔ dó nǔ wu wɛ, é nyí lee wǔjɔnú tɔn lɛ cí é lě xó ɖɔ wɛ è ɖè ǎ. Enɛ nɔte nú nǔnywɛ e é ɖó, ɖó mɛxoxwe tɔn wu é. (Nǔɖexlɛ́mɛ 3:14) Wemafɔ enɛ ɖò lee ɖa Jezu tɔn cí é jlɛ́ dó avɔkanfún wu wɛ ǎ, mɔ̌ jɛn é ma lɛ́ ɖò ɖa tɔn jlɛ́ dó lawé wu wɛ ǎ é nɛ.

Afɔ Jezu tɔn lɛ cí “ganvɔ e è sínsín ɖò zo mɛ, bo ɖíɖí wǔ na ɔ ɖɔhun.” (Nǔɖexlɛ́mɛ 1:15) Gɔ́ na ɔ, nukún tɔn mɛ “nɔ kɔ́n lee hwe nɔ kɔ́n gbɔn hwemɛ cíɖíɖí é ɖɔhun.” (Nǔɖexlɛ́mɛ 1:16) Ðó akɔ ɖebǔ ma ɖó sinmɛ enɛ lɛ e xó è ɖɔ lɛ é ǎ wutu, nǔjlɛdonǔwu ɖé wɛ nǔmimɔ enɛ ɖó na nyí, bo xlɛ́ ɖɔ ee Jezu fɔ́n sín kú é ɔ, é cí mɛ e “ɖò weziza e mɛɖé ma sixu sɛkpɔ́ ǎ é mɛ” é ɖɔhun.—1 Timɔtée 6:16.

Nukúnnúmɔjɛnǔmɛ agɔ: Jezu ɖó gǎn ǎ bo nɔ lɛ́ ɖi xɛsi.

Nǔgbo: Nǔwiwa Jezu tɔn lɛ nɔ xlɛ́ ɖɔ é nyí sunnu nǔgbo. Ði kpɔ́ndéwú ɔ, é ɖè éɖée xlɛ́ ahwan e wá wliwlí i gbé é kpo akɔ́nkpinkpan kpo. (Jaan 18:4-8) Jezu ɖó na ko ɖó hlɔnhlɔn tawun ɖó é nyí atínkpatɔ́, bo nɔ zán azɔ̌wanú alɔnu tɔn lɛ wutu.—Maki 6:3.

Bɔ etɛwu é ka byɔ ɖɔ è ni d’alɔ Jezu, bo hɛn yatín tɔn n’i i lo? Etɛwu é ka kú jɛ nukɔn nú mɛ ɖěɖee è xwè dó yatín jí ɖò akpá tɔn lɛ é? (Luki 23:26; Jaan 19:31-33) Táan kpɛɖé jɛ nukɔn nú hwenu e è na xwè Jezu dó yatín wu é ɔ, é ba gǎn kpò tawun ɖò agbaza mɛ. É nɔ wunzɛn ɖò zǎn ɔ bǐ mɛ, ɖó é ɖò kúsukpɔ́ xò wɛ wutu. (Luki 22:42-44) Ðò zǎn ɔ mɛ ɔ, Jwifu lɛ dóya n’i, bɔ ɖò ayihɔngbe tɔn zǎnzǎn ɔ, Hlɔmanu lɛ xò è dó daka mɛ. (Matie 26:67, 68; Jaan 19:1-3) É ɖò wɛn ɖɔ nǔ enɛ lɛ e è wà xá Jezu é wɛ zɔ́n bɔ é yawǔ kú.

Nukúnnúmɔjɛnǔmɛ agɔ: Hwebǐnu wɛ Jezu nɔ ɖò xwíxwí, bo nɔ blawǔ.

Nǔgbo: Jezu ɖè jijɔ Tɔ́ tɔn jixwé tɔn ɔ Jehovah, ee Biblu tinmɛ ɖɔ é nyí “Mawu awǎjijɛnɔ ɔ” é tɔn lɛ xlɛ́ bǐ mlɛ́mlɛ́. (1 Timɔtée 1:11, nwt; Jaan 14:9) Nǔgbo ɔ, Jezu kplɔ́n lee è na ɖó awǎjijɛ gbɔn é mɛ ɖevo lɛ. (Matie 5:3-9; Luki 11:28) Nǔ enɛ lɛ xlɛ́ ɖɔ hwɛhwɛ wɛ Jezu nɔ ɖè awǎjijɛ xlɛ́, b’ɛ nɔ tɔ́n ɖò nukún tɔn ta.