Etɛ ka Nɔ Nyí Dindinwayixwe Ɔ?

Xósin e Biblu na é

Dindinwayixwe ɔ, xwè e Jwifu lɛ nɔ ɖu dó flín ɖè e Mawu ɖè ye sín kannumɔgbenu ɖò Ejipu ɖò 1513 J.H.M. tɔn é wɛ. Mawu ɖegbe nú Izlayɛli-ví lɛ ɖɔ ye ni nɔ flín nǔwiwa taji enɛ xwewu xwewu, ɖò azǎn 14gɔ́ sun Jwifu lɛ tɔn Abibu e è wá ylɔ́ ɖò nukɔnmɛ ɖɔ Nisáan é jí.—Tíntɔ́n 12:42; Levíi ví lɛ 23:5.

Etɛwu è ka ylɔ́ ɖɔ Dindinwayixwe?

Xókwín “Dindinwayixwe” ɔ nɔ dó gesí hwenu e Mawu hwlɛn Izlayɛli-ví lɛ sín awě e hu nukɔngbeví Ejipu tɔn lɛ bǐ é sí é. (Tíntɔ́n 12:27; 13:15) Cobonu Mawu na sɔ́ awě baɖabaɖa enɛ dó xò ye ɔ, é ɖɔ nú Izlayɛli-ví lɛ ɖɔ ye ni sá lɛngbɔ̌ví ɖé alǒ gbɔ̌ví ɖé sín hun dó hɔnkpo yetɔn lɛ wu. (Tíntɔ́n 12:21, 22) Mawu na mɔ wuntun enɛ bo na “gbɔn [xwé yetɔn lɛ] tanu dín,” lobo na xásá nukɔngbeví yetɔn lɛ ɖó.—Tíntɔ́n 12:7, 13.

Nɛ̌ è ka nɔ ɖu Dindinwayixwe ɔ gbɔn ɖò Biblu sín táan mɛ?

Mawu na alixlɛ́mɛ lɛ Izlayɛli-ví lɛ dó lee ye na ɖu Dindinwayixwe nukɔntɔn ɔ gbɔn é wu. a Nǔ ɖěɖee è nɔ wà ɖò Dindinwayixwe ɔ hwenu bɔ Biblu ɖɔ é ɖé lɛ ɖíe:

Vɔsisa: Xwédo lɛ nɔ sɔ́ lɛngbɔ̌ví (alǒ gbɔ̌ví) e ɖó xwè ɖokpo é ɖé ɖò azǎn wǒgɔ́ sun Abibu (Nisáan) tɔn jí, bɔ ɖò azǎn 14gɔ́ ɔ gbè ɔ, ye nɔ hu. Ðò Dindinwayixwe nukɔntɔn ɔ hwenu ɔ, Jwifu lɛ sá hun kanlin ɔ tɔn ɖě dó hɔn yetɔn lɛ sín kpò lɛ kpo hɔn lɛ sín agba lɛ kpo wu, bo mɛ kanlin ɔ bǐ lobo ɖu.—Tíntɔ́n 12:3-9.
Nǔɖuɖu: Gɔ́ nú lɛngbɔ̌ví (alǒ gbɔ̌ví) ɔ, Izlayɛli-ví lɛ nɔ lɛ́ ɖu wɔ̌xúxú e mɛ è ma dó tɔ́n ǎ é kpo ama vívɛ́ lɛ kpo. Ye lɔ ɖò Dindinwayixwe sín nǔɖuɖu ɔ mɛ.—Tíntɔ́n 12:8.
Xwè: Izlayɛli-ví lɛ nɔ ɖu Wɔ̌xúxú E Mɛ È Ma Dó Tɔ́n Ǎ É Sín Xwè nú azǎn tɛnwe ɖò Dindinwayixwe ɔ gudo; táan enɛ mɛ ɔ, ye nɔ ɖu wɔ̌xúxú e mɛ è dó tɔ́n é ǎ.—Tíntɔ́n 12:17-20; 2 Tan 30:21.
Mɛkplɔnkplɔn: Mɛjitɔ́ lɛ nɔ gbɔn Dindinwayixwe ɔ gblamɛ dó kplɔ́n nǔ vǐ yetɔn lɛ dó Jehovah Mawu wu.—Tíntɔ́n 12:25-27.
Tomɛyiyi: Nukɔnmɛ ɔ, Izlayɛli-ví lɛ nɔ yì Jeluzalɛmu bo na dó ɖu Dindinwayixwe ɔ.—Sɛ́nflínmɛ 16:5-7; Luki 2:41.
Aca ɖevo lɛ: Ðò Jezu sín hwenu ɔ, è nɔ zán vɛ̌ɛn bo nɔ lɛ́ jihan ɖò Dindinwayixwe ɔ hwenu.—Matie 26:19, 30; Luki 22:15-18.

Nukúnnúmɔjɛnǔmɛ agɔ lɛ dó Dindinwayixwe ɔ wu

Nukúnnúmɔjɛnǔmɛ agɔ: Izlayɛli-ví lɛ nɔ ɖu Dindinwayixwe ɔ ɖò 15 Nisáan.

Nǔgbo: Mawu ɖegbe nú Izlayɛli-ví lɛ ɖɔ ye ni hu lɛngbɔ̌ví ɔ ɖò hwenu e hwe na yì xɔ gudo tlolo é ɖò 14 Nisáan, bo lɛ́ ɖu gbè nɛ gbè zǎnmɛ. (Tíntɔ́n 12:6, 8) Izlayɛli-ví lɛ nɔ lɛ́n azǎn yetɔn lɛ bɛ́sín gbadanu ɖě jɛ gbadanu ɖevo. (Levíi ví lɛ 23:32) Hǔn, Izlayɛli-ví lɛ nɔ hu lɛngbɔ̌ví ɔ bo nɔ ɖu nǔɖuɖu Dindinwayixwe tɔn ɔ ɖò bǐbɛ̌mɛ 14 Nisáan tɔn.

Nukúnnúmɔjɛnǔmɛ agɔ: Klisanwun lɛ ɖó na nɔ ɖu Dindinwayixwe ɔ.

Nǔgbo: Ee Jezu ɖu Dindinwayixwe 14 Nisáan 33 H.M. tɔn gudo é ɔ, é sɔ́ nǔwiwa yɔyɔ̌ ɖé sín nu ɖó te, é wɛ nyí Aklunɔ Sín Nǔɖuɖu ɔ. (Luki 22:19, 20; 1 Kɔlɛntinu lɛ 11:20) Nǔɖuɖu enɛ jɛ Dindinwayixwe ɔ tɛnmɛ, ɖó é nɔ flín mǐ vɔsisa “Klisu e nyí Dindinwayixwe mǐtɔn sín lɛngbɔ̌ví ɔ” é tɔn. (1 Kɔlɛntinu lɛ 5:7) Vɔsisa gbɛxɔnúmɛ tɔn Jezu tɔn hugǎn vɔ̌ e è nɔ sá ɖò Dindinwayixwe ɔ hwenu é, ɖó éyɛ tún kan nú gbɛtɔ́ lɛ bǐ sín hwɛhuhu kpo kú kpo sí.—Matie 20:28; Eblée lɛ 9:15.

a É ɖò mɔ̌ có, ee táan ɖò wiwáyi wɛ é ɔ, é byɔ ɖɔ è ni bló huzuhuzu ɖé lɛ. Ði kpɔ́ndéwú, Izlayɛli-ví lɛ “hwlɛndó” bo ɖu Dindinwayixwe nukɔntɔn ɔ, ɖó ye ɖó na ɖò gbesisɔmɛ bá tɔ́n sín Ejipu wutu. (Tíntɔ́n 12:11) Amɔ̌, ee Izlayɛli-ví lɛ wá Akpádídó Yikúngban ɔ jí é ɔ, é sɔ́ byɔ ɖɔ ye ni nɔ hwlɛndó cobo ɖu ǎ.